ჩემპიონთა ლიგა. 1/4 ფინალი: 'ლივერპულს' 'პორტუ' არ უნდოდა, 'ტოტენჰემი' კი მხოლოდ კეინი არ არის

ერთი თვე გავიდა მას მერე, რაც ჩემპიონთა ლიგაზე მეოთხედფინალური წყვილები გაირკვა - ახლა კი ეს გადამწყვეტი დაპირისპირებები გაიმართება.სამშაბათის ორივე თამაში ინგლისშია, 4 კლუბიდან 3 ინგლისურია

სამშაბათი. 9 აპრილი. ენფილდი

ლივერპული-პორტუ 23:00

არ ითამაშებენ: რობერტსონი (დისკ), ჯ. გომესი, ოქსლეიდ-ჩემბერლენი - პეპე, ექტორ ერერა (დისკ)
საეჭვოა: ლალანა - ალექს ტელიესი

სავარაუდო შემადგენლობები
ლივერპული (4-3-3): ალისონი - ალექსანდერ-არნოლდი, მატიპი, ვან დეიკი, მილნერი - ფაბინიო, ჰენდერსონი, ვეინალდუმი - სალაჰი, ფირმინო, მანე
პორტუ (4-3-3): კასილიასი - მაქსი, ფელიპე, მილიტაო, ალექს ტელიესი - დანილო, ოტავიო, კორონა - ბრაჰიმი, მარეგა, სოარეში

არბიტრი: მატეო ლაოსი (ესპანეთი)

ზუსტად ერთი წლის წინათ, “ლივერპული” და “პორტუ” ჩემპიონთა ლიგის მეოთხედფინალში დაუპირისპირდნენ ერთმანეთს. მაშინ პირველი თამაში “დრაგაოზე” იყო და ძალზე მოულოდნელი ანგარიშით დასრულდა...

მართალია, “ლივერპული” ფავორიტი იყო, მაგრამ მისგან პორტუგალიაში 5:0-ის მოგებას არავინ ელოდა. “ენფილდზე” იყო ფორმალობა, რომელიც უგოლო ფრით დასრულდა.

“ლივერპულს” არ ეყოლება დისკვალიფიცირებული მარცხენა მცველი ენდრიუ რობერტსონი, მას ამ პოზიციაზე ყველგან მოთამაშე ჯეიმს მილნერი შეცვლის. ტრავმის გამო გუნდს დააკლდებიან ჯო გომესი და ალექს ოქსლეიდ-ჩემბერლენი.

“პორტუს” არ ეყოლება დისკვალიფიცირებული პეპე და ექტორ ერერა. საეჭვოა ალექს ტელიესის თამაში. სერჟიო კონსეისაოს საფიქრალი ისიცაა, ითამაშოს კვლავ 4-3-3 განლაგებით თუ ბოლო დროს აპრობირებული 4-4-2-ით.

იურგენ კლოპი (ლივერპული): “ყველას სურს “პორტუსთან” შეხვედრა, სანამ სინამდვილეში ეს მოხდება. სიმართლე გითხრათ, ჩვენ არ გვინდოდა ეს. ფეხბურთში ვინც სიღრმისეულად ერკვევა, შეუძლებელია, მას სურდეს “პორტუსთან” დაპირისპირება. თუმცა ჩვენ ეს ბედი გვერგო. სხვათა შორის, “ლივერპულთან” დაპირისპირება არავის სურდა.

ძალიან რთული მატჩები გველის, თუმცა ჩვენ ოპტიმისტურად ვუყურებთ მომავალს. მო სალაჰს გოლები ვერ გაჰქონდა, თუმცა მე ეს არ მაწუხებდა, რადგან კარგად ვხედავდი, როგორ შრომობდა ის. რა თქმა უნდა, როცა მსოფლიო კლასის გოლი გაგაქვს, ეს გეხმარება და სალაჰის შემთხვევაშიც ასეა. რაც შეეხება შარშანდელ 5:0-ს პორტუგალიაში, ეს იყო უცნაური თამაში. ძალიან კარგად გამოვიყენეთ ყველა შანსი - 2-3 გოლი კონტრშეტევაზე გავიტანეთ. ეს შედეგი “პორტუსთვის” უფრო მეტს ნიშნავს, ვიდრე ჩვენთვის”.

ფაქტები

* “პორტუს” მონაწილეობით ჩემპიონთა ლიგის ბოლო 6 მატჩში 2.5 გოლზე მეტი დაფიქსირდა.

* ჩემპიონთა ლიგაზე “პორტუმ” ბოლო 7 მატჩიდან 6 მოიგო.

