ჩემპიონები, 'შავი ზღვის ბიჭები', ერთპიროვნულად დაწინაურდნენ

ხელბურთელ ვაჟთა საქართველოს ჩემპიონი "შავი ზღვის ბიჭები" ქვეყნის თასის წლევანდელი გათამაშების ფინალში თბილისის "პეგასს" დაუპირისპირდა.

სექტემბერში ეს ორთაბრძოლა დედაქალაქელების გამარჯვებით დასრულდა და მთავარ პრიზსაც ისინი დაეუფლნენ. გუშინ ოლიმპიურ სასახლეში მეტოქეთა გზები ისევ გადაიკვეთა - ამჯერად 2018-2019 წლების ეროვნული ჩემპიონატის მეხუთე ტურში.

ისინი ამ ეტაპამდე უდანაკარგოდ მოვიდნენ. სპეციალისტები უპირატესობას ზღვისპირელებს ანიჭებდნენ, რადგან მიაჩნიათ, რომ დღეს "ბათუმს" უფრო ძლიერი შემადგენლობა ჰყავს. არადა, "შავი ზღვის ბიჭებს" ამჟამად ტრავმების გამო ძირითადი შემადგენლობის ორი ხელბურთელი აკლიათ - ტალახაძე და ბერძენიშვილი.

მატჩი სტუმრების იერიშებით დაიწყო და მალე ისინი საგრძნობი უპირატესობით დაწინაურდნენ. თუმცა "პეგასმა" ტაიმის მიწურულისთვის ხუთბურთიანი ჩამორჩენა გაქვითა - 15:15. ბათუმელებმა მაინც შეძლეს პირველი ნახევრის თავის სასარგებლოდ დასრულება - 19:16. შესვენების შემდეგ ზღვისპირელები 3-4 ბურთის სხვაობით იყვნენ წინ. მართალია, პეგასელმა ნიკოლოზ კალანდაძემ ამ პაექრობაში 17 გოლი გაიტანა და ანგარიშში სხვაობა ისევ მინიმუმამდე დაიყვანა (31:32), მაგრამ ზღვისპირელებმა საქმე მაინც მიიყვანეს სასურველ დასასრულამდე. ამ გამარჯვებით "შავი ზღვის ბიჭებმა" 10 ქულას მოუყარეს თავი და ერთპიროვნულად მოექცნენ გათამაშების ცხრილის სათავეში.

ოლიმპიურ სასახლეში გუშინ, ასევე, დაძაბულად და დრამატულად წარიმართა წინა ჩემპიონატის პრიზიორების - ქუთაისელთა და თელაველთა მატჩი. შეგახსენებთ, რომ სეზონის დასაწყისში თელავის "იმედი" და სტუ გაერთიანდნენ. ამ მატებით გუნდი უფრო ძლიერი და დაბალანსებული გახდა. ჩემპიონატში ერთ-ერთ ფავორიტადაც მიიჩნევენ. თელაველები შეძლებენ თუ არა ქომაგთა იმედების გამართლებას, ეს ხვალ პირველი წრის ბოლო ტურში გამოჩნდება, როცა "შავი ზღვის ბიჭებს" დაუპირისპირდებიან.

გუშინდელი პაექრობის დასაწყისი კი "იმედი"-სტუ-ს კარგს არაფერს უქადდა, რადგან "ქუთაისი" პირველი წუთებიდანვე დაწინაურდა და 15 წუთის შემდეგ შეხვედრას 15:4-ს იგებდა. ტაიმის მიწურულს თელაველებმა შეძლეს ანგარიშში სხვაობის შემცირება და მაგრამ გუნდები შესვენებაზე რომ წავიდნენ, რიონისპირელები წინ იყვნენ 22:17. ამ უპირატესობის მიუხედავად, 42-ე წუთზე იობაშვილმა მაინც აღადგინა წონასწორობა - 25:25. გადამწყვეტი აღმოჩნდა საფინალო სასტვენამდე 2 წუთით ადრე კობახიძის გაძევება: დროის ამ მცირე მონაკვეთში ყორიაულმა (2), გოგალაძემ და დოლმაზაშვილმა ზედიზედ 4 ბურთი გაიტანეს და გამარჯვება მოუტანეს "თელავს", რომელიც ამ ორი ქულის წყალობით გათამაშების ცხრილში "პეგასს" გაუთანაბრდა.

