ჩემპიონთა ლიგა. 1/4 ფინალი: განმეორდება პარიზული სასწაული? ალეგრი რონალდოსა და კინის ტანდემს ამზადებს...

ბარსელონასა და ტურინში გადამწყვეტი საპასუხო მეოთხედფინალებია. “ბარსა” “ემ იუსთან” აშკარა ფავორიტია. ველოდოთ ჰოლანდიურ სასწაულს იტალიაშიც?..

16 აპრილი. კამპ ნოუ
ბარსელონა (1:0) მანჩესტ. 23:00

სავარაუდო შემადგენლობები
ბარსელონა (4-3-3): ტერ შტეგენი - სემედუ, პიკე, ლონგლე, ალბა - რაკიტიჩი, ბუსკეტსი, არტური - მესი, ლუის სუარესი, დემბელე
მანჩესტერ იუნაიტედი (4-3-3): დე ხეა - დალო, ლინდელიოფი, სმოლინგი, იანგი - მაკტომინეი, ფრედი, პოგბა - რაშფორდი, ლუკაკუ, მარსიალი

არ ითამაშებენ: რაფინია - ბაილი, ერერა, ვალენსია, შოუ (დისკ)
საეჭვოა: ვერმალენი (ბარსელონა)

არბიტრპი: ფელიქს ბრიხი (გერმანია)

“ოლდ ტრაფორდზე” ბურთმა ორწუთ-ნახევარი “ბარსელონას” ყველა ფეხბურთელთან “მოიარა” და ბოლოს, ბედის ირონიით, ლუკ შოუს შეეხო და ისე აღმოჩნდა მასპინძელთა კარში. ერნესტო ვალვერდეს გუნდი სწორედ ამ გოლით ლიდერობს და ის საპასუხო მატჩის წინ აშკარა ფავორიტია. ოლე გუნარ სულშერმა ერთხელ უკვე მოახდინა სასწაული ჩემპიონთა ლიგის ამ გათამაშებაში, როცა პარიზში პსჟ დასცა, მაგრამ იგივეს გამეორება “კამპ ნოუზე” ძალიან ძნელი იქნება.

“ბარსელონას” შემადგენლობა თითქმის იგივე იქნება, რაც ინგლისში. ერთადერთი შესაძლოა, გამოჯანმრთელებულმა უსმან დემბელემ ფილიპე კოუტინიო ჩაანაცვლოს, რომელმაც თავისი შანსები (სანამ ფრანგი ტრავმირებული იყო) დიდად ვერ გამოიყენა. აი, “წითელ ეშმაკებს” კი ეს არ გამოუვათ, რადგან წინა მატჩის ანტიგმირი ლუკ შოუ დისკვალიფიცირებულია. მის ფლანგზე ეშლი იანგი გადავა, მარჯვნივ კი დიოგო დალოს ალტერნატივა გაუჩნდა - მატეო დარმიანი გამოჯანმრთელდა!

“იუნაიტედს” მატიჩი და სანჩესიც გამოუჯანმრთელდა, თუმცა შუახაზში შოტლანდიელი სკოტ მაკტომინეი ადგილს შეინარჩუნებს, რადგან ის მწვრთნელმა უქმეებზე დაასვენა (მარკუს რაშფორდთან ერთად).

ფაქტები

* ჩემპიონთა ლიგაზე “ბარსელონა” 9 მატჩია, რაც დაუმარცხებელია.

* ურთიერთშეხვედრები: 12 მატჩი - “ბარსელონამ” 5 მოიგო, “მანჩესტერმა” - 3. ბურთები - 21:15.

* ამ წყვილის გამარჯვებული “ლივერპული”-”პორტუს” წყვილის გამარჯვებულს შეხვდება ნახევარფინალში.