* ლიგაზე “პორტუმ” ბოლო 6 მატჩიდან 5-ში სულ მცირე, ორი გოლი გაიტანა.

* “ლივერპული” და “პორტუ” ერთმანეთს 6-ჯერ შეხვდნენ, ინგლისელებს 3 მოგება, 3 მატჩი ფრედ დასრულდა.

* ამ გუნდების ექვსივე დაპირისპირება 21-ე საუკუნეში შედგა.

* ორმატჩიან დუელებში “ლივერპული” პორტუგალიურ გუნდებს 6:2-ს უგებს - 6-ჯერ დაძლია ბარიერი, 2-ჯერ გავარდა.

* “პორტუს” ინგლისში ევროთასების მატჩი არასოდეს მოუგია - 3 ფრე და 15 წაგება.

* შარშან “ლივერპულთან” წაგების შემდეგ, “პორტუმ” ლიგაზე მხოლოდ ერთხელ წააგო (სტუმრად რომასთან).

* “ლივერპული” 14 მატჩია, რაც დაუმარცხებელია (ყველა შეჯიბრება) - 9 მოგება, 5 ფრე.

სამშაბათი. 9 აპრილი.
ტოტენჰემ სთედიუმი

ტოტენჰემი-სიტი 23:00
არ ითამაშებენ: დაიერი, ლამელა - ბრავო, ზინჩენკო
საეჭვოა: ორიე, ფ. ლორენტე - აგუერო, დელფი, მენდი, უოკერი

სავარაუდო შემადგენლობები
ტოტენჰემი (4-2-3-1): ლორისი - ტრიპიერი, ალდერვეირელდი, ვერტონგენი, როუზი - სისოკო, ალი - ერიკსენი, სონი, ვინკსი - კეინი
მანჩესტერ სიტი (4-3-3): ედერსონი - დანილო, ლაპორტი, ოტამენდი, მენდი - დე ბრუინი, ფერნანდინიო, გიუნდოგანი - ბერნარდო სილვა, გაბრიელ ჟეზუში, სტერლინგი

არბიტრი: ბიორნ კუიპერსი (ჰოლანდია)

“ტოტენჰემი” თავის ახალთახალ სტადიონს უკვე ჩემპიონთა ლიგაზე დააგემოვნებს, მეტოქე “მანჩესტერ სიტია”. ინგლისური დერბი ჩემპიონთა ლიგის მეოთხედფინალში უთუოდ საინტერესო უნდა იყოს...

მასპინძლებს დაიერი და ლამელა აკლიათ, ხოლო ორიესა და ლორენტეს თამაში საეჭვოა. “სიტის” რიგებში ვერ ვიხილავთ მეკარე ბრავოსა და ზინჩენკოს, თამაშის შანსი აქვთ აგუეროს, დელფს, მენდისა და უოკერს.

მაურისიო პოჩეტინო (ტოტენჰემი): “პირველივე მომენტიდან სიმამაცე უნდა გამოვიჩინოთ და შევეცადოთ თამაშის მოგებას. ეს არის ჩვენი მთავარი იდეა და ჩელენჯი ხვალისთვის”.

ხოსეპ გვარდიოლა (მანჩესტერ სიტი): “აგუერო და მენდი თავს უკეთ გრძნობენ, ისევე, როგორც უოკერი. მათ ხვალინდელი თამაშისთვის განვიხილავ. “ტოტენჰემი” მხოლოდ ჰარი კეინი არ არის, ეს არის ძლიერი გუნდი ფიზიკურად. რა თქმა უნდა, ახალი სტადიონის ატმოსფეროც იმოქმედებს ხვალ”.

ფაქტები

* ჩემპიონთა ლიგის ბოლო 13 თამაშში “მანჩესტერ სიტის” მონაწილეობით 2.5 გოლი და მეტი დაფიქსირდა.
* “სიტიმ” ლიგის ბოლო 7 მატჩში სულ მცირე, 2 გოლი გაიტანა.
* “სიტიმ” ბოლო 4 შეხვედრა არა მარტო მოუგო “ტოტენჰემს”, არამედ, მოუგო პირველი ტაიმებიც.
* “სიტიმ” ლიგაზე ბოლო 7 მატჩიდან 6 მოიგო.
* “ტოტენჰემი” ჩემპიონთა ლიგაზე 6 მატჩია, რაც დაუმარცხებელია.

ყოველდღიური სპორტული გაზეთი "ლელო"
413
მკითხველის კომენტარები / 0 /
მსგავსი ამბები
რუბრიკის სხვა სიახლეები
;