ჩემპიონმა ტიტული დაკარგა, ველით ახალ ჩემპიონს

საქართველოს ჩემპიონი თბილისის „ლოკომოტივი“ გასავარდნ ფინალში, მარნეულის „არმაზთან“ დრამატულ ბრძოლაში დამარცხდა.

შესაბამისად, რაგბიში საქართველოს ახალი ჩემპიონი ეყოლება. დიდი ფინალის ერთი მონაწილის ვინაობა უკვე ცნობილია. „ბათუმმა“ შესარჩევ ფინალში „ხარებს“ სძლია და ახლა ჩემპიონის ტიტულამდე ერთი მოგებაღა აშორებს. 

ბათუმი-ხარები 32:10 
ბათუმი: 4ლ - ნინიძე, ქოიავა, თუთბერიძე, სიჭინავა. 3გ, 2ს - ნინიძე. 
სინბინი: გოგიტიძე
ხარები: 2ლ - ნატრიაშვილი, ბუჯიაშვილი. 
მსაჯი: სულხან ჩიხლაძე

„ბათუმმა“ რუსთავის „ხარებთან რეგულარულ გათამაშებაში ორივე მატჩი წააგო, როგორც შინ, ისე მეტოქის მოედანზე. ერთი შეხედვით რუსთაველები შავიზღვისპირელებისთვის უხერხულ მეტოქედ ჩამოყალიბდნენ. თუმცა, შესარჩევი ფინალის მატჩმა გვაჩვენა, რომ ვითარება სრულიად სხვაგვარია. 

„ბათუმმა“ მატჩი მაქსიმალურად მობილიზებულმა ჩაატარა და მეტოქისთვის თამაშის მსვლელობის არცერთ ეტაპზე გამარჯვების მოპოვების იოტისოდება შანსიც არ მიუცია. პირველი ტაიმი მასპინძლებმა 22:5 მოიგეს, რაც, თავისთავად ცხადია, ასეთი დონის მატჩში საკმაოდ დიდი უპირატესობაა. რუსთაველებს მხოლოდ სასწაული თუ გადაარჩენდა, მაგრამ მისი ჩადენის ძალა „ხარებს“ არ აღმოაჩნდა. 

მეორე ტაიმში ბათუმელთა უპირატესობა კიდევ უფრო გაიზარდა და 66-ე წუთისთვის ისინი უკვე 32:5 იგებდნენ. „ხარებმა“ დარჩენილ დროში მხოლოდ ერთი გარდაუსახავი ლელოს გატანა მოახერხეს და დიდ ფინალში გზა „ბათუმს“ დაუთმეს. თავად კი ერთი კვირის თავზე წინასწარ ფინალში მარნეულის „არმაზთან“ მოუწევთ დაპირისპირება, რათა ჩემპიონობისთვის ბრძოლა განაგრძონ. 

ლოკომოტივი-არმაზი 20:21
ლოკომოტივი: 3ლ - არაბული, ხელაია, წიკლაური. ს, გ - წიკლაური. 
არმაზი: ლ - კვესელაძე, გიგაური. 3ს, გ - ჯინჭველაშვილი 
მსაჯი: საბა აბულაშვილი 

თბილისის „ლოკომოტივმა“ ჩემპიონის ტიტული დაკარგა. რკინიგზელებმა დრამატულ მატჩში თამაშის უკანასკნელ წუთებზე დათმეს შეხვედრა. არადა, მატჩის პირველ ნახევარში საგრძნობ უპირატესობას ფლობდნენ. გაგა არაბულმა და იოანე ხელაიამ თითო ლელო მიითვალეს, რომელიც რკინიგზელებმა ვერ გარდასახეს. ამაზე „არმაზის“ მგეზავმა რეზო ჯინჭველაშვილმა ორი საჯარიმოთი უპასუხა - 6:10. ასე დასრულდა პირველი ტაიმი. 

შესვენების შემდეგ „ლოკომოტივი“ მალევე კიდევ უფრო დაწინაურდა ბექა წიკლაურის საჯარიმოს წყალობით - 13:6. „არმაზმა“ კი ანგარიშში პირველად დაწინაურება 67-ე წუთზე შეძლო, როცა გარემარბი ნიკა გიგაურის ფლანგური გარღვევა შუამარბმა გიორგი კვესელაძემ ლელოთი დაასრულა - 14:13.
რკინიგზელებს საპასუხო ლელოს გასატანად შვიდი წუთი დასჭირდათ. ამჯერად თავი წიკლაურმა გამოიჩინა, რომელმაც თავისივე გატანილი ლელო გარდასახა - 20:14. თამაშის დასრულებამდე ერთი წუთი იყო დარჩენილი, როცა ისევ არმაზელთა გარემარბმა ნიკა გიგაურმა გაიბრწინა. მან მეტოქეს უმნიშვნელოვანესი ლელო გაუტანა და ანგარიშში სხვაობა მინიმუმამდე შეამცირა - 19:20.

ჯინჭველაშვილმა გარდასახვა ზუსტად დაარტყა, თავისიანები ერთი ქულით დააწინაურა 21:20 და კლუბს თავის ისტორიაში უმნიშვნელოვანესი გამარჯვება მოუტანა. 

„არმაზი“ წინასწარ ფინალში სტუმრად რუსთავის „ხარებს“ დაუპირისპირდება და გამარჯვების შემთხვევაში დიდ ფინალში ითამაშებს. რუსთავში დამარცხებული გუნდი ბრინჯაოს მედლების მფლობელი გახდება. 

წინასწარი ფინალი 

5 მაისი
ხარები-არმაზი 

გადასასვლელი პლეი ოფი 
ვეფხვები-იუნკრები 22:6 (15:47)

უმაღლეს ლიგაში გადასასვლელ-დასარჩენ პლეი ოფში პატარძეულის „ვეფხვებმა“ განმეორებით შეხვედრაში კიკეთის „იუნკრებს“ უმასპინძლა და 22:6 დაამარცხა. თუმცა, ვინაიდან პირველი მატჩი მეტი, 32-ქულიანი სხვაობით ჰქონდა წაგებული, ორი მატჩის ჯამში გამარჯვება „იუნკრებს“ დარჩათ. შესაბამისად, მომავალ სეზონში უმაღლეს ლიგაში კიკეთის „იუნკრები“ ითამაშებს. „ვეფხვები“ კი პირველ ლიგაში დაბრუნდება. ეს პირველი შემთხვევაა, როცა პირველი ლიგიდან უმაღლესში ერთბაშად ორი გუნდი აღზევდა. 

შეგახსენებთ, რომ პირველ ლიგაში პირველი ადგილი ბოლნისის „ყოჩებმა“ დაიკავა და უმაღლეს ლიგაში ბოლო ადგილზე გასული თბილისის „არმია“ ავტომატურად შეცვალა. მეორეადგილოსანმა „იუნკრებმა“ კი, როგორც უკვე ვთქვით, ბოლოდან მეორე ადგილზე გასული „ვფხვები“ პლეი ოფში დაამარცხა. 

ყოველდღიური სპორტული გაზეთი "ლელო"
797
მკითხველის კომენტარები / 0 /
მსგავსი ამბები
რუბრიკის სხვა სიახლეები
;