ჩემპიონთა ლიგა. 1/2 ფინალი: 'რომა' 4:2 'ლივერპული' - ვრცელი მიმოხილვა [VIDEO]

რომა-ლივერპული 4:2
პირველი მატჩი 2:5

გოლები: 0:1 მანე (9), 1:1 მილნერი (15-საკ. კარში), 1:2 ვეინალდუმი (25), 2:2 ჯეკო (52), 3:2 ნაინგოლანი (86), 4:2 ნაინგოლანი (90+4-პენ)

ფინალი
შაბათი, 26 მაისი, კიევი
რეალი-ლივერპული

"ლივერპული" ჩემპიონთა ლიგის ფინალშია, სადაც მისი მეტოქე "რეალი" იქნება, რომელსაც 1981 წელს მოუგო (1:0) ყველაზე პრესტიჟული ევროტურნირის ფინალში. იურგენ კლოპის გაწვრთნილმა გუნდმა სეზონის გადამწყვეტ მატჩში თამაშის უფლება მოიპოვა იტალიის დედაქალაქის მთავარ არენაზე, სადაც 1984 წელს ჩემპიონთა თასის ფინალში "რომა" პენალტების სერიაში დაამარცხა.

ეს იქნება "ლივერპულის" მე-8 ფინალი (სულ 5 გამარჯვება, ბოლო ფინალი 2007 წელს, 1:2 "მილანთან"). მერსისაიდელთა უკანასკნელი ევროტრიუმფი 2005 წელს იყო, როცა რაფა ბენიტესის თავკაცობით სასწაული ფინალი მოუგეს "მილანს" - პირველი ტაიმის შემდეგ 0:3-ს აგებდნენ, ძირითადი დრო 3:3 დასრულდა, პენალტების სერიაში კი 3:2 გაიმარჯვეს.

...დავუბრუნდეთ გუშინდელ მატჩს. ვიხილეთ ძალიან გახსნილი და გოლუხვი თამაში. რა თქმა უნდა, ვერ აღვწერთ გუნდების მიერ შექმნილი სახიფათო მომენტების ნახევარსაც, რადგან ამან გაზეთის მთელი გვერდი შეიძლება წაიღოს...

დავიწყებთ კი იმით, რომ "ლივერპულმა" სწრაფი გოლი შეაგდო. არადა, "რომა" უტევდა და თავად ცდილობდა გატანას... და აქ რაჯა ნაინგოლანმა უპატიებელი შეცდომა დაუშვა - გუნდი "გაწყვიტა", რობერტო ფირმინომ მოიგდო ბურთი და შესანიშნავი გადაცემა გაუკეთა სადიო მანეს, ვისაც გატანა არ გასჭირვებია - 0:1.

"რომა" არ შედრკა, მაგრად შეუტია და მალევე გაათანაბრა. დეიან ლოვრენმა უხერხულად ამოიტანა ბურთი, რომელიც თავში მოხვდა ჯეიმს მილნერს და... ინგლისელთა კარში შევარდა.

როცა პირველი ტაიმის შუაში ჟორჟინიო ვეინალდუმმა "ლივერპული" დააწინაურა, ორმატჩიანი დუელის ბედი ყველას გადაწყვეტილი ეგონა, მაგრამ ასე არ ფიქრობდა "რომა". მეორე ტაიმის სტარტზე ედინ ჯეკომ ანგარიში გაათანაბრა და კვლავ გამოჩნდა შუქი გვირაბის ბოლოს...

მთავარი მოვლენები მატჩის ბოლოსკენ განვითარდა. 86-ე წუთზე ნაინგოლანმა ალექსანდრ კოლაროვის ზუსტი პასი უძლიერესი დარტყმით გოლად აქცია. ეს კიდევ არ იყო დასასრული. უკვე კომპენსირებულ დროში 11-მეტრიანი ზუსტად შეასრულა იმავე ნაინგოლანმა და იქვე საფინალო სასტვენის ხმაც გაისმა. "რომამ" 4:2 მოიგო და ერთი გოლი დააკლდა დამატებით დრომდე.

და ბოლოს ესეც უნდა ვთქვათ - მსაჯი ადამიანია და მას აქვს შეცდომის უფლება. ეს გასაგებია და ამაზე არავინ დავობს, მაგრამ ისმის კითხვა - როდემდე?! "რომას" სასწაულამდე მხოლოდ ერთი გოლი დააკლდა და ეს გოლი შეიძლებოდა, ყოფილიყო, მატჩის სლოვენიელ არბიტრ დამირ სკომინას "ლივერპულის" მცველ ტრენტ ალექსანდრ-არნოლდის მიერ საჯარიმოში ხელით თამაში რომ შეენიშნა. პრინციპში, ყველაფერი იმდენად ნათელი იყო, ამას მსაჯის მახვილი თვალი საერთოდ არ სჭირდებოდა, მაგრამ...

ფეხბურთს სჭირდება სიახლეები და თუნდაც ვიდეორეფერი ყველა დონეზე! მანამდე კი ძალიან ხშირად მოუწევს საფეხბურთო სამყაროს აბსურდულ გადაწყვეტილებებთან შეგუება...

ყოველდღიური სპორტული გაზეთი "ლელო"
950
მკითხველის კომენტარები / 0 /
მსგავსი ამბები
რუბრიკის სხვა სიახლეები
;