ჩემპიონთა ლიგა. 1/4 ფინალი: ჯერ არასდროს არ შობილა ღამე რომში ასეთი [VIDEO]

რომა-ბარსელონა 3:0

პირველი მატჩი 1:4
გოლები: 1:0 ჯეკო (6), 2:0 დე როსი (58-პენ), 3:0 მანოლასი (82)

რომა (3-5-2): ალისონი - მანოლასი, ფასიო, ჟეზუში - ფლორენცი, ნაინგოლანი (77. ელ შაარავი), დე როსი, სტროოტმანი, კოლაროვი - ჯეკო, შიკი (73. იუნდერი).

ბარსელონა (4-4-2): ტერ შტეგენი - სემედუ (85. დემბელე), პიკე, უმტიტი, ალბა - სერხი რობერტო, რაკიტიჩი, ბუსკეტსი (85. პაკო ალკასერი), ინიესტა (80. ანდრე გომესი) - მესი, სუარესი.

მანჩესტერ სიტი-ლივერპული 1:2

პირველი მატჩი 0:3
გოლები: 1:0 გაბრიელ ჟეზუში (2), 1:1 სალაჰი (56), 1:2 ფირმინო (77)

სიტი (3-4-3): ედერსონი - უოლკერი, ოტამენდი, ლაპორტი - ბერნარდო სილვა (74. გიუნდოგანი), ფერნანდინიო, დე ბრუინი, დავიდ სილვა (66. აგუერო) - სტერლინგი, სანე, გაბრიელ ჟეზუში.

ლივერპული (4-3-3): კარიუსი - ალექსანდერ-არნოლდი (81. კლაინი), ვან დაიკი, ლოვრენი, რობერტსონი - ოქსლეიდ-ჩემბერლენი, ვეინალდუმი, მილნერი - სალაჰი (90. ინგსი), ფირმინო (81. კლავანი), მანე.

"ოლიმპიკოზე" ჩემპიონთა ლიგის საპასუხო მეოთხედფინალი რომ დასრულდა, ალბათ ბევრმა სხეულის სხვადასხვა ნაწილზე იპწკინა. "რომამ" პირველი მატჩი ბარსელონაში 1:4 წააგო, საშინაო ასპარეზზე კი მეტოქეს 3 უპასუხო გოლი გაუტანა!

მეტი რომ არ ვთქვათ, მართლაც სასწაული იყო. არადა, რომაელთა ტრიუმფს "დაუმსახურებელს" ვერაფრით უწოდებ კაცი. რამდენი ხანია, არ გვინახავს ასე საგულდაგულოდ ჩაკეტილი ლიონელ მესი. და განა მარტო მესი? რომაელებმა მრისხანე მეტოქე საერთოდ გააქრეს მინდვრიდან...

დიდებული მატჩი ჩაატარეს "ჯალოროსის"ლიდერებმა - დანიელე დე როსიმ და ედინ ჯეკომ. "ბარსას" დაცვაში რომ პრობლემებია, ეს შეუიარაღებელი თვალითაც კარგად ჩანდა მთელი სეზონის განმავლობაში და ამ სენმა ერთბაშად რომში იჩინა თავი.

რა თქმა უნდა, მომენტები კატალონიელებსაც ჰქონდათ, მაგრამ ამის გარეშე ფეხბურთი არ არსებობს. ეუსებიო დი ფრანჩესკომ მაგრად "დაქოქა" გუნდი. თურმე, რომაელთა ბოლოდროინდელი, შედარებით არადამაჯერებელი თამაში ქარიშხლისწინა სიმშვიდესავით ყოფილა.

ფეხბურთში დღეს ყველაფერი ხდება. ალბათ, ბევრმა გადაურეკა მეგობარს და ჰკითხა ის, რაც ჩემმა მეგობარმა - მე: შენთანაც "რომა" გავიდაო?!.

ინგლისურ შეხლაში "ლივერპულმა" გასვლაზეც მოუგო "სიტის", ამჯერად, მოკრძალებული ანგარიშით - 2:1. კი ბატონო, პეპ გვარდიოლას გუნდს აშკარა გოლი "წაართვა" მსაჯმა. ისიც მართალია, რომ "ქალაქები" თამაშის მეტ ნაწილში უკეთესები იყვნენ "წითლებზე", საგოლე მომენტებიც ჰქონდათ, მაგრამ როცა ორი შეხვედრის ჯამში 1:5-ს აგებ, თავს ვერაფრით გაიმართლებ.

რაჰიმ სტერლინგის პასით გაბრიელ ჟეზუშმა გახსნა ანგარიში. მეორე ტაიმში კი "ლივერპულმა" მეტოქეს სივრცეების გახსნა არ აპატია და დამსახურებულადაც დასაჯა.

ფაქტები

* "ლივერპული" არის პირველი გუნდი, რომელმაც პეპ გვარდიოლას მიერ გაწვრთნილ გუნდს ერთ სეზონში 3-ჯერ მოუგო.

* "ლივერპულის" ისტორიაში მოჰამედ სალაჰს ყველაზე მეტი (8) გოლი აქვს გატანილი ევროტურნირის (ჩემპიონთა და ევროპის ლიგა) ერთ ცალკე აღებულ სეზონში.

* მოჰამედ სალაჰი მიმდინარე სეზონში "ლივერპულის" 50 გოლში მონაწილეობდა (39 გაიტანა, 11 გაატანინა) - თერთმეტით მეტი, ვიდრე პრემიერლიგის რომელიმე სხვა ფეხბურთელი.

* ჩემპიონთა ლიგის ისტორიაში "რომა" გახდა მესამე გუნდი, ვინც პლეი ოფში 3 (და მეტი) გოლის დეფიციტი გააბათილა. პირველი იყო "დეპორტივო" (2003/04 წლების სეზონში "მილანთან"), ხოლო მეორე - "ბარსელონა" (გასულ სეზონში პსჟ-სთან). თავის მხრივ, ჩემპიონთა ლიგის ისტორიაში "ბარსელონა" პირველად გავარდა პლეი ოფიდან იმ სიტუაციაში, როცა პირველი მატჩი, სულ მცირე, 3-ბურთიანი სხვაობით ჰქონდა მოგებული.

* "ლივერპული" მე-10-დ გავიდა ჩემპიონთა თასის/ლიგის ნახევარფინალში. ერთადერთი ინგლისური გუნდი, რომელსაც უკეთესი შედეგი აქვს, "მანჩესტერ იუნაიტედია" - 12.

* "ლივერპულის" მიერ მიმდინარე ჩემპიონთა ლიგაში გატანილი 33 გოლი სარეკორდოა ინგლისური კლუბისთვის ერთ ცალკე აღებულ ევროსეზონში.

ყოველდღიური სპორტული გაზეთი "ლელო"
973
მკითხველის კომენტარები / 0 /
მსგავსი ამბები
რუბრიკის სხვა სიახლეები
;