ჩემპიონთა ლიგა. 1/4 ფინალი: წამება, წაგება ბოლო წამებზე [VIDEO]

ბაიერნი-სევილია 0:0
პირველი მატჩი 2:1

ბაიერნი (4-1-4-1): ულრაიხი - კიმიხი, ბოატენგი, ჰუმელსი, რაფინია (87. ზიულე) - მარტინესი - რობენი, როდრიგესი, რიბერი (71. ალკანტარა), მიულერი - ლევანდოვსკი (77. ვაგნერი).

სევილია (4-2-3-1): სორია - ხესუს ნავასი, მერკადო, ლენგლე, ესკუდერო - ბანეგა, ნზონზი - კორეა, ვასკესი (81. ნოლიტო), სარაბია (70. რამირესი) - ბენ იედერი (65. მურიელი).

გაძევება: კორეა (90+2. სევილია)

რეალი-იუვენტუსი 1:3
პირველი მატჩი 3:0
გოლები: 0:1 მანჯუკიჩი (2), 0:2 მანჯუკიჩი (37), 0:3 მატუიდი (61), 1:3 რონალდო (90+8-პენ)

რეალი (4-4-2): ნავასი - კარვახალი, ვარანი, ვალიეხო, მარსელო - კროოსი, კაზემირო (46. ლუკას ვასკესი), მოდრიჩი (75. კოვაჩიჩი), ისკო - რონალდო, ბეილი (46. ასენსიო).

იუვენტუსი (4-3-3): ბუფონი - დე შილიო (17. ლიხტშტაინერი), ბენატია, კიელინი, ალექს სანდრო - ხედირა, პიანიჩი, მატუიდი - დუგლას კოშტა, მანჯუკიჩი, იგუაინი (90+6. შჩესნი).

გაძევება: ბუფონი (90+3. იუვენტუსი)

ჩემპიონთა ლიგის ბოლო ორი მეოთხედფინალიდან ერთი - დაუვიწყარი გამოდგა. პირველ შეხვედრაში შინ თითქოს უიმედოდ დამარცხებული (0:3) "იუვენტუსი" ნამდვილ გმირად წარმოჩნდა "სანტიაგო ბერნაბეუზე".

მარიო მანჯუკიჩის ორი მძლავრი თავურისა და ბლეზ მატუიდის გოლის შემდეგ "ბებერი ქალბატონი" სრულიად დამსახურებულად იგებდა. მასიმილიანო ალეგრის გუნდს დამატებითი დრო ხელში "ეჭირა", როცა მოხდა ის, რაც, შეიძლებოდა, არ მომხდარიყო...

ინგლისელმა არბიტრმა მაიკლ ოლივერმა, კომპენსირებული დროის ბოლო წუთზე "იუვენტუსის" კარში ბევრისთვის მეტად საეჭვო პენალტი დანიშნა. გავრისკავ და ვიტყვი, რომ ასეთ 11-მეტრიანს, ასეთ დროს, ბევრი მსაჯი არ დანიშნავდა. როგორც ჩანს, "სანტიაგო ბერნაბეუ" მართლაც განსაკუთრებული ადგილია, რომელსაც თავისი განუმეორებელი მაგია აქვს და ამან მოაჯადოვა ინგლისელი არბიტრიც...

ამის შემდეგ ჩვენ ვნახეთ გაგიჟებული ჯანლუიჯი ბუფონი, რომელიც არბიტრმა წითელი ბარათით დასაჯა, ვნახეთ ჭკუიდან გადასული ალეგრი და "იუვეს" ფეხბურთელები...

ფაქტია, ოლივერმა გვარიანი სანახაობა "წაგვართვა". წინ კიდევ დაუვიწყარი, სულ მცირე, 30 წუთი გველოდა, მან კი ერთი სასტვენით ყველაფერი წყალში "ჩაგვიყარა". ადამიანური თვალსაზრისით, არ შეიძლება, არ შეგეცოდოს იტალიური გრანდი, რომელმაც, მართლაც რომ, შეუძლებელი შეძლო - გააკეთა ის, რაც მხოლოდ დიდ გუნდებს ხელეწიფებათ!

ახლა ბევრი ილაპარაკებს იმაზე, რომ ჩემპიონთა ლიგაშიც უნდა იყოს ვიდეორეფერი. ვინ იცის, ოლივერს ის ეპიზოდი ეკრანზე რომ ენახა, ეგებ შეეცვალა კიდეც პირვანდელი გადაწყვეტილება...

ერთი სიტყვით, კრიშტიანო რონალდომ კარგად შეირგო პენალტი - აუღებელი დაურტყა გაძევებული ბუფონის ნაცვლად კარში ჩამდგარ ვოიცეხ შჩესნის. ეს ის შემთხვევაა, როცა მოგებულზე მეტად წაგებულს უნდა მივულოცოთ. "იუვე" უკეთესი იყო მადრიდში, ვიდრე "რეალი" - ტურინში.

ნამატჩევს მასიმილიანო ალეგრიმ მოკლე კომენტარი გააკეთა 11-მეტრიანთან დაკავშირებით: "თუ ეს პენალტი იყო, მაშინ ასეთივე პენალტი იყო კუადრადოზე პირველ თამაშში, რომელიც 93-ე წუთზე არბიტრმა ჩვენს სასარგებლოდ არ დანიშნა".

მეორე შეხვედრაში "ბაიერნმა" არაერთი მომენტი შექმნა "სევილიას" კართან, მაგრამ ვერ გაიტანა. ეგეც იყო, რომ "რეკორდმაისტერს" ბოლომდე არ დაუხარჯავს რესურსი. "სევილიას" კი რაიმე ღირებულის შესაქმნელად ოსტატობა არ ეყო.

"რეალი", "ბაიერნი", "რომა", "ლივერპული" - ხვალ ამ ოთხეულს ნიონში ჩვენი დროით 15 საათზე დააწყვილებენ.

ფაქტები

* კრიშტიანო რონალდომ ზედიზედ მე-11 მატჩში გაიტანა გოლი.

* ბოლო 14 მატჩში რონალდოს ანგარიშზე 27 გოლია.

* სულ ამ სეზონში ჩატარებულ 38 მატჩში რონალდომ 41 გოლი გაიტანა.

* "იუვენტუსის" კარში გატანილი გოლი რონალდოსთვის იყო 120-ე ჩემპიონთა ლიგაში ჩატარებულ 150-ე მატჩში.

ყოველდღიური სპორტული გაზეთი "ლელო"
600
მკითხველის კომენტარები / 0 /
მსგავსი ამბები
რუბრიკის სხვა სიახლეები