ჩაჩავა ტორპედოს  რეორგანიზაციას  აპირებს - 'გუნდს ლიდერები დატოვებენ  და გაახალგაზრდავდება'

ქუთაისის “ტორპედოში” არსებულ ფინანსურ პრობლემებზე კლუბის ოფიციალურმა გვერდმა “ტორპედოს” პრეზიდენტის, ზაალ ჩაჩავას კომენტარი გამოაქვეყნა:

“უპირველესად, ვადასტურებ, რომ ასეთ პირობებში კლუბის დატოვებას არ ვაპირებ. მიუხედავად იმ კრიზისისა, რაც “ტორპედოდან” უცხოელი ინვესტორის წასვლამ განაპირობა, კლუბი აგრძელებს ფუნქციონირებას და კეთდება ყველაფერი იმისთვის, რომ “ტორპედო” ევროტურნირებზე გავიდეს და ეროვნულ ლიგაში იასპარეზოს. რაც შეეხება ძირითად გუნდს, ჩვენდა სამწუხაროდ, ვიქნები გულწრფელი და ალბათ ვერ ავიცილებთ იმ ფაქტს, რომ მოხდება მისი რეორგანიზაცია”, - წერია ჩაჩავას განცხადებაში.

“ტორპედოს” პრეზიდენტმა ამის მიზეზი ახსნა: “ბევრს არ აქვს ეს ინფორმაცია, ამიტომ, პირდაპირ ვიტყვი - ჩემი მოსვლის შემდგომ, თითქმის სამი წელია, “ტორპედოს” ძირითადი გუნდის სახელფასო ბიუჯეტი ყველაზე მაღალია საქართველოში და ჩვენი ფეხბურთელების ხელფასები თითქმის უთანაბრდება მათი უცხოელი კოლეგების შრომის ანაზღაურებას. წელსაც ყველანაირად ვცდილობდი, გამეხარებინა ჩვენი გულშემატკივარი და ვარსკვლავური გუნდი შემენარჩუნებინა, მაგრამ უცხოური ინვესტიციის გარეშე, სამწუხაროდ, ქართულ რეალობაში ეს საკმაოდ ძნელია. პირდაპირ ვიტყვი, იანვარში ამ გუნდის დაკომპლექტება და სახელფასო ბიუჯეტის დაგეგმვა მოხდა იმ პერსპექტიული შემოსავლის იმედად, რომლის მიღებასაც ვგეგმავდით უცხოელი ინვესტორის დაფინანსების ხარჯზე, რაც, სამწუხაროდ, არ მოხდა”.,

ჩაჩავა იმედს არ კარგავს, რომ “ტორპედო” ამ შემადგენლობას შეინარჩუნებს: “მიუხედავად იმისა, რომ პირადად ვეცადე და ახლაც ძალიან ვცდილობ, შევინარჩუნო “ტორპედოს” ისტორიაში საუკეთესო გუნდი. მაგრამ, თუ ეს ვერ მოხერხდება, მერწმუნეთ, ყველაზე მეტად ისევ მე დამწყდება გული, მაგრამ ერთხელ უკვე შევძელით და დამიჯერეთ, ისევ შევძლებთ, გავხდეთ კონკურენტუნარიანი გუნდი და გავახაროთ ჩვენი ნამდვილი გულშემატკივარი.

“ტორპედო” ნებისმიერი შემადგენლობით ანგარიშგასაწევი ძალა იქნება და ჩვენ ამას ძალიან მალე დავამტკიცებთ. დაბოლოს, რაც შეეხება პირადად ჩემ მიმართ არსებულ დაუსაბუთებელ ბრალდებებს, არ ვაპირებ მათზე კომენტარის გაკეთებას - ჩვენ საქმით დავამტკიცებთ, რომ კრიზისიდან გამოსვლა შეგვიძლია და ამით ძალიან ბევრს გავახარებთ”.

ჩვენი ინფორმაციით, რეორგანიზაციაზე ჩაჩავას მინიშნება გუნდის გაახალგაზრდავებას ნიშნავს. ფრაზა იმის შესახებ, რომ უცხოელი ინვესტორის იმედი არ გამართლდა და “ვარსკვლავური გუნდის შენარჩუნება ქართულ რეალობაში საკმაოდ ძნელია”, ყველაფერზე მეტყველებს. 

სავარაუდოდ, “ტორპედოს” მაღალანაზრაურებადი მოთამაშეების უმრავლესობა დატოვებს. მაგრამ თავად კახა ჩხეტიანი გუნდის მიტოვებას არ აპირებს და დარჩენაზე ფიქრობს. ეს, მიუხედავად იმისა, რომ მას უნგრეთსა და აზერბაიჯანში მუშაობას სთავაზობდნენ.

რაც შეეხება მოთამაშეებს - ჯერ კიდევ იანვრიდანაა ცნობილი, რომ ბათუმის “დინამოში” როინ კვასხვაძეს და მამუკა კობახიძეს იწვევენ. კობახიძეს გადასვლა სურს, კვასხვაძის გადაწყვეტილება კი უცნობია. თუმცა უამბიციო გუნდში, სავარაუდოდ, არ გაჩერდება.

სამწუხაროდ, ვითარება ისეთია, რომ ძნელი სავარაუდოა, ასეთ გარემოში გუნდი ახლანდელი შემადგენლობითა და ამბიციებით გადარჩეს, რაც არა მხოლოდ “ტორპედოს” ქომაგებისთვისაა უსიამოვნო ამბავი, ამით ეროვნული ლიგაც ბევრს დაკარგავს.

ყოველდღიური სპორტული გაზეთი "ლელო"
1184
მკითხველის კომენტარები / 0 /
მსგავსი ამბები
რუბრიკის სხვა სიახლეები
;