ჩემპიონთა ლიგა: 31 გოლი 8 მატჩში!

ჯგუფური ეტაპის მესამე ტურის 8 შეხვედრაში 31 გოლი გავიდა, რაც საშუალოდ 3.9 გოლს უტოლდება ერთ მატჩში.

E ჯგუფი
მანამდე მოგების არმქონე "ლივერპულმა" სლოვენიაში გაილაღა და "მარიბორს" 7 უპასუხო გოლი გაუტანა. დუბლები შეასრულეს ფირმინომ და სალაჰმა.
შედარებით მოულოდნელი აღმოჩნდა მოსკოვის "სპარტაკის" გამარჯვება "სევილიასთან". ჯანო ანანიძის (რომელსაც ტრავმის გამო არ უთამაშია) გუნდმა ესპანელები 5:1 დაამარცხა.

F ჯგუფი
ჩვენთვის საინტერესო იყო "ფეიენოორდისა" და "შახტარის" დაპირისპირება, რომელიც უკრაინელებმა 2:1 მოიგეს. 75-ე წუთზე მოედნიდან გააძევეს შახტარელი რაკიცკი, ორ წუთში კი მოედანზე გამოვიდა დავით ხოჭოლავა.
ორი პენალტი დაინიშნა "მანჩესტერ სიტის" კარში, რომელთაგან "ნაპოლიმ" ერთი გაიტანა და ინგლისელებმა 2:1 მოიგეს.

G ჯგუფი
ჯგუფის ლიდერმა "ბეშიქთაშმა" მესამე მატჩიც მოიგო, რითაც მომდევნო ეტაპისკენ დიდი ნაბიჯი გადადგა. მონაკოს ჯგუფიდან გასვლის შანსი კი მინიმუმამდე დაიყვანა. "მონაკო"-"ბეშიქთაში" 1:2.
"ლაიპციგმა" და "პორტუმ" გოლები პირველ ტაიმში მოითავეს - 3:2 გერმანელთა სასარგებლოდ. მეორე ტაიმი მშრალად დასრულდა.

H ჯგუფი
კარგად ეთამაშა მადრიდში "რეალს" "ტოტენჰემი", იგებდა კიდეც, თუმცა კრიშტიანო რონალდოს პენალტით ესპაელებმა ანგარიში 43-ე წუთზე გაათანაბრეს და - 1:1.
ასეთივე ანგარიშით დასრულდა კვიპროსული აპოელისა და დორტმუნდის "ბორუსიას" შეხვედრა.

944
მკითხველის კომენტარები / 0 /
მსგავსი ამბები
რუბრიკის სხვა სიახლეები