ჩემპიონთა ლიგა.1/4ფინალი: ბრიტანული მოტივებით დამშვენებული ღამე 'ენფილდზე' - 'ბარსა' თავის სტილში [VIDEO]

ლივერპული-მანჩესტერ სიტი 3:0
გოლები: 1:0 სალაჰი (12), 2:0 ოქსლეიდ-ჩემბერლენი (21), 3:0 მანე (31)

ბარსელონა-რომა 4:1
გოლები: 1:0 დე როსი (38-საკ. კარში), 2:0 მანოლასი (55-საკ. კარში), 3:0 პიკე (59), 3:1 ჯეკო (80), 4:1 ლუის სუარესი (87)

დიდებული იყო "ენფილდი"! დიდებული იყო "ლივერპული"! "სიტის" აქვს ბევრი ფული, მაგრამ არ აქვს და ვერც ექნება ის, რაც აქვს "ლივერპულს". ამ "რაღაცას" "ენფილდის" ატმოსფერი ჰქვია. ერთხელაც დამტკიცდა, რომ თანამედროვე ფეხბურთში ყველაფერს ფულით ვერ იყიდი.

დიდებული მატჩი იყო, ოღონდ - ერთი გუნდის შესრულებით. იურგენ კლოპმა მიწაზე დაუშვა პეპ გვარდიოლა (გერმანელმა კატალონიელ კოლეგასთან 12 უშუალო დაპირისპირებაში მეშვიდე თამაში მოიგო). "ტიკი-ტაკამ" კი კრახი განიცადა. ჩვენ ვნახეთ, რომ ის უკვე შესწავლილი და გაშიფრულია. თუ არ გჯერათ, თუნდაც ალექსანდერ-არნოლდს ჰკითხეთ...

"ლივერპული" მაგრად დაბრუნდა ჩემპიონთა ლიგაში. ის იქ უკვე იყო ამ ბოლო ხანს, მაგრამ ეს არ იყო ის, რასაც ქომაგები ითხოვდნენ. და აი, ეს ნამდვილი ზეიმი შედგა მეტოქესთან, რომელიც, ალბათ, "ევერტონის" შემდეგ ყველაზე საძულველია "კოპებისთვის". თუნდაც, ტრადიციის ამბავში.

თამაში პირველივე ტაიმში მორჩა. "ლივერპულმა" მეტოქე გაგლიჯა. მატჩის მშვენება კი, უდავოდ, ალექს ოქსლეიდ-ჩემბერლენის გოლი იყო, როგორც ამ თამაშის მთელი ხასიათის გამოხატულება.

არავინ ელოდა სტუმართა ასეთ უმწეობას. "სიტის" ხშირად აკლდება ხოლმე ხასიათის სიმტკიცე გადამწყვეტ შეხვედრებში და ამჯერადაც ასე მოხდა. ფეხბურთს არც ბურთის უმეტესად ფლობა იგებს და არც - მატჩის მსვლელობისას გაკეთებული პასების რაოდენობა. ეს უბრალო სტატისტიკაა, რომელსაც დღეს ზედმეტ ყურადღებას აქცევენ.

კლოპმა და მისმა გუნდმა კი დაამტკიცეს, რომ მოგება შეიძლება ჟინით, უზომო მონდომებით და იმ ფეხბურთით, რომელიც, მართალია, მოდერნიზებულია, მაგრამ მასში მაინც ურევია ძველინგლისური მოტივები.

გვარიანი ალიყური მოხვდა "ქალაქელთა" ლიდერ კევინ დე ბრუინს. მან დაიქადნა, მოჰამედ სალაჰზე (38 გოლი გაიტანა ამ სეზონში ყველა ტურნირის ჩათვლით) უკეთესი ვარო. ეგვიპტელმა კი ბელგიელი საგოლე პასითა და გოლით გააჩუმა. როგორც იტყვიან, კომენტარი ზედმეტია.

მეორე შეხვედრაში "ბარსელონამ" "რომა" გაანადგურა. გუნდები აშკარად სხვადასხვა წონითი კატეგორიიდან იყვნენ. როცა ამ რანგის თამაშში საკუთარ კარში ორ გოლს გაიტან, "ბარსას" აღარ უნდა შეეჯიბრო...

ყოველდღიური სპორტული გაზეთი "ლელო"
894
მკითხველის კომენტარები / 0 /
მსგავსი ამბები
რუბრიკის სხვა სიახლეები
;