[ჩემპიონთა ლიგა] დიდი კატალონიელი მადრიდის წინააღმდეგ... რეაქციები წილისყრის შემდეგ და ურთიერთშეხვედრების ისტორია

უეფას შტაბბინაში (ნიონი) ჩემპიონთა ლიგის 1/8 ფინალის წილისყრა გაიმართა. გუნდები ასე დაწყვილდნენ:

18 თებერვალი/11 მარტი
დორტმუნდი (გერმანია)-პარი სენ-ჟერმენი (საფრანგეთი)
ატლეტიკო (ესპანეთი)-ლივერპული (ინგლისი)

19 თებერვალი/10 მარტი
ატალანტა (იტალია)-ვალენსია (ესპანეთი)
ტოტენჰემი (ინგლისი)-ლაიპციგი (გერმანია)

25 თებერვალი/18 მარტი
ჩელსი (ინგლისი)-ბაიერნი (გერმანია)
ნაპოლი (იტალია)-ბარსელონა (ესპანეთი)

26 თებერვალი/17 მარტი
რეალი (ესპანეთი)-მანჩესტერ სიტი (ინგლისი)
ლიონი (საფრანგეთი)-იუვენტუსი (იტალია)

მატჩები თბილისის დროით 23:55 საათზე დაიწყება


ურთიერშეხვედრების ისტორია

დორტმუნდი (გერმანია)-პარი სენ-ჟერნმენი (საფრანგეთი)2: +0=2-0, 1:1

რეალი (ესპანეთი)-მანჩესტერ სიტი (ინგლისი) - 4: +2=2-0, 5-3

ატალანტა (იტალია)-ვალენსია (ესპანეთი) - არ უთამაშიათ

ატლეტიკო (ესპანეთი)-ლივერპული (ინგლისი) - 4: +1=2-1, 4:4

ჩელსი (ინგლისი)-ბაიერნი (გერმანია) - 4: +1=2-1, 9:8

ლიონი (საფრანგეთი)-იუვენტუსი (იტალია) - 4: +0-1-3, 2:5

ტოტენჰემი (ინგლისი)-ლაიპციგი (გერმანია) - არ უთამაშიათ

ნაპოლი (იტალია)-ბარსელონა (ესპანეთი) - არ უთამაშიათ


წილისყრის დასრულების შემდეგ კლუბების წარმომადგენლებმა და მწვრთნელებმა კომენტარები გააკეთეს. წყვილების უმეტესობა ისეთია, ფავორიტი რომ იკვეთება. ერთადერთი, რომელზეც ამას ვერ ვიტყვით, "რეალი"-"მანჩესტერ სიტია". ანუ, პეპ გვარდიოლა "რეალის" წინააღმდეგ, ან თუ გნებავთ დიდი კატალონიელი მადრიდის წინააღმდეგ - ეს უკვე აღარ არის მხოლოდ ფეხბურთი...

თუმცა ჩვენ ფეხბურთი უფრო გვაინტერესებს და იმედია, ეს ფეხბურთი მართლაც გვარიანი იქნება. ისევე, როგორც "დორტმუნდისა" და პსჟ-ის ჯახი, რომელშიც პარიზელთა დამრიგებელი თომას ტუხელი თავის ყოფილ კლუბს დაუპირისპირდება...

ერთი საინტერესო დეტალი - ჩემპიონთა ლიგის პლეი ოფში ყველაზე ახალგაზრდა (32 წლის) მწვრთნელი ჰყავს "ლაიპციგს". იულიან ნაგელსმანი 16 წლის იყო როცა მისი მომავალი მეტოქე "ტოტენჰემის" თავკაცმა ჟოზე მოურინიომ პირველად მოიგო ჩემპიონთა ლიგა (2004, "პორტუსთან" ერთად). ახლა კი კომენტარები:

პაველ ნედვედი ("იუვენტუსის" სპორტული დირექტორი): "ჩემი აზრით, არ გვაქვს აღელვების საფუძველი. წილისყრის შედეგები ჩვენთვის მისაღებია. მეტოქეს პატივს ვცემთ, თუმცა მტკიცედ გვჯერა, შევძლებთ შემდეგ ეტაპზე გასვლას. სწორედ ესაა ჩვენი მიზანი".

