ჩემპიონთა ლიგა. პლეი ოფი: როცა მეფის ეშინიათ... [VIDEO]

ჩემპიონთა ლიგის პლეი ოფის მშვენება უნდა გამხდარიყო "რეალი"-"პარი სენ-ჟერმენის" ორმატჩიანი დუელი. არავინ იცის, რა მოხდება პარიზში, მაგრამ მადრიდულმა "თრილერმა" აფიშა სრულად გაამართლა.

თამაში "რეალმა" უფრო აქტიურად დაიწყო. მადრიდელები უკეთესად მოქმედებდნენ მინდვრის ცენტრში, სტუმრები კი, ცოტა არ იყოს, დაბნეული ჩანდნენ. ჯერ მარსელომ სცადა პარიზელთა კარის აღება, მერე კი კრიშტიანო რონალდომ, მაგრამ ორივე შემთხვევაში დიდებულად ითამაშა სტუმართა მეკარე არეოლამ.

განსაკუთრებით აღსანიშნავია რონალდოს მომენტი. ის პრაქტიკულად პირისპირ იყო მეკარესთან, მაგრამ... პარიზელებმა კი, ფაქტობრივად, პირველივე რეალური შანსი გოლად აქციეს.

შესანიშნავად გაისარჯა ედინსონ კავანი, ადრიან რაბიომ კი ისე შეასრულა გადამწყვეტი დარტყმა, როგორც მაღალი კლასის ოსტატს შეეფერება.

...თავიდანვე გაჩნდა კითხვა ზინედინ ზიდანთან - რატომ არ იყო ძირითად შემადგენლობაში უელსელი ვარსკვლავი გარეთ ბეილი? პირველ ნახევარში "რეალის" ფლანგებს მეტი აქტიურობა მართებდათ. მოგვიანებით, "ზიზუ" კითხვას ღირსეულ პასუხს გასცემს...

ტაიმის ბოლომდე რონალდოს კიდევ მიეცა 100-პროცენტიანი შანსი, მერე იყო კავანის მომენტი, იქვე ბენზემას მზაკვრული დარტყმა, რომელიც არეოლამ გააუვნებლა.

...და "რეალის" 11-მეტრიანი, რომელიც საჯარიმოში ტონი კროოსის წაქცევას მოჰყვა. რონალდომ თავისი გასატანი მაინც გაიტანა. "რეალი" ტაიმის წაგებას არ იმსახურებდა.

მეორე ნახევრის დიდი ნაწილი ტაქტიკურ ბრძოლაში წარიმართა. გაგვაკვირვა უნაი ემერიმ, ვინც საყაიმო ანგარიშზე შეცვალა კავანი და მინდორზე ბელგიელი მცველი მუნიე შეუშვა. უფრო თამამი იყო შეცვლებში ზიდანი, როცა ბრძოლაში ბეილი, ასენსიო და ვასკესი შეუშვა.

სწორედ ასენსიო იქცა საღამოს ერთ-ერთ მთავარ მოქმედ პირად. ჯერ იყო და, მისი აქტიურობის წყალობით დუბლი შეასრულა რონალდომ, მერე კი მარსელოს უპასა და უძლიერესი დარტყმით ანგარიში 3:1 გახდა.

არავინ იცის, რატომ შეეშინდა ემერის, მაგრამ ფაქტია, რომ მოიგო გუნდმა, ვინც უფრო თამამად ითამაშა, მოიგო მწვრთნელმა, ვინც თამამი შეცვლები გააკეთა. პსჟ-ს სათადარიგოთა სკამზე კი დარჩნენ ანხელ დი მარია და ხავიერ პასტორე...

პირველი ნახევარი საათი საკმარისი აღმოჩნდა "ლივერპულისთვის", რომ პორტუში ქვა ქვაზე არ დაეტოვებინა. ჰეთ-თრიკი შეასრულა სადიო მანემ. ასე რომ, "ენფილდის" მატჩი ფორმალობად იქცა.



