ჩაკვეტაძის და 'ბარსას' თემა ევროპულმა მედიამ აიტაცა, - 'გენტი': ვიცით, რომ არის დაინტერესება...

გიორგი ჩაკვეტაძისა და "ბარსელონას" თემა გასცდა საქართველოსა და ესპანეთის საზღვრებს და ევროპული მედიის სალაპარაკო გახდა.

მთავარი წყარო აქ არის შპორტს.ეს, რომელიც ბარსელონაში გამომავალი "დიარიო სპორტის" ელექტრონული ვერსიაა. სწორედ ამ საიტმა გვამცნო საქართველოს ნაკრების ახალგაზრდა ტალანტით მსოფლიო ფეხბურთის გიგანტის, "ბარსელონას" დაინტერესების თაობაზე.

"ბარსელონა" დაინტერესებულია "გენტის" 19 წლის ნახევარმცველის, გიორგი ჩაკვეტაძის გადაბირებით. სწორედ ამ მიზნით დაესწრებიან "ბარსას" სელექციონერები ანდორისა და საქართველოს ნაკრებთა შეხვედრას ერთა ლიგის ეგიდით. "ბარსელონა" ჩაკვეტაძეს ბოლო ერთი წლის განმავლობაში აკვირდება, თუმცა ბელგიური კლუბისთვის წინადადებით ჯერ არ მიუმართავს", - წერს "ევროსპორტი".

"ბარსელონა" განსაკუთრებულ ყურადღებას უთმობს იმ პროგრესს, რომელიც აშკარაა გიორგი ჩაკვეტაძის კარიერაში. ახალგაზრდა ქართველ ტალანტს ძალიან კარგი სეზონი აქვს "გენტში". "ბარსას" წარმომადგენლები ჩაკვეტაძეზე დასაკვირვებლად დაესწრებიან საქართველოსა და ანდორის ნაკრებთა მატჩს", - ეს უკვე ESPN-იდანაა.

გენტი ბარსას ინტერესს ადასტურებს...

"გენტმა" დაადასტურა "ბარსელონას" ინტერესი გიორგი ჩაკვეტაძის მიმართ. კლუბმა ოფიციალური განცხადება გაავრცელა. "ჩვენ უკვე კარგა ხანია ვიცით, რომ "ბარსელონა" გიორგი ჩაკვეტაძის ტრანსფერითაა დაინტერესებული. ამ კლუბის სკაუტები დაესწრებიან ანდორისა და საქართველოს ნაკრებთა შეხვედრას", - ნათქვამია განცხადებაში.

ერთი ისტორიული ფოტო...

"ბავშვობაში ყველას აქვს ოცნება. ზოგი NBA-ში მოხვედრაზე ოცნებობს, ზოგი "რეალსა" და "ბარსელონაზე"... რაც უფრო იზრდები, ეს ოცნება ან ახლოვდება, ან გშორდება. ეს იმაზეა დამოკიდებული, რამდენად მონდომებული ხარ. ვინც შრომას არ დაიზარებს, თავს არ დაზოგავს და სწორი მიმართულებით იმუშავებს, ოცნებას აუცილებლად აიხდენს", - თქვა ერთხელ ზაზა ფაჩულიამ და ამ ფოტოს ნახვისას, პირველად სწორედ ეს სიტყვები გამახსენდა.

ამ ფოტოზე კი 11 წლის გიორგი ჩაკვეტაძეა, რომელიც ბარსელონაში, "კამპ ნოუს" პირით ხაზთან დგას... და, ალბათ, "ბარსაში" მოხვედრაზე ოცნებობს.
ახლა ის უკვე 19 წლისაა, დიდებში თამაშობს... მხოლოდ თამაშობს? მისი დამსახურებით ბელგიური "გენტი" და საქართველოს ნაკრები დიდ მატჩებს იგებენ...
ამას წინათ დაიწერა, რომ ჩაკვეტაძის გადაბირებით დორტმუნდის "ბორუსიაა" დაინტერესებული, ანდორასთან მატჩის წინ კი აგერ, მთლად "ბარსელონას" სკაუტები ჩადიან ანდორაშიო...

ეს ყველაფერი იმ შრომის შედეგია, რაც ფოტოზე მოღიმარმა 11 წლის ბავშვმა იმ დღიდან 8 წლის განმავლობაში გასწია და კიდევ გასწევს, რადგან იცის, რომ შრომა ყველაფერში მთავარია. ამას წინათ, სწორედ ეს გვითხრა ექსკლუზიურ ინტერვიუში და რაკი ასე ფიქრობს, ძალიანაც კარგი!..

ყოველდღიური სპორტული გაზეთი "ლელო"
1253
მკითხველის კომენტარები / 0 /
მსგავსი ამბები
რუბრიკის სხვა სიახლეები
;