16 აპრილი. ალიანც სთედიუმი
იუვენტუსი (1:1) აიაქსი 23:00

სავარაუდო შემადგენლობები
იუვენტუსი (4-3-1-2): შჩესნი - კანსელო, ბონუჩი, რუგანი, ალექს სანდრო - ემრე ჯანი, პიანიჩი, მატუიდი - ბერნარდესკი - კინი, რონალდო
აიაქსი (4-3-3): ონანა - ფელტმანი, ბლინდი, დე ლიხტი, მაზრაუი - დე იონგი, ვან დე ბეეკი, შიონე - ნერეში, ტადიჩი, ზიეხი

არ ითამაშებენ: მანჯუკიჩი, კიელინი, კასერესი, პერინი - ბანდე, ტალიაფიკო (დისკ.)
საეჭვოა: დუგლას კოშტა, კუადრადო (იუვენტუსი) - დე იონგი (აიაქსი)

არბიტრი: კლემან ტურპენი (საფრანგეთი)

ამსტერდამის “აიაქსმა” ამ სეზონში ყველას მოაწონა თავი - გუნდმა “სანტიაგო ბერნაბეუზე” სასწაულიც კი მოახდინა და ამ ტურნირის ბოლო სამი სეზონის გამარჯვებული ჩემპიონთა ლიგიდან გააგდო. ამსტერდამში ჰოლანდიელებმა ტოლ-სწორად ითამაშეს “იუვენტუსთანაც”. ასე რომ, ხელაღებით ვერ ვიტყვით, რომ “იუვე” აშკარა ფავორიტია.

წინა დაპირისპირება “იოჰან კრუიფ არენაზე” 1:1 დასრულდა - კრიშტიანო რონალდომ თავით გახსნა ანგარიში - ბოლო დროს კრიშტიანო მხოლოდ ლიგაზე თამაშობს, თუმცა თამაშობს ფანტასტიკურად. მეორე ტაიმი 30 წამის დაწყებული იყო, როცა ნერეშმა გაათანაბრა და ახლა, ამ გოლის წყალობით, ჰოლანდიის ის ნაწილი, რომელიც “აიაქსს” გულშემატკივრობს, საპასუხო მატჩის წინ იმედიანადაა.

“იუვეს” არ ეყოლება მარიო მანჯუკიჩი, საეჭვოა დუგლას კოშტას თამაშიც, ბოლო დროს არ წყალობენ პაულო დიბალას... რა შეიძლება მოხდეს ამ შემთხვევაში? ჩვენ შეიძლება კრიშტიანო რონალდოსა და თინეიჯერი სენსაციის, მოიზე კინის ტანდემი ვიხილოთ შეტევაში!

მასპინძლებს არც კიელინი ეყოლებათ, არც კასერესი და არც მეკარე პერინი. ის კი არა, ემრე ჯანისა და რუგანის თამაშიც საეჭვოა. მოკლედ, მასიმილიანო ალეგრის საკადრო პრობლემები უხვად აქვს.

“აიაქსს” დისკვალიფიკაციის გამო დააკლდება არგენტინელი მცველი ტალიაფიკო, თუმცა უბრუნდება მაზრაუი. სხვათა შორის, ფრენკი დე იონგის თამაში საეჭვოა. ეს კი ამსტერდამული კლუბისთვის დიდი ძალაა. ვინ იცის, იქნებ, ის ბოლოჯერ მოირგებს “აიაქსის” მაისურს ჩემპიონთა ლიგაზე.

ფაქტები

* ჩემპიონთა ლიგის ბოლო 17 მატჩიდან 16-ში “აიაქსს” არ წაუგია.

* “იუვენტუსს” “აიაქსთან” ბოლო 5 დაპირისპირებაში არ წაუგია.

* ამ წყვილის გამარჯვებული ნახევარფინალში “მანჩესტერ სიტისა” და “ტოტენჰემის” წყვილის გამარჯვებულს შეხვდება.

ყოველდღიური სპორტული გაზეთი "ლელო"
1545
მკითხველის კომენტარები / 2 /
status quo
0
იუვენტუსმა ჩაიჯ.ა...
გოგა
0
ბარსელონა-მანჩესტერი 2-1
იუვენტუსი-აიაქსი 1-3
მსგავსი ამბები
რუბრიკის სხვა სიახლეები
;