ჩემპიონთა ლიგა. ფინალის რიმეიქი და ინგლისური ჯახი

ჩემპიონთა ლიგა

3 და 11 აპრილი
სევილია-ბაიერნი
იუვენტუსი-რეალი

4 და 10 აპრილი
ბარსელონა-რომა
ლივერპული-სიტი

რა თქმა უნდა, ბედისწერამ ძალიან საინტერესოდ განსაჯა. რად ღირს თუნდაც ჩემპიონთა ლიგის შარშანდელი ფინალის რიმეიქი - "იუვენტუსისა" და "რეალის" ჯახი, რომელიც განსაკუთრებულ სანახაობასა და ინტრიგას გვპირდება.

ან თუნდაც ინგლისური დაპირისპირება "ლივერპულსა" და "მანჩესტერ სიტის" შორის - იურგენ კლოპისა და პეპ გვარდიოლას ორი ზეშემტევი გუნდის შეხლა. მოკლედ, წინ დიდი ამბები გველოდება, მანამდე კი ვნახოთ, ვინ როგორ შეაფასა წილისყრა:

პაველ ნედვედი ("იუვენტუსის" ვიცე-პრეზიდენტი): "რეალმა" ბოლო სამ წელიწადში ორჯერ მოიგო ჩემპიონთა ლიგა და ეს ყველაფერზე მეტყველებს. მათ ჰყავთ დიდებული ფეხბურთელები და ცხადია, დიდი სირთულეებიც გველის წინ. მით უმეტეს, დისკვალიფიცირებულები არიან ბენატია და პიანიჩი, მაგრამ ჩვენ გვჯერა "იუვენტუსის". დადგა დრო, გადამწყვეტი სიტყვა თქვას დიბალამ".

იურგენ კლოპი ("ლივერპულის" მთავარი მწვრთნელი): "ჩვენ მეტოქეს ორჯერ შევხვდით მიმდინარე პრემიერლიგაში - ერთხელ მოვიგეთ და ერთხელ წავაგეთ. ჩემი აზრით, "სიტისთვის" ჩვენ არ ვიყავით საუკეთესო ვარიანტი ამ წილისყრაში. დანარჩენი მინდორზე გამოჩნდება".

ფრანჩესკო ტოტი ("რომას" დირექტორატის წევრი): "ბარსელონა" ბრწყინვალე გუნდია, მაგრამ მაქვს წინათგრძნობა, რომ მომავალ ორ მატჩში კარგად ვითამაშებთ. ეს ჩვენთვის ძალიან მნიშვნელოვანი მომენტია".

იუპ ჰაინკესი ("ბაიერნის" მთავარი მწვრთნელი): "მე ძალიან კარგად ვიცნობ "სევილიას". ეს არის უაღრესად სახიფათო გუნდი. მათ ეს დაამტკიცეს "მანჩესტერთან" გამართულ შეხვედრებში. ასე რომ, 100 პროცენტით მიგვიწევს დახარჯვა".

ემილიო ბუტრაგენიო ("რეალის" წარმომადგენელი): "ჩვენ დიდი და მენტალურად ძლიერი გუნდის წინააღმდეგ უნდა ვითამაშოთ. "იუვე" შესანიშნავ ფორმაშია და ჩვენ სრული საფუძველი გვაქვს, დაველოდოთ საფეხბურთო ზეიმს. ეს უძლიერესი გუნდი გამოვთიშოთ ჩემპიონთა ლიგიდან".

დანიელე დე როსი ("რომას" კაპიტანი): "შეიძლება, "ბარსელონა" ახლა ჩვენზე უკეთესი გუნდია, მაგრამ ჩვენ ყველაფერს გავაკეთებთ იმისთვის, რომ დუელი ჩვენს სასარგებლოდ დასრულდეს. დიდი მატჩების მოლოდინში ვართ".

ვინჩენცო მონტელა ("სევილიას" მთავარი მწვრთნელი): "ჩვენ ვიბრძოლებთ ბოლომდე. "ბაიერნის" ძალაზე ბევრს არ ვილაპარაკებ, ეს ისედაც ყველამ კარგად იცის. ჩვენ ჩვენი ფეხბურთი უნდა ვითამაშოთ".

ევროპალიგა

5 და 12 აპრილი
ლაიპციგი-მარსელი
ატლეტიკო-სპორტინგი
ლაციო-ზალცბურგი
არსენალი-ცსკა

ყოველდღიური სპორტული გაზეთი "ლელო"
1106
მკითხველის კომენტარები / 0 /
მსგავსი ამბები
რუბრიკის სხვა სიახლეები
;