ჩემპიონთა ლიგა. 1/2 ფინალი: 'ბაიერნი' 'რეალი - ვრცელი მიმოხილვა [VIDEO]

ბაიერნი-რეალი 1:2
გოლები: 1:0 კიმიხი (28), 1:1 მარსელო (44), 1:2 ასენსიო (57)

ჩემპიონთა ლიგის პირველ, გერმანულ ნახევარფინალში მიუნხენის "ბაიერმა" მადრიდის "რეალს" უმასპინძლა და 1:2 დამარცხდა. კარგი თამაში გამოვიდა. მძიმე ბრძოლას თან ლამაზი საფეხბურთო ელემენტებიც ერთვოდა...

"ბაიერნმა" ჯერ კიდევ ამ მატჩამდე დაკარგა არტურო ვიდალი და დავიდ ალაბა. უშუალოდ შეხვედრის მიმდინარეობისას კი - არიენ რობენი და ჟერომ ბოატენგი. ახლა საკითხავი ისაა, შეძლებს თუ არა გერმანიის ნაკრების ძირითადი მცველი მსოფლიოს ჩემპიონატზე თამაშს?..

ფეხბურთი ძალიან ხშირად ემორჩილება გარკვეულ კანონზომიერებას. ასე იყო ამჯერადაც. რაში უნდა ვეძებოთ "ბაიერნის" მარცხის მთავარი მიზეზი? რა თქმა უნდა, ტრავმები, ბუნდესლიგაში უპირობო ჰეგემონობა და ზოგიერთი ფეხბურთელის შედარებით დაბალი სათამაშო კლასის ფაქტორი სათვალავშია ჩასაგდები, მაგრამ ყველაზე მეტად "ბაიერნი" მაინც საგოლე მომენტების გამოყენების ძალიან დაბალმა პროცენტმა დააზარალა.

კი ბატონო, შესანიშნავად ითამაშა "რეალის" კოსტარიკელმა კარის დარაჯმა კეილორ ნავასმა, მაგრამ ვერც ის უშველიდა "სამეფო კლუბს", "ბაიერნის" შემტევებს ცოტა მეტი სიზუსტე რომ გამოეჩინათ. ძნელად დასავიწყებელია ეპიზოდი, როცა თომას მიულერს... რობერტ ლევანდოვსკიმ არ გაატანინა. დიახ, ასე იყო...

"რეალმა"მეტი სათამაშო კლასი გამოავლინა და უფრო ყაირათიანად გამოიყენა საგოლე მომენტები. ანგარიში კი "ბაიერნმა" გახსნა. მარსელოს შეცდომის შემდეგ "რეკორდმაისტერი" ჯოშუა კიმიხმა დააწინაურა.

"რეალმა" პირველივე გააზრებული შეტევის შემდეგ გაათანაბრა. მარსელომ კიმიხის გოლის ეპიზოდში დაშვებული შეცდომა გამოისყიდა, როცა მისი უძლიერესი დარტყმის შემდეგ ბურთი მეკარისგან მარცხენა დაბალ კუთხეში შევარდა.

"რეალმა" შეცვლაზე შესული მარკო ასენსიოს გოლის წყალობით მოიგო. მიუტევებელი შეცდომა დაუშვა რაფინიამ, რის შემდეგაც სწრაფი კონტრშეტევა განვითარდა და ლუკას ვასკესმა მეკარესთან პირისპირ დატოვა ასენსიო - დანარჩენი ტექნიკის საქმე იყო. ზინედინ ზიდანმა კი ერთხელაც დაამტკიცა, რომ ცვლილებების დიდოსტატია.

"ბაიერნი" ძირითადად ფრანკ რიბერის გარღვევების იმედზე იყო, რასაც უშედეგო ჩაწოდებები ან კუთხურები მოსდევდა. ბოლოს იუპ ჰაინკესის ბიჭებს ძალა აღარ შერჩათ გადამწყვეტი შტურმისთვის.

"რეალმა" ფავორიტის სტატუსი განიმტკიცა, მაგრამ ვერ ვიტყვით, რომ ყველაფერი "ალიანც არენაზე" გადაწყდა. ბოლოს და ბოლოს, წინ "იუვენტუსის" მადრიდული გმირობის მაგალითი გვაქვს...



ფაქტები

* "რეალი" პირველი გუნდი გახდა, ვინც ჩემპიონთა ლიგის ისტორიაში 150-ე მატჩი მოიგო.

* "რეალმა" ჩემპიონთა ლიგაში "ბაიერნს" ყველაზე მეტი, 3 საგარეო თამაში მოუგო და სამივე - "ალიანც არენაზე".

* ჩემპიონთა ლიგის მიმდინარე გათამაშებაში ლუკას ვასკესზე (12) მეტი საგოლე პასი მხოლოდ ლიონელ მესიმ (18) გააკეთა.

* ჩემპიონთა ლიგის წინა სეზონის შემდეგ არც ერთ ფეხბურთელს არ გაუტანია იმაზე მეტი გოლი შეცვლაზე (3), ვიდრე მარკო ასენსიოს. ანალოგიური მაჩვენებელი აქვთ ალვარო მორატასა ("ჩელსი") და ვისამ ბენ იედერს ("სევილია").

* მარსელომ ჩემპიონთა ლიგის მიმდინარე გათამაშებაში 3 გოლი გაიტანა - უფრო მეტი, ვიდრე წინა ექვს ტურნირში ერთად.

ყოველდღიური სპორტული გაზეთი "ლელო"
920
მკითხველის კომენტარები / 0 /
მსგავსი ამბები
რუბრიკის სხვა სიახლეები
;