ჩემპიონთა ლიგა. 1/8 ფინალი. "უკანასკნელი ტანგო" პარიზში [VIDEO]

"პარი სენ-ჟერმენმა" საშინაო მატჩში ვერ გააბათილა ორბურთიანი ჩამორჩენა და ჩემპიონთა ლიგის მეოთხედფინალში ზინედინ ზიდანის "რეალი" გაუშვა.

ლივერპული-პორტუ 0:0 (5:0)

ლივერპული (4-3-3): კარიუსი - გომესი, მატიპი, ლოვრენი, მორენო - ჯანი (80. კლავანი), ჰენდერსონი, მილნერი - მანე (74. სალაჰი), ლალანა, ფირმინო (62. ინგსი).

პორტუ (4-4-2): კასილიასი - მაქსი პერეირა, ფელიპე, რეიესი, დალოტი - კოშტა, ტორესი, ანდრე (62. სერჟიო ოლივეირა), კორონა - აბუბაქარი (80. პასიენსია), მაჯიდი (68. რიკარდო პერეირა).

პსჟ-რეალი 1:2 (1:3)

გოლები: 0:1 რონალდო (51), 1:1 კავანი (71), 1:2 კაზემირო (80)

პსჟ (4-3-3): არეოლა - დანი ალვეში, ტიაგო სილვა, მარკინიოსი, ბერჩიჩე - ვერატი, მოტა (59. პასტორე), რაბიო - დი მარია (76. დრაქსლერი), მბაპე (65. დიარა), კავანი.

რეალი (4-4-2): ნავასი - კარვახალი, რამოსი, ვარანი, მარსელო - ლუკასი, კაზემირო, კოვაჩიჩი (71. კროოსი), ასენსიო (82. ისკო) - რონალდო, ბენზემა (76. ბეილი).

პარიზელებს ტრავმის გამო არ ჰყავდათ ნეიმარი. თქმა რად უნდა იმას, რომ ბრაზილიელი ვარსკვლავის არყოფნა მასპინძელთათვის დიდზე დიდი დანაკლისი იყო, მაგრამ, სადაც ამას ვწერთ, ისიც დავწეროთ, რომ "სამეფო კლუბის" სასტარტოში არ იყვნენ ტონი კროოსი, ლუკა მოდრიჩი, გარეთ ბეილი...

შეხვედრის განმავლობაში არ ყოფილა ერთი წამიც კი, როცა "რეალის"უპირატესობა ეჭვქვეშ დადგებოდა. გასაგებია, ნეიმარის არყოფნა სერიოზული საბუთია თავის გასამართლებლად, მაგრამ მაინც ვერ არის რკინის არგუმენტი. ჯერ ერთი, მადრიდულ შეხვედრაში ბრაზილიელმა ითამაშა, და მეორეც, როცა გუნდს დიდი ჯილდოების მოგება სურს, მხოლოდ ერთ, თუნდაც ასეთი დონის ფეხბურთელზე არ უნდა იყოს დამოკიდებული...

კონკრეტულ მომენტში "რეალის" წარმატების ახსნა ერთი სიტყვით შეიძლება და ამ სიტყვას "კლასი" ჰქვია. კიდევ ერთი: დიდ ჯილდოებსა და გადამწყვეტ მატჩებს, ალბათ, ვერასოდეს მოიგებენ უნაი ემერის დონის მწვრთნელები...

"პარი სენ-ჟერმენის" ხელმძღვანელობა მაშინ უნდა დაფიქრებულიყო სამწვრთნელო საკითხზე, როცა წინა სეზონში ემერის გაწვრთნილ გუნდს ნაღდი კატასტროფა მოუვიდა "ბარსელონასთან". არადა, გუშინ ითქვა - ზაფხულში, შეიძლება, პარიზული კლუბის დამრიგებლად... ზიდანი ვიხილოთო...

რა და როგორ იქნება მომავალში, ამას ერთად ვნახავთ. გუშინ კი ჩვენ ვნახეთ კრიშტიანო რონალდოს მორიგი გოლი, წყობიდან გამოსული მარკო ვერატი და მისი წითელი ბარათი... არადა, ვერატი ერთადერთი კაცი იყო პარიზელთა შორის, ვინც "რეალის" კლასმა არ დათრგუნა.

ვნახეთ ასევე ედინსონ კავანის კონტექსტიდან ამოვარდნილი გამთანაბრებელი გოლი და ისევ "რეალის" ზეობა, რომელიც კაზემიროს გოლშიც გამოიხატა.

ამას არავინ ელოდა: ორმატჩიან დუელში "რეალმა" შავი დღე აყარა "პარი სენ-ჟერმენს", რომლის შანსებიც წილისყრის შემდეგ მეტოქეზე ნაკლებად როდი ფასობდა, თუ მეტად არა. ვარსკვლავური გუნდის უკანასკნელი საჩემპიონთალიგო "პარიზული ტანგო" ძალიან უღიმღამო გამოდგა.

პსჟ საფრანგეთის ჩემპიონი ნებისმიერ შემთხვევაში გახდება, ჩემპიონთა ლიგაზე კი გუნდი ვერაფერს აკეთებს, რითაც მილიონები წყალში იყრება.

"ლივერპულმა" პირველივე შეხვედრაში (5:0) მოუთავა საქმე "პორტუს" და, რა გასაკვირია, რომ "ენფილდის" მატჩი სრულ ფორმალობად იქცა - უგოლო ფრე და "ლივერპული" დამაჯერებლად გადის ჩემპიონთა ლიგის მეოთხედფინალში...

ყოველდღიური სპორტული გაზეთი "ლელო"
1158
მკითხველის კომენტარები / 0 /
მსგავსი ამბები
რუბრიკის სხვა სიახლეები
;