ჩაძირული შუქურა, დინამო...

თბილისის "დინამოს" გასაჭირზე ერთი კვირის წინ ვთქვი. სამწუხაროდ, "დინამოზე" გაცილებით უარესად აქვთ საქმე იმ ტრადიციულ კლუბებს, დედაქალაქელებთან ერთად რომ წერდნენ ქართული ფეხბურთის ისტორიას.

უმაღლესი ლიგიდან დავიწყოთ, სადაც შავი დღეები უდგას ზღვისპირულ ფეხბურთს. წლევანდელ ჩემპიონატში უკანასკნელ ადგილებზე გავიდნენ ბათუმის "დინამო", ფოთის "კოლხეთი" და ქობულეთის "შუქურა". ქართული ფეხბურთის აკვანის დამრწეველი ფოთი ბეწვზე გადარჩა, ბათუმელები და ქობულეთელები კი გაისად მეორე ლიგაში გააგორებენ ბურთს. სირცხვილია, ესოდენ დიდი ტრადიციების მქონე კლუბები ამ დღეში რომ არიან!

უარესი სირცხვილია ლანჩხუთის "გურიას" მესამე ლიგაში გავარდნა. ლანჩხუთური კლუბი ჩვენი ფეხბურთის ისტორია და ბრენდია, გურია კი ოდითგანვე ითვლებოდა ტალანტების საბადოდ. არ ვუკარგავ თელავის "კახეთს" კარგ თამაშს და სამომავლოდ წარმატებებს ვუსურვებ...

გამწარებულმა გურულებმა საყვარელ გუნდს მწარე იუმორით გაჯერებული საგაზეთო ნეკროლოგი მიუძღვნეს და "გურია" მიცვალებულივით დაიტირეს. ამით, ალბათ, ყველაფერია ნათქვამი. სამწუხაროდ, ამ წუთას არანაირი პერსპექტივა არ ჩანს, რომ "გურია" ახლო წლებში ქართული ფეხბურთის ელიტას დაუბრუნდეს.

გასაგებია, რომ ევროპაშიც ბევრი ტრადიციული და დიდი ისტორიის მქონე კლუბი ჩავარდნილა ანალოგიურ გასაჭირში, მაგრამ მე მაინც ჩემი მტკივა. ძალიან მიჭირს იმ კლუბების წვალების ყურება, ქართული ფეხბურთის ისტორიას რომ ჭედდნენ.

ქართულ ბიზნესს რომ ფეხბურთი სულ ბუცებზე ჰკიდია, ამ კლუბების მაგალითებიდანაც ნათლად ჩანს. ასეთი ისტორიული გუნდების დამფინანსებელიც რომ არ ჩანს, სხვებს რისის იმედი უნდა ჰქონდეთ? ბიზნესმენებთან მეგობრობის გარეშე კი ჩვენი ფეხბურთის მომავალი სრულიად უპერსპექტივოა.

ძალიან მეეჭვება, თუნდაც მრავალმილიონიანმა სახელმწიფო ინექციებმა და ტრადიციულად, ცენტრალურ ბიუჯეტზე ჩამოკიდებამ განკურნოს ავადმყოფი ქართული ფეხბურთი.

სანამ ჩვენი კლუბები არ აღმოჩნდებიან ისეთი კერძო და ჭკვიანი ინვესტორების ხელში, რომლებიც ფეხბურთით ცხოვრობენ, იქამდე არაფერი გვეშველება. ფეხბურთის მოყვარულ სპონსორს საათივით გამართული მენეჯმენტით შეუძლია გააკეთოს ის, რაც ასე ძალიან აკლია ქართულ ფეხბურთს - ჩადებული ინვესტიცია ამოიღოს და კლუბისგან აქეთ ნახოს ფინანსური სარგებელი.

ორჯერ ორივითაა, რომ როდესაც კლუბში მენეჯმენტი მოიკოჭლებს, რაც არ უნდა მილიონები აყარონ სპონსორმა ან სახელმწიფომ, ეს ფული მუდამ იქნება ქარს გატანებული!

ჩვენთან რომ ყველაფერი უკუღმართად კეთდება და ფეხბურთში დასაქმებული ხალხის უმეტესობას მხოლოდ მსუყე თანხების თქვლეფა აინტერესებს, სწორედ ამიტომაა, ბიზნესმენებს ფეხბურთისკენ გახედვა რომ ეზარებათ.

როგორია, ჩადო გუნდში ინვესტიცია და იმის დეტალურად ცოდნის უფლებაც არ გქონდეს, ზუსტად რაში იხარჯება ეს ფული. დიახ, უმეტეს შემთხვევაში ზუსტად ასე ხდება ხოლმე - მოდის სპონსორი, დებს კლუბში ინვესტიციას, რომელიც არამიზნობრივად იხარჯება, გუნდის მმართველობაში ისადგურებს ნეპოტიზმი, არაა შედეგი და ბოლოს გულაცრუებული ინვესტორი კლუბს ტოვებს...

5840
მკითხველის კომენტარები / 2 /
joni
1
qartuli fexburti cud dgeshia warmoidgint raionebshi bavshvebs ar gaachniat normaluri moednebi gasaxdelsa da sashxapeze xo laparaki zedmetia arada shejibrebebs atareben shemodgomasa da gazafxulze siceveshi wvimasa da zogjer tovlchyapshic ki gayinul gatoshili bavshvebi ixdian an mindorze an manqanashi aset oirobebshi warnoidginet tqveni shvilebi galumpul gatalaxianebulebi taimebs shoris mindorze akankalebulebi isev ro unda gaagrdzelon tamashi aset pirobebshi rogor unda gaizardos fexburteli gmertma nu qnas ro daavadyofdnen arada amis didi shansia yvelas vtxov miaqciet yuradgeba bavshvta fexburts visac gevalebat gaisarjet da erti sheamowmet raionebshi mdgomareoba chumad aravis gafrtxilebis gareshe da iq naxavt ra xdeba da rogor
სპონსორი
0
საფეხბურთო კლუბს სჭირდება პატრონი ,რომელიც იყიდის კლუბს და ამუშავებს როგორც ბიზნესს ,სპონსორობა სხვა რამეა, სპონსორობა ვერ უშველის საქმეს და არც ერთ ბიზნესს საქართველოში არ აქვს გადასაყრელი ფული. შენ რომ მეპატრონე ხარ, თუ ფული არ გაქვს ,ადექი და მიყიდე ვისაც აქვს. შესთავაზონ მაგალითად , ფოთის პორტს იყიდოს კოლხეთი , კაპიკებად რომ იყიდა ამხელა ქონება და მილიონებს აკეთებს ,ერთ კლუბს ვერ მიხედავს ?
მსგავსი ამბები
რუბრიკის სხვა სიახლეები
;