ჩემპიონმა მიტაკეუმიმ ლევან გორგაძე ახსენა - ' როცა ტოჩინოშინი ოძეკი გახდა ამან ფრთები შემასხა'

ნაგოიას ბაშოს მე-14 დღეს სეკივაკე მიტაკეუმიმ მე-13 მაეგაშირა ტოჩიოძანი დაამარცხა და იმპერატორის თასი დაიბევა. 25 წლის ნაგანოელი სუმოისტი კარიერაში პირველად გახდა ბაშოს ჩემპიონი.

აღსანიშნავია, რომ მიტაკეუმი და ტოჩინოშინი (ლევან გორგაძე), რომელიც ბაშოს მე-7 დღიდან ტრავმის გამო გამოაკლდა, ერთმანეთში მეგობრობენ.

იანვარში იმპერატორის თასის მოგება ერთ-ერთმა პირველმა ქართველს სწორედ მიტაკეუმიმ მიულოცა. იაპონელმა ტოჩინოშინი საჩემპიონო ინტერვიუშიც ახსენა:

"ძალიან ვნერვიულობდი, თუმცა თავი მოვთოკე და ეს ორთაბრძოლაც მოვიგე. საოცარი გრძნობა იყო, როცა დავინახე ჩემი გამარჯვება ამდენმა ადამიანმა რომ დააფასა.

როცა ტოჩინოშინი ოძეკი გახდა ამან ფრთები შემასხა. ვფიქრობდი, რომ მეც შემიძლია ოძეკის რანგში გადასვლა. ჩვენი კლუბები ახლოსაა ტოკიოში და ხშირად ერთად ვვარჯიშობთ. ამან შედეგი გამოიღო და ახლა მეც მოვიგე იმპერატორის თასი".

ჯურიოს დივიზიონში ბოლოსწინა დღეს გადამწყვეტი, მე-8 მარცხი იგემა გაგამარუმ (თეიმურაზ ჯუღელი), მას უვატედაშინაგეს ილეთით აზუმარუმ მოუგო. გაგამარუმ საბოლოოდ დაიამამისთან იმარჯვა და ნაგოიას ბაშო მინიმალური უარყოფითი ბალანსით დაასრულა - 7-8. იგი რეიტინგში დაქვეითდება (ახლა ჯურიოს მე-9 ნომერია), მაგრამ ელიტის მეორე დივიზიონიდან არ გავარდება.

ახალი რეიტინგი 27 აგვისტოს გამოქვეყნდება, სექტემბრის ბაშო კი 9-23 სექტემბერს ტოკიოში გაიმართება. ამ ბაშოზე ტოჩინოშინს ოძეკის ტიტული ექნება დასაცავი, რისთვისაც დადებითი ბალანსი ესაჭიროება.

საბოლოო მდგომარეობა
13-2: მიტაკეუმი (სეკივაკე)
12-3: იუტაკაიამა (მაეგაშირა 9)
11-4: ასანოიამა (მ 13), ჰოკუტოფუჯი (მ 16)
10-5: გოეიდო (ოძეკი), ტაკაკეიშო (მ 3), ონოშო (მ 11), ტოჩიოძანი (მ 13).

პრიზები
იმპერატორის თასი: მიტაკეუმი (სეკივაკე), პირველად
ჯურიოს ჩემპიონი: ტაკანოივა
მაკუშიტას ჩემპიონი: ჰაკუიოძანი
ბრწყინვალე ასპარეზობა: მიტაკეუმი
მებრძოლი სული: იუტაკაიამა, ასანოიამა
ტექნიკური რიკიში: მიტაკეუმი

ყოველდღიური სპორტული გაზეთი "ლელო"
1927
მკითხველის კომენტარები / 0 /
რუბრიკის სხვა სიახლეები