ჩემპიონთა ლიგა. 1/4 ფინალი: დიდი ინგლისური გარჩევა 'ეტიჰადზე', პორტუში კი ფავორიტს ელიან

“დრაგაუზე” პორტუგალიელებს სასწაულის იმედი აქვთ. აი, ინგლისურ დუელში კი დიდი დაპირისპირება გველის.

ოთხშაბათი, 17 აპრილი. დრაგაუ
პორტუ (0:2) ლივერპული 23:00

სავარაუდო შემადგენლობები
პორტუ (4-3-3): კასილიასი - მილიტაო, პეპე, ფელიპე, ალექს ტელიესი - დანილო, ერერა, ოტავიო - ბრაჰიმი, სოარეში, მარეგა
ლივერპული (4-3-3): ალისონი - ალექსანდერ-არნოლდი, ლოვრენი, ვან დეიკი, რობერტსონი - ჰენდერსონი, ფაბინიო, ნაბი კეიტა - სალაჰი, ფირმინო, მანე
არ ითამაშებენ: ბრიუსტერი, ოქსლეიდ-ჩემბერლენი (ორივე - ლივერპული)

საეჭვოა: კორონა (პორტუ) - გომესი (ლივერპული)

არბიტრი: დანი მაკელი (ჰოლანდია)

“დრაგაოზე” “პორტუს” პირველ მატჩში წაგებული 0:2 აქვს ამოსაქაჩი. “ენფილდზე” ნაბი კეიტასა და რობერტო ფირმინოს გოლებით იურგენ კლოპის გუნდმა იმარჯვა და ახლა დუელის აშკარა ფავორიტია.

“პორტუს” პირველ თამაშში დისკვალიფიცირებული პეპე და ექტორ ერერა უბრუნდებიან. პორტუგალიელებს სასტარტოში იასინ ბრაჰიმი ეყოლებათ, რადგან გოლების გატანა სჭირდებათ.

“ლივერპულს” დისკვალიფიკაციამოხდილი ენდრიუ რობერტსონი უბრუნდება. ჯორდან ჰენდერსონი “ჩელსისთან” პრემიერლიგის მნიშვნელოვან მატჩში დაშავდა, თუმცა კლოპი ამტკიცებს, რომ კაპიტანი მზადაა. ჟორჟინიო ვეინალდუმი ითამაშებს სასტარტოში თუ ნაბი კეიტა, გერმანელი სპეციალისტის გადასაწყვეტია.

ფაქტები

* “ლივერპულს” “პორტუსთან” ბოლო სამ დაპირისპირებაში გოლი არ გაუშვია.

* “ლივერპულს” “პორტუსთან” ბოლო 5 დაპირისპირებაში არ წაუგია.

* “პორტუ” ჩემპიონთა ლიგის ბოლო 4 საშინაო მატჩში იგებს.

* გასულ სეზონში “ლივერპულმა” “პორტუს” ამავე ეტაპზე ორი მატჩის ჯამში 5:0 მოუგო.

ოთხშაბათი, 17 აპრილი.  ეტიჰადი
მან. სიტი (0:1) ტოტენჰემი 23:00

სავარაუდო შემადგენლობები
სიტი (4-3-3): ედერსონი - უოკერი, ოტამენდი, ლაპორტი, მენდი - ფერნანდინიო, გიუნდოგანი, დე ბრუინი - ბერნარდო სილვა, აგუერო, სტერლინგი
ტოტენჰემი (4-2-3-1): ლორისი - ტრიპიერი, ალდერვეირელდი, ვერტონგენი, როუზი - სისოკო, ვანიამა - ერიკსენი, ლუკას მოურა, სონი - ლორენტე
არ ითამაშებენ: ბრავო (სიტი)- ორიე, დაიერი, კეინი, ლამელა (ტოტენჰემი)

საეჭვოა: ფერნანდინიო, ზინჩენკო (სიტი) - ალი, უინქსი (ტოტენჰემი)
არბიტრი: ჯუნიეთ ჩაკირი (თურქეთი)

პეპის გამოცდა

“ეტიჰადზე” პეპ გვარდიოლას გუნდმა უნდა დაამტკიცოს, რომ ამ წყვილში მართლაც ფავორიტია. პირველ დაპირისპირებაში “მანჩესტერ სიტიმ” ეს ვერ შეძლო - “ტოტენჰემმა” თავის ახალთახალ სტადიონზე კორეელი სონის გოლით იმარჯვა - 1:0.

“სიტის” კვლავ არ ეყოლება მეკარე კლაუდიო ბრავო. საეჭვოა ფერნანდინიოს თამაში, თუმცა ის შესაძლოა, მაინც იყო სასტარტოში. რაც შეეხება ბრავოს, ჩილელი მაინც არ მოიაზრება სასტარტო შემადგენლობის ფეხბურთელად. ასე რომ, პეპს დიდი დანაკარგი არ აქვს. აი, მაურისიო პოჩეტინოს კი საპასუხო მატჩისთვის არ უნდა ჰქონდეს ერიკ დაიერის, სერჟ ორიეს, ერიკ ლამელასა და, რაც მთავარია, ჰარი კეინის იმედი. საეჭვოა დელე ალის, ჰარი ვინკსისა და ფერნანდო ლორენტეს თამაშიც.

ჰარი კეინი სწორედ ამ გუნდების პირველ დაპირისპირებაში დაიმტვრა, მან კოჭი ისე დაიზიანა, რომ ამ სეზონში აღარ უნდა ველოდოთ. პოჩეტინოს ფორმაში შესული ჰეუნ-მინ სონისა და ლუკას მოურას იმედი უნდა ჰქონდეს.

ფაქტები

* “მანჩესტერ სიტისა” და “ტოტენჰემის” ბოლო 8 მანჩესტერულ მატჩში 2.5 გოლზე მეტი დაფიქსირდა.

* ჩემპიონთა ლიგის ბოლო 3 მატჩში, “ტოტენჰემი” ტაიმს ფრედ ასრულებს და შემდეგ იგებს.

* “ტოტენჰემს” ჩემპიონთა ლიგის ბოლო სამ მატჩში გოლი არ გაუშვია.

* ჩემპიონთა ლიგის ბოლო 6 მატჩიდან 5-ში “ტოტენჰემმა” მოიგო.

* “სიტიმ” “ტოტენჰემის” კარში, ბოლო 8 მატჩიდან 7-ში, სულ მცირე 2 გოლი გაიტანა.

ყოველდღიური სპორტული გაზეთი "ლელო"
633
მკითხველის კომენტარები / 0 /
მსგავსი ამბები
რუბრიკის სხვა სიახლეები
;