ჩემპიონთა ლიგა. 1/8 ფინალი. ბებერი ხარის რქებიც ხნავენ [VIDEO]

ჩელსი-ბარსელონა 1:1
გოლები: 1:0 ვილიანი (62), 1:1 მესი (75)

ბაიერნი-ბეშიქთაში 5:0
გოლები: 1:0 მიულერი (43), 2:0 კომანი (53), 3:0 მიულერი (66), 4:0 ლევანდოვსკი (79), 5:0 ლევანდოვსკი (88)
გაძევება: ვიდა (16. ბეშიქთაში)

ჩემპიონთა ლიგის ორი პლეი ოფიდან მთავარი მატჩი შედგა ლონდონში, სადაც ერთმანეთს ძველი მეტოქეები - "ჩელსი" და "ბარსელონა" დაუპირისპირდნენ.

ამ გუნდებს ისტორიულად გამოსდით კარგი თამაშები და ურიგო საცქერი არც ეს ჯახი ყოფილა, თუმცა, დარწმუნებული ვარ, გულშემატკივარი მეტს ელოდა...

შეგვიძლია ვთქვათ, რომ პირველ ნახევარში მინდორზე მხოლოდ ერთი გუნდი იყო. და რაც უნდა გაგიკვირდეთ, ეს გუნდი "ჩელსი" (რომელიც პრემიერლიგაში ბოლო დროს კოჭლობს) იყო და არა "ბარსელონა". მასპინძლებმა ყველა კომპონენტში დაჯაბნეს მოწინააღმდეგე.

"ბარსელონა" ცუდად უმკლავდებოდა ანტონიო კონტეს მიერ გაწვრთნილი გუნდის სწრაფ შეტევებს. ყველაფერს რომ თავი დავანებოთ, მარტო ვილიანმა ორჯერ მოარტყა ბურთი ძელს. განა, მხოლოდ ბრაზილიელს მართებდა გატანა? თავის გამოჩენა თავისუფლად შეეძლოთ რიუდიგერს, აზარს, მოზესს...

ერნესტო ვალვერდეს გუნდის ცნობა კი შეუძლებელი იყო. "ბარსას", თითქოს, ეძინა მინდორზე. პრინციპში, ასე გამოიყურება ის ლა ლიგის ბოლო მატჩებშიც. კატალონიელთა შეტევებისას საქმე მხოლოდ ნახევარმომენტებამდე თუ მიდიოდა. ასეთი "ბლაუგრანა" ძალიან იშვიათად თუ გვინახავს...

მოკლედ, "ჩელსის" გოლი მწიფდებოდა და მომწიფდა კიდეც. ეს მეორე ტაიმის შუაწელში, მატჩის საუკეთესო მოთამაშე ვილიანმა ქნა - გადამწყვეტი დარტყმა მილიმეტრებში გამოზომა და მეკარისგან მარცხენა დაბალ კუთხეში გაახვია ბურთი. როგორ გინდა, არ უსაყვედურო კონტეს, რომელიც ხანდახან არ ენდობა ამ სამხრეთამერიკელ ოსტატს...

"ჩელსი" მიღწეულზე არ გაჩერდა და შეტევა გააგრძელა, გოლი კი "ბარსელონამ" შეაგდო. ანდრეს ინიესტა ის ვეღარაა, რაც ადრე იყო, წლებმა თავისი წაიღო, მაგრამ "სტემფორდ ბრიჯზე" "ბებერი ხარის" რქებმაც მოხნეს - ანდრესის შესანიშნავი პასი და ლიონელ მესიმ ბურთთან ერთი შეხებით ანგარიში გაათანაბრა.

მიუხედავად ყველაფრისა, "ბარსამ" კარგი შედეგი წაიღო კატალონიაში და ახლა ორმატჩიანი დუელის აშკარა ფავორიტია. და მაინც, ყველაფერი "კამპ ნოუზე" გადაწყდება.

მეორე მატჩის აშკარა ფავორიტი ისედაც "ბაიერნი" იყო და ახლა ხომ ამაზე აღარც არის ლაპარაკი - "რეკორდმაისტერმა", ფაქტობრივად, გაინაღდა მეოთხედფინალი, უბრალოდ, სტამბოლში ფორმალური 90 წუთი დარჩა ჩასატარებელი.

ისიც უნდა ითქვას, რომ რუმინელმა არბიტრმა ოვიდიუ ჰატეგანმა თამაშის დასაწყისშივე უხეშობისთვის გააძევა "ბეშიქთაშის" ხორვატი მცველი დომაგოი ვიდა, თუმცა ვეჭვობთ, რიცხობრივ წონასწორობას დიდად შეეცვალა რამე.

რა თქმა უნდა, "ბაიერნი" უქმად არ ყოფილა და მომენტებიც საკმარისად შექმნა. გატანა შეეძლოთ მატს ჰუმელსს, ხამეს როდრიგესს, დავიდ ალაბას... "ბეშიქთაშიც" იცლიდა შეტევებისთვის და ორი მშვენიერი შანსიც ჰქონდა - ჯერ ვაგნერ ლავმა ვერ შეაგდო, მერე კი რეალური მომენტი გაფლანგა რიკარდო კვარეშმამ.

იუპ ჰაინკესის გაწვრთნილმა გუნდმა ტაიმი მაინც მოიგო. ალაბამ ერთხელაც ივარგა და გემრიელი საგოლე პასი უბოძა თომას მიულერს. ჰაინკესის საყვარელმა ფეხბურთელმა კი, აგერ, მერამდენედ დაამტკიცა, რომ მნიშვნელოვან შეხვედრებში გოლების გატანისთვისაა დაბადებული (დუბლის გარდა, საგოლე პასიც შეასრულა). აღსანიშნავია რობერტ ლევანდოვსკის ორი გოლიც.

ყოველდღიური სპორტული გაზეთი "ლელო"
1077
მკითხველის კომენტარები / 0 /
მსგავსი ამბები
რუბრიკის სხვა სიახლეები
;