ჩემპიონთა ლიგა. 1/8 ფინალი. რომაელები "გაყინეს" , დე ხეამ ფრთები "გამოისხა [VIDEO]

სევილია-მანჩესტერი 0:0

შახტარი-რომა 2:1
გოლები: 0:1 უნდერი (41), 1:1 ფერეირა (52), 2:1 ფრედი (71)

ჩემპიონთა ლიგის მორიგ სათამაშო დღეზე თხრობა, ნებისმიერ შემთხვევაში, უკრაინაში გამართული მატჩით უნდა დავიწყოთ. მართალია, დავით ხოჭოლავა "შახტარის" განაცხადში არ იყო, მაგრამ ჩვენ მაინც ვქომაგობთ დონეცკურ კლუბს, რადგან ჩემპიონთა ლიგაში ერთადერთი ჩვენებური გვყავს...

პირველი ტაიმი რომაელებმა მოიგეს. ძალიან თანაბარ 45 წუთში გადამწყვეტი აღმოჩნდა ჩენგიზ უნდერის გოლი. ამ ბოლო დროს, ეს ახალგაზრდა თურქი პირდაპირ შეუჩერებელია სერია A-ში და აგერ, ჩემპიონთა ლიგაშიც დაგვამახსოვრა თავი.

სადაც უნდერის გოლზე ვწერთ, იქ არც ედინ ჯეკოს დიდებული გადაცემა უნდა დავივიწყოთ. რომაელთა ბოსნიელმა ფორვარდმა გენიალური პასით "მოჭრა" უკრაინელთა მთელი დაცვა და ბურთი ლანგრით მიართვა უნდერს, ამ უკანასკნელის დარტყმულს კი მეკარე პიატოვმა ხელები წაატანა, მაგრამ გუნდის გადარჩენა ვეღარ შეძლო.

"რომას" პირველ ნახევარში კიდევ ჰქონდა მომენტები. თავის გამოჩენა შეეძლოთ იმავე ჯეკოსა და დიეგო პეროტის. რამდენიმე კარგი კომბინაცია ბრაზილიელებით გაძეძგილმა "შახტარმაც" ჩახლართა, მაგრამ უშედეგოდ - რომაელთა მცველები და მეკარე ალისონი მოწოდების სიმაღლეზე იყვნენ.

დაიწყო თუ არა მეორე ტაიმი, "შახტარმა" მეტოქეს ამოსუნთქვის საშუალება აღარ მისცა. 6-გრადუსიან ყინვაში "რომა" თითქოს მართლაც გაიყინა. იაროსლავ რაკიტსკის პასის შემდეგ შესანიშნავად გაისარჯა ფაკუნდო ფერეირა და ანგარიში გაათანაბრა.

შეხვედრისა და მთლიანად სათამაშო დღის მშვენება იყო ფრედის ჯარიმა, რომელმაც უკრაინულ კლუბს გამარჯვება მოუტანა. "შახტარმა" ორი ხომ გაიტანა და, კიდევ არაერთხელ უნდა აეღო რომაელთა კარი. რამდენიმე შემთხვევაში დიდებულად ითამაშა ალისონმა, ერთხელაც ცარიელი კარიდან ბურთი მცველმა გამოიტანა.

როგორც მოსალოდნელი იყო, მძიმე თამაში გამოვიდა სევილიაში, სადაც "მანჩესტერი" ფავორიტის რანგში ჩავიდა. პირველი ტაიმი თითქოს მოსაწყენად უნდა დასრულებულიყო, მაგრამ მასპინძელმა "სევილიამ" ასე არ ინება - დავიდ დე ხეამ ერთხელაც დაამტკიცა, რომ დღეს მსოფლიოს ერთ-ერთი საუკეთესო მეკარეა.

ჯერ იყო და, სტივენ ნზოზის მიერ თავით დარტყმული ურთულესი ბურთი მოიგერია, მერე კი არც ლუკას მურიელს გაატანინა.

ჟოზე მოურინიოს მატჩის დასაწყისშივე დაუშავდა ესპანელი საყრდენი ანდერ ერერა და მოედანზე პოლ პოგბას უხმო. ისე, რატომ არ იყო ფრანგი ძირითადში? ეს მოურინიოს უნდა ვკითხოთ. ამბობენ, მწვრთნელსა და შეგირდს შორის "შავმა კატამ" გაირბინაო...

მეორე ტაიმში თამაშის საერთო სურათი დიდად არ შეცვლილა. ინიციატივას კვლავ "სევილია" ფლობდა. კლემან ლენგლეს შესანიშნავი საგოლე შანსი მიეცა, მაგრამ ისევ დიდებული იყო დე ხეა. თამამად შეგვიძლია ესპანეთის ნაკრების მეკარე სათამაშო დღის საუკეთესო ფეხბურთელად შევრაცხოთ.

...და ბოლოს იყო რომელუ ლუკაკუს გოლი, რომელიც არბიტრმა არ ჩათვალა. ნამდვილად უსამართლობა იქნებოდა, ეს თამაში "წითელ ეშმაკებს" მოეგოთ.

მოურინიომ ერთხელაც დაამტკიცა, რომ ფეხბურთის სანახაობრივი მხარე მისთვის არაფერს ნიშნავს...

ყოველდღიური სპორტული გაზეთი "ლელო"
895
მკითხველის კომენტარები / 0 /
მსგავსი ამბები
რუბრიკის სხვა სიახლეები
;