ჩაკვეტაძე 3 მილიონამდე - 'ტრანსფერმარკტმა' ქართველების ტრანსფერები გადააფასა

გერმანულმა ინტერნეტსააგენტო "ტრანსფერმარკტმა" ეროვნული ლიგის მოთამაშეების ტრანსფერები გადააფასა.

"ლელოსთვის" ცნობილი გახდა, რომ ბოლო შეფასებით, პირველ ადგილზე თბილისის "დინამოს" შემტევი ნახევარმცველი, გუნდის კაპიტანი ოთარ კიტეიშვილია, რომლის ფასიც 600 ათასიდან 800 ათასამდე გაიზარდა.

ეს ეროვნული ლიგისთვის უჩვეულოდ მაღალი ფასია. ბოლოს, დაახლოებით ასეთი ფასი (750 ათასი) მხოლოდ გიორგი ჩაკვეტაძეს ჰქონდა...

ეროვნული ლიგის ყველაზე
ძვირად ღირებულები

მოთამაშეთა ფასების განახლებისას მთავარი იყო შემდეგი ფაქტორები: კიტეიშვილის კარგი თამაში, რამაც ასახვა სტატისტიკაშიც პოვა და წინსვლა სააგენტომაც დაუფასა.

ბექა მიქელთაძის შეფასება ოდნავ გაიზარდა და 500 ათასს მიაღწია. ასევე, ჩანს დინამოელ ბაქარ ქარდავას პროგრესიც - 23 წლის საყრდენი ნახევარმცველის მესამე მაჩვენებელიც სწორედ ამას მიუთითებს. ვფიქრობთ, მისთვის ზღვარი არც 475 ათასი იქნება.

ასევე ხაზგასასმელია, ტოპ 10-ში ლევან ხარაბაძის მოხვედრა - მისი ფასი 400 ათასამდე გაიზარდა. თბილისის "დინამოს" 18 წლის მცველზე დიდი ავანსი გასცეს და იმედია, ამ ნდობას გაამართლებს.

ზუკა დავითაშვილსა და ხვიჩა კვარაცხელიას 17-წლამდელთა ნაკრებში შესანიშნავი თამაში დაუფასეს - ორივე 350 ათასით შეაფასეს. ასევე გამოარჩიეს მიმდინარე სეზონში ირაკლი ბუღრიძის მშვენიერი თამაში და პოტენციალი - მის გრაფაში უკვე 325 ათასი წერია.

ისე ჩანს, ბუღრიძე მალე ჩემპიონატის ერთ-ერთი წამყვანი გარემარბი გახდება. ამ სეზონიდან ქუთაისის "ტორპედოში" მოთამაშე ჯაბა ლიპარტიას შეფასება კი 500 ათასიდან 350-მდე შეუმცირდა.

ლეგიონერებში ვაგნერი ლიდერობს

ფასები მოუმატეს ლეგიონერებსაც - "საბურთალოს" ბრაზილიელი შემტევის ვაგნერ გონსალვესის შეფასება 450 ათასი ევრო გახდა (300 ათასის ნაცვლად), ხოლო გორის "დილაში" მოთამაშე ლეანდრო რიბეიროსა და ალვინ ფორტესის - შესაბამისად, 350 და 325 ათასი.

ეროვნული ნაკრების ყველაზე ძვირად ღირებულები

მას შემდეგ, რაც გიორგი ჩაკვეტაძეს "გენტში" მეტი სათამაშო დრო მიეცა, მისი შეფასება მკვეთრად გაიზარდა - ბელგიური კლუბის 18 წლის შემტევის ფასი იანვრიდან აპრილის დასაწყისამდე 1,2 მილიონიდან 3-მდე გაიზარდა.

ასეთი მკვეთრი ზრდა იშვიათია და აქედან გამომდინარე, სასიამოვნოც. გაიზარდა ოთარ კაკაბაძის ფასიც - საქართველოს ნაკრებისა და "ჟიმნასტიკის" მცველის ფასი მილიონი ევრო გახდა.

ყველაზე ძვირად ღირებული ქართველი ფეხბურთელი კი კვლავ საბა კვირკველიაა - "ჯვაროსნებისა" და მოსკოვის "ლოკომოტივის" ცენტრალური მცველის გრაფაში კვლავ 5,8 მილიონი წერია, მაგრამ, ჩვენი ინფორმაციით, უახლოეს დღეებში მას, შეიძლება, 7 მილიონიც დაუწერონ. ეს ბოლო 5 წელიწადში საქართველოს ნაკრების ფეხბურთელებს შორის სარეკორდო მაჩვენებელი იქნება.

ეროვნულ ლიგაში ყველაზე
ძვირად ღირებული კიტეიშვილია

ეროვნული ლიგის ტოპათეული

ფეხბურთელი კლუბი ფასი

ოთარ კიტეიშვილი დინამო თბ 800,000
ბექა მიქელთაძე რუსთავი 500,000
ბაქარ ქარდავა დინამო თბ 475,000
გიორგი ქიმაძე ტორპედო 450,000
როინ კვასხვაძე ტორპედო 450,000
ვაგნერ გონსალვესი საბურთალო 450,000
ლუკა ლოჩოშვილი დინამო თბ 450,000
გიორგი გაბულოვი რუსთავი 400,000
მაიკლ ოლაიტანი სამტრედია 400,000
ლევან ხარაბაძე დინამო თბ 400,000

ლეგიონერები

ფეხბურთელი კლუბი ფასი

ვაგნერ გონსალვესი საბურთალო 450,000
გიორგი გაბულოვი რუსთავი 400,000
მაიკლ ოლაიტანი სამტრედია 400,000
ინტერს გიი სამტრედია 350,000
ლეანდრო რიბეირო დილა 350,000
ალვინ ფორტესი დილა 325,000
დინო ჰამზიჩი ჩიხურა 250,000

ყველაზე ძვირად ღირებული ქართველები

ფეხბურთელი კლუბი ფასი
საბა კვირკველია ლოკომოტივი მ 5.8*
გიორგი ჩაკვეტაძე გენტი 3,0
გურამ კაშია ვიტესი 2,5
ვალერი ყაზაიშვილი სანხოსე 2,5
ჯანო ანანიძე სპარტაკი 2,3
თორნიკე ოქრიაშვილი კრასნოდარი 1,2
გიორგი ჭანტურია ურალი 1,1
დავით ხოჭოლავა შახტარი 1,0
გიორგი ლორია ანჟი 1,0
ჯაბა კანკავა ტობოლი 1,0
ოთარ კაკაბაძე ჟიმნასტიკი 1,0
შენიშვნა: * - მილიონი ევრო

ყოველდღიური სპორტული გაზეთი "ლელო"
1869
მკითხველის კომენტარები / 0 /
მსგავსი ამბები
რუბრიკის სხვა სიახლეები
;