ჩელსიმ დორტმუნდისგან პულიშიჩი იყიდა

1 ივლისიდან კრისტიან პულიშიჩი "ჩელსის" ფეხბურთელი იქნება. ფორმალურად, ის უკვე გახდა "არისტოკრატების" მოთამაშე, მაგრამ აშშ-ის ნაკრების (23 მატჩი, 9 გოლი) 20 წლის შემტევი მიმდინარე სეზონის დარჩენილ ნაწილს კვლავ "დორტმუნდში" გაატარებს (ოღონდ, უკვე იჯარით) და მერეღა მოირგებს "ჩელსის" მაისურას.

ლონდონური გრანდი "დორტმუნდს" 58 მილიონ ფუნტად (64 მილიონი ევრო/73 მილიონი დოლარი) შეუთანხმდა. 2015/16 წლების სეზონიდან მოყოლებული, პულიშიჩმა "დორტმუნდში" 115 მატჩი ჩაატარა, 15 გოლი გაიტანა და 24 საგოლე პასი შეასრულა. 

"ჩვენ ძალიან გვინდოდა მისი შენარჩუნება, მაგრამ ვიცოდით, რომ მისი ოცნება იყო პრემიერლიგაში თამაში. სწორედ ამის გამო ვერ შევძელით მასთან კონტრაქტის გაგრძელება, რომელიც 2020 წელს იწურებოდა", - ამბობს "დორტმუნდის" სპორტული დირექტორი მიხაელ ცორკი კლუბის ოფიციალურ ვებგვერდთან ინტერვიუში.

ცორკს არ ეშინია, რომ "ჩელსისთან" მიღწეული შეთანხმება სეზონის დარჩენილ ნაწილში პულიშიჩზე უარყოფითად იმოქმედებს:

"ეს არ იქნება პრობლემა. მას ძლიერი ხასიათი აქვს და დარწმუნებული ვარ, დარჩენილ თვეებში ყველაფერს გააკეთებს "დორტმუნდთან" ერთად თავისი სპორტული მიზნების მისაღწევად".

"ძალიან მოხარულები ვართ, რომ ევროპის ერთ-ერთი ყველაზე ნიჭიერი ახალგაზრდა ფეხბურთელი შევიძინეთ", - ეს უკვე "ჩელსის" დირექტორის, მარია გრანოვსკაიას სიტყვებია.

"მან უკვე აჩვენა თავისი კლასი "დორტმუნდში" გატარებულ პერიოდში და დარწმუნებულები ვართ, აქვს ის პოტენციალი, რომ მრავალი წლის განმავლობაში იყოს "ჩელსისთვის" უმნიშვნელოვანესი ფეხბურთელი. მოუთმენლად ველოდებით მას ზაფხულში "სტემფორდ ბრიჯზე", ხოლო მანამდე წარმატებებს ვუსურვებთ "დორტმუნდში".

ყოველდღიური სპორტული გაზეთი "ლელო"
662
მკითხველის კომენტარები / 0 /
მსგავსი ამბები
რუბრიკის სხვა სიახლეები
;