ჩელსის ახალი სტადიონი საფრთხეშია, - აბრამოვიჩი აპროტესტებს

რომან აბრამოვიჩი აღარ აპირებს "ჩელსის" ახალი სტადიონის მშენებლობას, რომელიც 1 მილიარდი ფუნტი უნდა დაჯდეს.

ოლიგარქი არ დახარჯავს ფულს იმ ქვეყანაში, რომელიც მას ყველანაირად უშლის ხელს. არადა, "სტემფორდ ბრიჯს" ნირი ბოლომდე უნდა ეცვალა...

აბრამოვიჩი: არ დავხარჯავ ფულს ქვეყანაში, სადაც ყველანაირად ხელს მიშლიან

რომან აბრამოვიჩს ბრიტანეთში ცხოვრების ვიზას აღარ აძლევენ და ეს იხსნება რუსეთის მმართველ რეჟიმთან მისი სიახლოვის გამო. აბრამოვიჩის მიმართ ამ ბოლო დროს წნეხი აშკარად იზრდება. ბევრს ავიწყდება, თუ რა შეცვალა მან ინგლისურ კლუბში. საქმე იქამდე მივიდა, რომ რუსული კაპიტალის გამო "ჩელსის" მეტსახელად "ჩელსკისაც" კი ეძახიან...

ისრაელის მედიამ უკვე გამოაცხადა, რომ აბრამოვიჩი აჩერებს ინგლისში თავისი აქტივების ხარჯვას და აპირებს, მეტი დრო გაატაროს მის ისტორიულ სამშობლოში, სადაც მას ძალიან აფასებენ...

"ჩელსის" ოფიციალურ განცხადებაში ნათქვამია, რომ 60-ათასიანი სტადიონის მშენებლობა დროებით შეჩერებულია არახელსაყრელი საინვესტიციო გარემოს გამო, მაგრამ რეალურად, ყველა კარგად ხვდება, რაშიც არის საქმე.

ბევრი ექსპერტი ვარაუდობს, რომ საქმე მხოლოდ ამჟამინდელ სტადიონზე 19 ათასი ახალი ადგილის დამატებით არ მორჩება. აბრამოვიჩი ამ დროისთვის კვლავ ელის "ოქროს ვიზას". ეს სპეციალური შეღავათია იმ უცხოელებისთვის, რომლებიც ინგლისში წელიწადში 2 მილიონზე მეტ ევროს ხარჯავენ.

რუსეთსა და დიდ ბრიტანეთს შორის ურთიერთობა ძალიან დაიძაბა მას შემდეგ, რაც სალსბერიში სერგეი სკრიპალი და მისი ქალიშვილი მოწამლეს. ბრიტანეთის მთავრობამ რუსეთი ამაში ღიად დაადანაშაულა.

აბრამოვიჩის მამა ებრაელია. ისრაელის პასპორტი კი მას ბრიტანეთში შესვლის საშუალებას მისცემს. ის უკვე ჩავიდა თელ-ავივში და აიღო ისრაელის მოქალაქეობის დამადასტურებელი ყველა დოკუმენტი.

ის კი არა, აბრამოვიჩმა იქ უკვე ტერიტორიაც შეიძინა. ეს არის საკმაოდ სოლიდური ფართობის მიწა ხმელთაშუა ზღვის ახლოს. ისრაელი კი, მოგეხსენებათ, ყველა ებრაელს უპრობლემოდ აძლევს ქვეყნის მოქალაქეობას.

ამ დროისთვის, "ჩელსიში" რამდენიმე საკითხია გასარკვევი. მაგალითად, კარგა ხანია, გუნდიდან წასვლას უწინასწარმეტყველებენ ანტონიო კონტეს, ვისაც "რეალში" ზინედინ ზიდანის ერთ-ერთ სავარაუდო შემცვლელად განიხილავენ.

რაც შეეხება "სტემფორდ ბრიჯს", იქ 41 631 ადგილია. მის შესაძლო რეკონსტრუქციაზე ზემოთ უკვე დავწერეთ, თუმცა ეს, ალბათ, აღარ მოხდება...

ყოველდღიური სპორტული გაზეთი "ლელო"
861
მკითხველის კომენტარები / 0 /
მსგავსი ამბები
რუბრიკის სხვა სიახლეები
;