ჩელსი-ბარსა. მსაჯის აღსარება წლების შემდეგ: შეიძლებოდა, ფინალში ჩელსი გასულიყო... [VIDEO]

მიმდინარე ჩემპიონთა ლიგის მერვედფინალში ერთ-ერთი გამორჩეული დაპირისპირება "ჩელსი"-"ბარსელონაა", რომლის პირველი რაუნდი დღეს "სტემფორდ ბრიჯზე" გაიმართება.

ეტყობა, სწორედ ამ ფაქტს დაუკავშირდა ნორვეგიელი არბიტრის, ტომ ჰენინგ ოვრებოს ერთგვარი აღსარება, რომელიც "დეილი მეილში" დაიბეჭდა...
2009 წელს მან "ჩელსისა" და "ბარსელონას" შორის ჩემპიონთა ლიგის ლონდონური ნახევარფინალი განსაჯა.

ეს მატჩი ისტორიაში შევიდა იმის გამოც, რომ გამოცდილმა რეფერიმ რამდენიმე ძალიან საკამათო გადაწყვეტილება მიიღო, კერძოდ, "ჩელსის" სასარგებლოდ... ოთხი(!) თერთმეტმეტრიანი არ დანიშნა.

საბოლოოდ, ფინალში "ბარსა" გავიდა. ტომ ჰენინგ ოვრებომ ახლაღა აღიარა, რომ "ჩელსის" ფანებისგან მიიღო წერილები, რომელშიც სიკვდილით ემუქრებოდნენ...

დასრულდა თუ არა ეს მატჩი, მთელი "სტემფორდ ბრიჯი" ფეხზე იდგა და აგინებდა არბიტრს, რომელმაც "ჩელსის" ოცნებები დაასამარა. ოვრებოს მიმართ სალანძღავი სიტყვები არც დიდიე დროგბამ დაიშურა, ვინც ოდითგანვე ცნობილი იყო თავისი მოზომილი ლექსიკით. ახლა, წლების შემდეგ, ოვრებომ აღიარა, რომ იმ დღეს შეცდომა დაუშვა.

"უნდა ვთქვა პირდაპირ, რომ ეს არ იყო ჩემი საუკეთესო დღე კარიერაში. კი, მე დავუშვი შეცდომა, მაგრამ ასევე შეიძლება შეეშალოს მწვრთნელს, ფეხბურთელს... ნამდვილად არ ვარ ამაყი იმ მატჩის გამო...

კარგად მესმის, რომ შეიძლებოდა, ფინალში "ჩელსი" გასულიყო, მე რომ არ მიმეღო ის გადაწყვეტილებები, რომელიც მივიღე. დიახ, შემეშალა, მაგრამ იმაზეც ვერავინ დადებს თავს, გავიდოდა თუ არა ლონდონური კლუბი ფინალში, სხვანაირად რომ მემოქმედა იმ ეპიზოდებში", - იხსენებს 51 წლის არბიტრი.

ოვრებოს პენალტი უნდა დაენიშნა იმ ეპიზოდში, როცა მიხაელ ბალაკის წინააღმდეგ სამუელ ეტო"ომ იუხეშა. ეს მხოლოდ ერთი ეპიზოდი იყო მრავალ საკამათო გადაწყვეტილებათა შორის.

"მახსოვს, ჯერ გასახდელში წავედი, მერე კი სასტუმროს შეცვლა გახდა საჭირო, რადგან კითხვის ნიშნის ქვეშ იყო ჩემი უსაფრთხოება. მივიღე მუქარის წერილები, რომელშიც სიკვდილით მემუქრებოდნენ", - ამბობს ოვრებო, რომელიც, შეიძლება ამ სკანდალური მატჩის გამოც, ვერ მოხვდა იმ 10 ევროპელ არბიტრს შორის, ვინც ფიფამ სამხრეთაფრიკული მუნდიალისთვის შეარჩია.

2010 წელს მან საერთაშორისო კარიერა დაასრულა და 3 წლის განმავლობაში მხოლოდ ნორვეგიის მთავარი ლიგის მატჩებს ემსახურებოდა...

ყოველდღიური სპორტული გაზეთი "ლელო"
1806
მკითხველის კომენტარები / 0 /
მსგავსი ამბები
რუბრიკის სხვა სიახლეები
;