ჩემპიონთა ლიგა. 1/8 ფინალი: დიდი გარჩევა 'ალიანს არენაზე', 'კამპ ნოუ' კი ფრანგებს ელოდება

ჩემპიონთა ლიგაზე ბოლო ორი მეოთხედფინალისტის ვინაობაც უნდა გაირკვეს - “ბარსელონა” “ლიონთან” ფავორიტია, თუმცა თამაში მოსაგები აქვს. აი, “ალიანც არენაზე” კი დიდი დაპირისპირება გველის...

ბაიერნი-ლივერპული 23:59
(0:0)
ალიანც არენა. 13 მარტი

სავარაუდო შემადგენლობები
ბაიერნი (4-5-1): ნოიერი - რაფინია, ზიულე, ჰუმელსი, ალაბა - ხავი მარტინესი, ტიაგო ალკანტარა, გნაბრი, ხამესი, რიბერი - ლევანდოვსკი
ლივერპული (4-3-3): ალისონი - ალექსნდერ-არნოლდი, მატიპი, ვან დეიკი, რობერტსონი - ვეინალდუმი, ფაბინიო, ჰენდერსონი - სალაჰი, ფირმინო, მანე

არ ითამაშებენ: კიმიხი (დისკ), მიულერი (დისკ), რობენი, ტოლისო - გომესი, ოქსლეიდ-ჩემბერლენი
საეჭვოა: კომანი - ლოვრენი
მსაჯი: დანიელე ორსატო (იტალია)

“ენფილდზე” გოლები არ გასულა - სტუმართა რიგებში საუკეთესო ხავი მარტინესი იყო. ბუნებრივია, ამ თამაშის შემდეგ “რეკორდმაისტერი” გახდა წყვილის ფავორიტი და არა ლიგის შარშანდელი ფინალისტი. თუმცა ამ დაპირისპირებაში ყველაფერი შეიძლება მოხდეს.

ჯოშუა კიმიხმა ინგლისში სეზონში მესამე ყვითელი ბარათი მიიღო და ისევე, როგორც თომას მიულერი, ისიც დისკვალიფიცირებულია. ფრანკ რიბერი შესანიშნავ ფორმაშია, მან ბუნდესლიგის ბოლო ტურში საგოლე პასების ჰეთ თრიკი შეასრულა, ის უპრობლემოდ შეცვლის მიულერს სასტარტოში. კიმიხს კი, სავარაუდოდ, რაფინია შეცვლის. მარცხენა ფრთაზე გუნდს დავიდ ალაბა უბრუნდება.

“ლივერპულს” ვირხილ ვან დეიკი უბრუნდება, რომელიც პირველ მატჩში დისკვალიფიცირებული იყო.

ფაქტები

* ჩემპიონთა ლიგაზე “ბაიერნი” 8 მატჩია, რაც დაუმარცხებელია.

* “ბაიერნი” ზედიზედ მერვედ აპირებს ლიგის მეოთხედფინალში გასვლას.

* იურგენ კლოპი მიუნხენში - 4 მოგება, 1 ფრე, 9 მარცხი.

* ორივე კლუბს 5-5 ტიტული აქვს, “ლივერპულმა” ტიტული 2005 წელს მოიგო ბოლოს, “ბაიერნმა” - 2013-ში.

ბარსელონა-ლიონი 23:59
(0:0)
კამპ ნოუ. 13 მარტი

სავარაუდო შემადგენლობები
ბარსელონა (4-3-3): ტერ შტეგენი - სერხი რობერტო, პიკე, ლონგლე, ალბა - რაკიტიჩი, ბუსკეტსი, არტური - მესი, ლუის სუარესი, კოუტინიო
ლიონი (4-2-3-1): ლოპეში - დუბუა, დენაიერი, მარშალი, მენდი - ტუსარი, ნდომბელე - ტრაორე, ფეკირი, ტერიე - დეპაი

არ ითამაშებენ: რაფინია - გუირი
საეჭვოა: დემბელე, ვერმალენი - მარსელო
არბიტრი: შიმონ მარცინიაკი (პოლონეთი)

ლიონში ლეო მესი ბევრს ეცადა, მატჩშიც აშკარად საუკეთესო მოთამაშე იყო, მაგრამ “ბარსელონამ” “ლიონს” გოლი ვერ გაუტანა - 0:0. და ყველაფერი თავიდან იწყება. მართალია, ფავორიტი კიდევ უფრო გამოიკვეთა ამ წყვილში, მაგრამ 0:0 სახიფათო ანგარიშია - “ლიონს” ნებისმიერი შედეგიანი ფრე აწყობს. “ბარსელონა” კი მაინცდამაინც არ გამოირჩევა დაცვაში საუკეთესო თამაშით. ასე რომ, ტერ შტეგენი და კომპანია ფრთხილად უნდა იყოს და უკანმოუხედავად არ უნდა შეუტიოს.

ერნესტო ვალვერდეს ამ სეზონში რაფინიას იმედი არ უნდა ჰქონდეს. ხოლო უსმან დემბელესა და თომას ვერმალენის მდგომარეობას ბოლო დღეს შეამოწმებენ. ამ ორში დემბელეს შანსი მეტია, თუმცა მისი შეცვლა ფილიპე კოუტინიოს შეუძლია. რაკიტიჩისა და ბუსკეტსის გვერდით, ალბათ, არტურს ვიხილავთ, არტურო ვიდალი კი სათადარიგოთა სკამზე გადაინაცვლებს.

“ლიონში” რაზმში მთავარი მოვლენა ისაა, რომ ნაბილ ფეკირს დისკვალიფიკაცია მოხდილი აქვს და “კამპ ნოუზე” ითამაშებს.

ფაქტები

* “ლიონმა” ჩემპიონთა ლიგის ბოლო 6 მატჩი ფრედ ითამაშა.

* “ბარსელონამ” ბოლო სამი საშინაო დაპირისპირება მოუგო “ლიონს” ყველა შეჯიბრებაში.

* “ბარსელონას” ჩემპიონთა ლიგაზე 7 მატჩია, რაც არ წაუგია.

* “ბარსელონამ” “ლიონთან” ბოლო სამ საშინაო დაპირისპირებაში (ყველა შეჯიბრება) სულ მცირე, 2 გოლი გაიტანა.

ყოველდღიური სპორტული გაზეთი "ლელო"
1000
მკითხველის კომენტარები / 1 /
a naxet
0
ფირმინიო მიაყრის დღეს ბაიერნს მიწას:)
მსგავსი ამბები
რუბრიკის სხვა სიახლეები
;