ჩემპიონთა ლიგა. 1/8 ფინალი: ერთ მსახიობის თეატრი [VIDEO]

ბეშიქთაში-ბაიერნი 1:3
პირველი მატჩი 0:5

გოლები: 0:1 ალკანტარა (18), 0:2 გონული (46-საკ. კარში), 1:2 ვაგნერ ლავი (59), 1:3 ვაგნერი (84)

ბეშიქთაში (4-4-2): ზენგინი - გონული, მედელი, იუსალი, ერქინი - კვარეშმა, ოზიაკუპი, არსლანი (60. ჰათჩინსონი), ლენსი (60. ტალისკა) - ვაგნერ ლავი (75. ბაბელი), ფექთემექი.

ბაიერნი (4-3-3): ულრაიხი - რაფინია, ბოატენგი, ჰუმელსი (46. ზიულე), ალაბა - ვიდალი, მარტინესი, ალკანტარა (35. ხამეს როდრიგესი) - მიულერი, რიბერი, ლევანდოვსკი (68. ვაგნერი).

ბარსელონა-ჩელსი 3:0
პირველი მატჩი 1:1

გოლები: 1:0 მესი (3), 2:0 დემბელე (20), 3:0 მესი (63)

ბარსელონა (4-4-2): ტერ შტეგენი - სერხი რობერტო, პიკე, უმტიტი, ალბა - დემბელე (67. ვიდალი), რაკიტიჩი, ბუსკეტსი (61. ანდრე გომესი), ინიესტა (56. პაულინიო) - მესი, სუარესი.

ჩელსი (3-4-3): კურტუა - ასპილიკუეტა, კრისტენსენი, რიუდიგერი - მოზესი (67. ძაპაკოსტა), ფაბრეგასი, კანტე, ალონსო - ვილიანი, აზარი (82. პედრო), ჟირუ (67. მორატა).

"ბარსელონა" ზედიზედ მეთერთმეტედ გავიდა ჩემპიონთა ლიგის მეოთხედფინალში. "კამპ ნოუზე" "ჩელსიმ" კარგი ფეხბურთი კი ითამაშა, მაგრამ მაინც უშანსოდ დამარცხდა.

ეს იყო ერთი მსახიობის თეატრი. გნებავთ, ერთი დიდებული მსახიობის მიერ დადგმული განუმეორებელი სპექტაკლი. მთავარ როლში მყოფმა ლიონელ მესიმ ითამაშა ისე, როგორც - სხვამ არავინ.

შედევრი იყო მის მიერ გატანილი ორივე გოლი. ამათგან, პირველი გოლი მისთვის იყო მეასე - ჩემპიონთა ლიგის მატჩებში. შედევრი იყო ის საგოლე გადაცემაც, რომელიც არგენტინელმა გენიამ უსმან დემბელეს უბოძა. მესი თამაშობდა ისე, როგორც უნდა ითამაშოს მსოფლიოს საუკეთესო ფეხბურთელმა.

ტიბო კურტუას, "ჩელსის" შესანიშნავ მეკარეს, მხოლოდ კოშმარულ სიზმარში თუ მოელანდება მესი. როგორი საქმეა, "ბარსას" ჯადოქარმა ბურთი ორჯერ გაუტარა ფეხებშუა ბელგიელ კიპერს.

ზემოთაც ვთქვით - "ჩელსი" ცუდი სულაც არ იყო. ლონდონურმა კლუბმა ანტონიო კონტეს ხელმძღვანელობით ერთ-ერთი საუკეთესო შეხვედრა ჩაატარა. ჩვენდა გასაკვირად, გუნდი არ ჩაჯდა დაცვაში და ღია ფეხბურთი შესთავაზა მეტოქეს, მაგრამ "ჩელსის" არ ჰყავს მესი და, საერთოდ, მესი არავის ჰყავს, "ბარსას" გარდა...

ლონდონელები აუცილებლად დაემდურებოდნენ სლოვენიელ არბიტრ დამირ სკომინას, რომელმაც 11-მეტრიანი არ დანიშნა მასპინძელთა კარში. ამის მიუხედავად, მართლაც საცოდაობა იქნებოდა, ასე მოთამაშე კატალონიურ გრანდს ჩემპიონთა ლიგაში ძლევამოსილი სვლა მერვედფინალში შეეწყვიტა.

ლონდონელებმა ყველაფერი საკუთარ თავს უნდა დააბრალონ. მათ არაერთი ინდივიდუალური შეცდომა დაუშვეს და მასპინძლებმა ეს დიდებულად გამოიყენეს. გარდა ამისა, ერნესტო ვალვერდეს შეგირდებმა რამდენიმე აშკარა საგოლე მომენტიც გაანიავეს, თორემ ანგარიში გამანადგურებელი იქნებოდა. განსაკუთრებით კარგად უმკლავდებოდა "არისტოკრატთა" შეტევებს სამუელ უმტიტი.

მოკლედ, "ბარსელონა" მეოთხედფინალშია, "ჩელსი" კი - შინ, ანუ - კიდევ ერთი მსუყე მასალა კონტეს კრიტიკოსებისთვის.

"ბაიერნმა", პირველი მატჩის დარად, არც საპასუხო შეხვედრაში დააყარა კარგი დღე "ბეშიქთაშს". ჩემპიონთა ლიგის ერთ-ერთმა ფავორიტმა საქმე მიუნხენშივე მოითავა და თურქეთშიც მშვენივრად წაივარჯიშა.

მაშ ასე, უკვე ვიცით ჩემპიონთა ლიგის მეოთხედფინალის ყველა მონაწილე. ველოდებით წილისყრას...

ყოველდღიური სპორტული გაზეთი "ლელო"
1373
მკითხველის კომენტარები / 0 /
მსგავსი ამბები
რუბრიკის სხვა სიახლეები
;