ჩაკვეტაძე შვეიცარიასა და ირლანდიასთან დაგვაკლდება?

ახლოვდება საქართველოს ნაკრების სტარტი ევროპის 2020 წლის ჩემპიონატის შესარჩევ ციკლში. შესაბამისად, ახლოვდება ის დღეც, როცა ვლადიმირ ვაისი შვეიცარიასა (23 მარტი, თბილისი) და ირლანდიასთან (26 მარტი, დუბლინი) მატჩებისთვის შემადგენლობას დაასახელებს.

ამ მომენტისთვის პოზიტივზეც შეგვიძლია ვილაპარაკოთ და ნეგატივზეც. კარგია, რომ თამაში დაიწყო და გოლიც გაიტანა ჯანო ანანიძემ. ასე თუ ისე, ტრავმის შემდეგ ათამაშდა გიორგი ქვილითაიაც. ეს განსაკუთრებით მნიშვნელოვანია თავდასხმის ხაზში მწირი არჩევანის გამო, მით უფრო, ლევან მჭედლიძის მორიგი ტრავმიდან გამომდინარე. რა თქმა უნდა, არ გვავიწყდება ნიკა კაჭარავაც.

მყარად ჩადგა "მაგდებურგის" კარში ჩვენი ნაკრების პირველი კიპერი გიორგი ლორია და კარგია, რომ "სეტუბალში" უკვე თამაშობს გიორგი მაკარიძეც. როგორც იქნა, ვარჯიშს შეუდგა ოთარ კაკაბაძე. ეს კი ძალიან მნიშვნელოვანია, რადგან მარჯვენა მცველის პოზიციაზე კონკურენცია, ფაქტობრივად, არ არის.

თუმცა შემაშფოთებელია, რომ ჯერაც უგუნდოდაა თორნიკე ოქრიაშვილი, გიორგი ნავალოვსკი ახლახან ჩაირიცხა ბათუმის "დინამოში" და ჯერ სათამაშო პრაქტიკა აკლია... და გიორგი ჩაკვეტაძე - საქართველოს ნაკრების ახალი იმედი, რომლის გამოჯანმრთელების პროცესი ძალიან გაიწელა და "გენტში" მისი დაბრუნება რამდენჯერმე გადაიდო.

გუნდის მწვრთნელი იეს ტორუპი "ვარეგემთან" წინა ტურის მატჩამდე ამბობდა, რომ გიორგის დაბრუნება ჯერ ადრეა. თუმცა იქვე კმაყოფილებით აღნიშნავს, რომ ტესტები პოზიტიურია და რომ გიორგი მომავალი კვირიდან განაახლებს გუნდთან ერთად ვარჯიშს.

რას ნიშნავს ეს? ეს ნიშნავს იმას, რომ შემადგენლობის დასახალების მომენტში ჩაკვეტაძეს ჯერ კიდევ არ ექნება ნათამაშები ჩემპიონატის მატჩში. ალბათ, ვაისი მას მაინც შეიყვანს სანაკრებო სიაში, მაგრამ შესაძლოა, რისკის ქვეშ არ დააყენოს ახალგაზრდა ფეხბურთელის ჯანმრთელობა და სათადარიგოთა შორის დატოვოს. თუმცა იქამდე ჯერ კიდევ უნდა დაველოდოთ "გენტის" საექიმო შტაბის დასკვნას, რომელიც, იმედია, პოზიტიური იქნება.

ყოველდღიური სპორტული გაზეთი "ლელო"
1812
მკითხველის კომენტარები / 1 /
NMN789
0
დაიწყო უკვე, "სათამაშო პრაქტიკა არ აქვს,ტრამვა აწუხებს და ა.შ."
მსგავსი ამბები
რუბრიკის სხვა სიახლეები
;