ჯენარო გატუზო ("ნაპოლის" მთავარი მწვრთნელი): "რა თქმა უნდა, "ბარსელონას" სიძლიერეს ყველა აღიარებს. ჩვენ უაღრესად რთული მოწინააღმდეგე შეგვხვდა, მაგრამ არ გვეშინია. "ნაპოლიმ" იცის, როგორ უნდა ითამაშოს ძლიერი გუნდების წინააღმდეგ".

თომას მიულერი ("ბაიერნის" ფეხბურთელი): "უდიდესი პატივისცემა ეკუთვნის ჩვენგან "ჩელსის". უნდა ვთქვა, რომ კარგი წლისყრა იყო. ყველაფერი უშუალოდ მინდორზე გამოჩნდება".

იულიან ნაგელსმანი ("ლაიპციგის" მთავარი მწვრთნელი): "ჩვენ რთული გამოცდა გველის. "ტოტენჰემი" ერთ-ერთი საუკეთესო გუნდია ევროპაში და მან ეს გასულ სეზონშიც დაამტკიცა. ძალიან რთული მატჩების მოლოდინში ვარ".

ჩიკი ბეგირისტაინი ("მანჩესტერ სიტის" სპორტული დირექტორი): "რეალი" საუკეთესოა! მან 13-ჯერ მოიგო ჩემპიონთა ლიგა. ჩვენ გვინდა ვიყოთ საუკეთესოები. ამიტომ, გამორჩეულ დუელს ველი. შესანიშნავი იქნება ისეთ სტადიონზე თამაში, როგორიცაა "სანტიაგო ბერნაბეუ".

ანტონიო პერკასი ("ატალანტას" პრეზიდენტი): "შეგვიძლია ჩავთვალოთ, რომ "ვალენსია" ჩვენთვის საშობაო საჩუქარია. ეს არის ძალიან ძლიერი გუნდი, რომელმაც ახლახან "აიაქსი" გამოთიშა ტურნირიდან. შანსებს თანაბრად ვაფასებ".

რუდი გარსია ("ლიონის" მთავარი მწვრთნელი): "იუვენტუსის" დონის გუნდის მიღება საკუთარ სტადიონზე - ეს დიდი პატივია. რა თქმა უნდა, უძლიერესი მოწინააღმდეგე შეგვხვდა. ჩვენ ბოლომდე ვიბრძოლებთ".

გილერმო ამორი ("ბარსელონას" დირექტორი): "ბარსელონა" პატივს სცემს ყველა მოწინააღმდეგეს. "ნაპოლი" ძლიერი გუნდია და ის ჩვენგან დაფასებას იმსახურებს. ყველაფერს გავაკეთებთ გამარჯვებისთვის".

კოკე ("ატლეტიკოს" ფეხბურთელი): "ეს იქნება ორი თვითმყოფადი გუნდის დაპირისპირება. შანსები? ვფიქრობ, შანსები თანაბარია. ყველაფერს მინდორზე ვნახავთ".

იურგენ კლოპი ("ლივერპულის" მთავარი მწვრთნელი): "ჩვენ ფანტასტიკური მოგონებები გვაკავშირებს მადრიდთან. კიდევ ერთხელ იქ ჩასვლა უბრალოდ დიდებული იქნება. ვფიქრობ, წინ შესანიშნავი მატჩები გველის".

კლემენტე ვილიავერდე ("ატლეტიკოს" დირექტორი): "შეგვიძლია ვთქვათ, რომ "ლივერპული" მსოფლიოს საუკეთესო გუნდია. ვნახოთ, რა ფორმაში ვიქნებით სეზონის დასკვნით ნაწილში. ერთი კი ვიცი, რომ "ლივერპულს" იოლი თამაშები არ ელოდება".

ლუსიენ ფავრი ("დორტმუნდის" მთავარი მწვრთნელი): "ძალიან რთული თამაშები იქნება. ჩვენ პატივს ვცემთ ერთმანეთს. გულშემატკივარმა კარგი ფეხბურთი უნდა ნახოს".

თომას ტუხელი (პსჟ-ის მთავარი მწვრთნელი): "ჩემთვის "დორტმუნდთან" შეხვედრა მეტად ამაღელვებელია. ვფიქრობ, ერთმანეთს ორი, ძალიან ძლიერი გუნდი უპირისპირდება".

2189
მკითხველის კომენტარები / 0 /
მსგავსი ამბები
რუბრიკის სხვა სიახლეები
;