ჩემპიონთა ლიგა. ქართველებთან მატჩი ნამდვილი სპექტაკლი იქნება, 'დინამოს' ზაგრებში ელიან 

18-19 ოქტომბერს წყალბურთელ ვაჟთა ჩემპიონთა ლიგაზე მე-2 ტურის ორთაბრძოლები გაიმართება. თითქმის ყველა ფავორიტმა სეზონი გამარჯვებით დაიწყო.

დღეს და ხვალ უფრო საინტერესო პაექრობების მოწმენი გავხდებით, რადგან მატჩების უმეტესობაში კონკურენტები დაუპირისპირდებიან ერთმანეთს. 

ჩვენ ყველაზე მეტად, ცხადია, ხვალ ზაგრებში გასამართავი მატჩი გვაინტერესებს - „მლადოსტი“ თბილისის „დინამოს“ უმასპინძლებს. პირველ ტურში ორივე გუნდი სტუმრად დამარცხდა: ხორვატებმა ბუდაპეშტში OSC-სთან წააგეს 10:13, ხოლო „დინამომ“ ტერასაში დათმო (5:9) ორთაბრძოლა. 

ხვალინდელ პაექრობაში „მლადოსტი“ ფავორიტია, რადგან საუკეთესო წყალბუთელებითაა დაკომპლექტებული. ფინალურ ჯგუფში მოსახვედრად მასპინძლები აუცილებლად მოსაგებად იბრძოლებენ. უცხოელი სპეციალისტების აზრით, ხორვატებს იოლი გასეირნება არ ელით, რადგან „დინამომ“ ესპანურ სასტარტო შეხვედრაში დაამტკიცა, რომ, დებიუტანტობის კვალობაზე, ჩემპიონთა ლიგის დონეზეც შეუძლიათ სათანადოდ თამაში.

გუშინ ზაგრებში ორივე გუნდის წარმომადგენლებმა პრესკონფერენცია გამართეს. გთავაზობთ ამონარიდებს ჟურნალისტებთან შეხვედრიდან:

რევაზ ჩომახიძე, „დინამოს“ მთავარი მწვრთნელი: „წინ ძალიან რთული ორთაბრძოლა გველის, რადგან „მლადოსტი“ გამოცდილი მოთამაშეებითაა დაკომპლექტებული, შესაძლოა ითქვას, ჩემპიონთა ლიგაზე - უძლიერესი ცენტრალური თავდამსხმელებით. ზაგრებში თამაში არასოდეს არის ადვილი, მაგრამ ამ შეხვედრაში გარკვეული მიზნები გვაქვს. იმედია, შევძლებთ, ქომაგებს საინტერესო მატჩი შევთავაზოთ“. 

მარკო ელაჩა, „დინამოს“ წყალბურთელი: „ეს არის ჩვენი პირველი წელი ჩემპიონთა ლიგაში. დინამოელთა უმრავლესობას მსგავს შეჯიბრებებში არასდროს უასპარეზია, ამიტომ გვჭირდება დრო, რომ ამ დონეზე თამაშს შევეჩვიოთ.

„მლადოსტმა“ ბოლო წლებში ძალიან კარგი გუნდი ჩამოაყალიბა, ბევრი გამოცდილი წყალბურთელი ჰყავს, ამიტომ ზაგრებში მის წინააღმდეგ პაექრობა ჩვენთვის იოლი არ იქნება. თუმცა უბრძოლველად არაფერს დავთმობთ, ყველაფერს გავაკეთებთ, რომ მასპინძლებს სირთულეები შევუქმნათ. რაც შემეხება მე, ბედნიერი ვარ, რომ სამშობლოს ვეწვიე (ელაჩა წარმოშობით ხორვატია - ვ.დ.) მართალი გითხრათ, მრავალი წლის შემდეგ ჩემი პირველი კლუბის წინააღმდეგ თამაში გამიჭირდება, მაგრამ თავს არ დავზოგავ. დარწმუნებული ვარ, მაყურებლები ამ ორთაბრძოლისგან სიამოვნებას მიიღებენ“. 

ზორან ბაჟიჩი, „მლადოსტის“ მთავარი მწვრთნელი: „ჩემპიონთა ლიგის მეორე თამაშში ყველაფერს გავაკეთებთ იმისთვის, რომ შინ გამარჯვება მოვიპოვოთ. ჩვენ მზად ვართ, „დინამოს“ წინააღმდეგ კარგი და საინტერესო მატჩი გავმართოთ, ჩვენი გულშემატკივრების სურვილი დავაკმაყოფილოთ - სამი ქულა მოვიპოვოთ. ქართველ წყალბურთელებთან შეხვედრა იქნება ნამდვილი სპექტაკლი და რეპეტიცია მესამე ტურში იტალიურ „პრო რეკოსთან“ შეხვედრის წინ“. 

კოსმინ რადუ, „მლადოსტის“ მოთამაშე: „მონდომებით ვემზადებით ჩემპიონთა ლიგაში ჩვენი პირველი საშინაო მატჩისთვის. ბუდაპეშტში მარცხისა და იმედგაცრუების შემდეგ მზად ვართ, შესაძლებლობების მაქსიმუმი გავიღოთ და სამი ქულა მოვიპოვოთ, რომ დარწმუნებული ვიყოთ, რეგულარული პირველობის მერე ფინალურ ჯგუფში მოვხვდებით“... 

აქვე გთავაზობთ ჩემპიონთა ლიგის მეორე ტურის კალენდარს: 

18 ოქტომბერი. A ჯგუფი. სპლიტის (ხორვატია) „იადრანი“-ბერლინის (გერმანია) „შპანდაუ-04“, ჰერცეგ ნოვის (მონტენეგრო) „იადრანი“-ზოლნოკის (უნგრეთი) „დოჟა“, დუბროვნიკის (ხორვატია) „იუგი“-ბარსელონის (ესპანეთი) „ზოდიაკი“, ათენის (საბერძნეთი) „ოლიმპიაკოსი“-ყაზანის (რუსეთი) „სინთეზი“. 

19 ოქტომბერი. B ჯგუფი. ბუდაპეშტის (უნგრეთი) OSC- ჰანოვერის (გერმანია) „ვასპო-98“, ბერგამოს (იტალია“ „პრო რეკო“-ტერასას (ესპანეთი) „ტერასა“, ბუდაპეშტის (უნგრეთი) „ფერენცვაროში-ტელეკომი“-მარსელის (საფრანგეთი) „მარსელი“. ზაგრების (ხორვატია) „მლადოსტი“-თბილისის (საქართველო) „დინამო“. 

ყოველდღიური სპორტული გაზეთი "ლელო"
325
მკითხველის კომენტარები / 0 /
მსგავსი ამბები
რუბრიკის სხვა სიახლეები
;