საინტერესო რამ მოხდა სპორტის უნივერსიტეტის "სპორტუნსა" და წყალტუბოს "პრომეთეს" მატჩში. 46-ე წუთზე თბილისელთა მეკარე ხარაიშვილმა წითელი ბარათი მიიღო და კარში მის ნაცვლად მოედნის მოთამაშე გიორგი აბაშიძე ჩადგა. პაექრობის ბოლომდე დარჩენილ 15 წუთში ახალბედამ სულ 4 გოლი გაუშვა, მისმა გუნდმა კი ანგარიშში სხვაობა გაზარდა და პირველი გამარჯვება იზეიმა. "გორმა" "სამტრედიას" აჯობა და მეხუთე ადგილზე გადაინაცვლა.

პეგასი-ბათუმი 37:40
პეგასი: დიხამინჯია, კალანდაძე - 17, კუხალაშვილი - 6, ბაძაღუა - 5, გრიშიკაშვილი - 4, ზარნაძე - 4, ქათამაძე - 1, ჭანტურია.
ბათუმი: ტორონჯაძე, ხანდოლიშვილი, აბრამიშვილი - 9, გოგოლაძე - 8, სიმონია - 7, კოხრეიძე - 7, სურმავა - 6, თევზაძე - 3, წივწივაძე, ტიელიძე.

ქუთაისი-თელავი 32:35
ქუთაისი: ანდრიაძე, მაისურაძე, სტურუა - 11, ხაჟომია - 7, ფერაძე - 4, რუსტამოვი - 4, მერკვილაძე - 3, მათნაძე - 2, გამზარდია - 1, კობახიძე, ჯუღელი.
თელავი: ცინცაძე, ყორიაული - 8, ბაინაზიშვილი - 6, გოგალაძე - 5, ცისკარიშვილი - 4, დოლმაზშვილი - 3, მაისაშვილი - 3, ზ. იობაშვილი - 3, გავაშელიშვილი - 2, კორსანტია - 1, ბერაძე.

სპორტუნი-წყალტუბო 38:29
სპორტუნი: ხარაიშვილი, გ. იობაშვილი - 17, თიგიშვილი - 7, ჭელიძე - 5, აბაშიძე - 3, ცხვარაშვილი - 3, ჩაკვეტაძე - 2, გულდედავა - 1, ერისთავი, დელიბაშვილი, რ. ზურაბიანი.
წყალტუბო: სილაგაძე, მეტონიძე - 9, ჯიმშელეიშვილი - 9, გველესიანი- 7, ნიჟარაძე - 2, გ.აფხაძე - 1, მუკბანიანი, დარსაველიძე, კახაია.

გორი-სამტრედია 33:29
გორი: თითირაშვილი, დალაქიშვილი - 9, მჭედლიშვლი - 6, გუდურაშვილი - 5, ზუბიაშვილი - 5, ახალბედაშვილი - 4, ნიაზაშვილი - 3, ტარუაშვილი - 1, ზოზიაშვილი, ოსეფაშვილი, ხუბულური.
სამტრედია: შველიძე, ძნელაძე - 13, თევზაძე - 5, ადამია - 3, ხომერიკი - 3, დიდია - 2, ხელისუფალი - 2, აფრიდონიძე - 1, ნადირაძე ქავზინაძე, მანაგაძე.

თ მ ფ წ ბ ქ
ბათუმი 5 5 0 0 230:144 10
პეგასი 5 4 0 1 221:145 8
თელავი 5 4 0 1 178:150 8
ქუთაისი 5 3 0 2 205:140 6
გორი 5 2 0 3 169:218 4
სპორტუნი 5 1 0 4 160:208 2
სამტრედია 5 1 0 4 134:201 2
წყალტუბო 5 0 0 5 113:204 0
12 დეკემბერი. სპორტუნი - ბათუმი, ქუთაისი - გორი, სამტრედია - თელავი, პეგასი - წყალტუბო;
13 დეკემბერი. სამტრედია - სპორტუნი, წყალტუბო - გორი, ქუთაისი - პეგასი, ბათუმი - თელავი.

ყოველდღიური სპორტული გაზეთი "ლელო"
622
მკითხველის კომენტარები / 0 /
მსგავსი ამბები
რუბრიკის სხვა სიახლეები
;