ფაქტები

* მაიკლ ოუენის, იოსი ბენაიუნისა და ფელიპე კოუტინიოს შემდეგ სადიო მანე "ლივერპულის" მეოთხე ფეხბურთელია, ვინც ჩემპიონთა ლიგაში ჰეთ-თრიკი შეასრულა.

* ჩემპიონთა ლიგის მიმდინარე გათამაშებაში ყველაზე მეტი - 28 გოლი "ლივერპულმა" გაიტანა, მათ შორის, 25 - ბოლო 5 მატჩში.

* კრიშტიანო რონალდო ერთადერთი ფეხბურთელია, ვინც ჩემპიონთა ლიგის ზედიზედ მე-7 სეზონში შეძლო ერთ ტურნირში 10 და მეტი გოლის გატანა. სხვა ფეხბურთელებმა ეს მაქსიმუმ ორ-ორჯერ მოახერხეს.

* კრიშტიანო რონალდო პირველი ფეხბურთელია ჩემპიონთა ლიგის ისტორიაში, ვინც ამ ტურნირში, ერთი კლუბის შემადგენლობაში, 100 გოლი გაიტანა.

* მოჰამედ სალაჰი "ლივერპულის" პირველი ფეხბურთელია ლუის სუარესის (31 გოლი, 2013/14 წლების სეზონში) შემდეგ, ვინც ერთი სეზონის ყველა ტურნირში ერთად 30 გოლი გაიტანა.

* პსჟ-მა მიმდინარე სეზონის ყველა ტურნირში 39 მატჩში 127 გოლი გაიტანა - ყველაზე მეტი ტოპ 5-ის კლუბებს შორის.

რეალი-პსჟ 3:1
გოლები: 0:1 რაბიო (33), 1:1 რონალდო (45-პენ), 2:1 რონალდო (83), 3:1 მარსელო (86)

რეალი (4-3-3): ნავასი - ნაჩო, ვარანი, რამოსი, მარსელო - მოდრიჩი, კროოსი, კაზემირო (79. ლუკასი) - ისკო (79. ასენსიო), რონალდო, ბენზემა (68. ბეილი).
პსჟ (4-3-3): არეოლა - დანი ალვეში, მარკინიოსი, კიმპემბე, ბერჩიჩე - ვერატი, ლო სელსო (84. დრაქსლერი), რაბიო - მბაპე, ნეიმარი, კავანი (66. მუნიე).

პორტუ-ლივერპული 0:5
გოლები: 0:1 მანე (25), 0:2 სალაჰი (29), 0:3 მანე (53), 0:4 ფირმინო (69), 0:5 მანე (85)

პორტუ (4-2-3-1): ჟოზე სა - პერეირა, რეიესი, მარკანო, ტელიესი - სერჟიო ოლივეირა, ერერა - მარეგა, ოტავიო (46. კორონა), ბრაჰიმი (62. მაჯიდი) - სოარეში (74. პასიენსია).

ლივერპული (4-3-3): კარიუსი - ალექსანდერ-არნოლდი (79. გომესი), ლოვრენი, ვან დაიკი, რობერტსონი - მილნერი, ჰენდერსონი (75. მატიპი), ვეინალდუმი - სალაჰი, მანე, ფირმინო (80. ინგსი).

ყოველდღიური სპორტული გაზეთი "ლელო"
1262
მკითხველის კომენტარები / 1 /
mzirali
0
შეუდარებლი იყო რეალი და ის ინტრიგა რომელიც მათ შესთავზეს. ვფიქრობ პსჟ მწვრთნელმა შეცდომა დაუშვა როცა სცადა ანგარიის შენარჩუნება, მაგრამ მას დაავიწყდა რომ რეალას რონალდუ ყავსსს გუნდის ლლიდერი.... და კიდევ ფინალი ჩემპიონთა ლიგის გაიმარტება მადრიდში და რეალისტვის უმნიშვნელოვანესია ფინალში გასვლა. ახლა წარმოიდგინეთ რომ რელაი და ბარსა ხვდებიან ფინალშიიი....
მსგავსი ამბები
რუბრიკის სხვა სიახლეები
;