ჩემპიონობა გოლის გაუშვებლად! ანუ როგორ დაამარცხა დინამომ დორტმუნდი...

ლიეტუვაში წელს "ატეიტისის თასის" საიუბილეო გათამაშება ტარდება. ტურნირი რამდენიმე ასაკობრივ კატეგორიაში იმართება და წელს დინამოელები იქ 5 გუნდით არიან  წარმოდგენილები.

ბალტიისპირეთში პირველი ზურა ელიავას 11-წლამდელთა გუნდი გაემგზავრა. დინამოელებმა ჯგუფში 4 მატჩი გამართეს და ოთხივეში გოლგაუშვებლად გაიმარჯვეს: სასტარტო შეხვედრაში თბილისელებმა ადგილობრივი "ტფა ბლუ" 4:0 დაამარცხეს.

ბართიშვილმა ორი გოლი გაუტანა მეტოქეს, ხოლო თითო ზუსტი დარტყმა კაკაშვილისა და ციკოლიას ანგარიშზეა. მეორე მატჩში დინამომ ხარებაშვილისა და შათირიშვილის გოლებით მინსკის "დინამოს" 2:0 მოუგო.

მესამე მატჩში "დინამოს" წინააღმდეგობას სანკტ-პეტერბურგის "ენჯელბოლი" უწევდა. ადუაშვილის, ხარებაშვილის, ბენდელიანის და ლომაძის გოლებით პატარა ქართველებმა 4:0 მოიგეს. ჯგუფში ბოლო მატჩი თბილისელებმა ასევე 4:0 დაასრულეს. ელიავას გუნდმა ამჯერად უჟგოროდის "ჩაიკას" აჯობა.

ორი გოლი ბართიშვილმა გაიტანა, თითოც ბენდელიანისა და ადუაშვილის ანგარიშზეა. დინამოელებმა ჯგუფში პირველი ადგილი დაიკავეს.

მეოთხედფინალში ჩვენმა ბიჭებმა "ანთალიასფორი" 5:0 დაჯაბნეს. ადუაშვილმა 3 გოლი გაიტანა, თითო ბურთი კი კაკაშვილისა და ბართიშვილის ანგარიშზეა. ნახევარფინალში ელიავას გუნდს მეტოქეობას დორტმუნდის "ბორუსია" უწევდა. მატჩი დაძაბულად და გარდამავალი უპირატესობით წარიმართა. თბილისელებმა მეორე ტაიმში ლამაზი კომბინაციით მოახერხეს გოლის (ბენდელიანი) გატანა და მატჩის გამარჯვებამდე მიყვანა. 

მასპინძელ ვილნიუსის "ჟალგირისთან" საკმაოდ დაძაბული და ორმხრივი იერიშებით მიმდინარე ფინალური მატჩის ბედი ხარებაშვილის ზუსტი საჯარიმო დარტყმით გადაწყდა. 

დინამოელებმა ინდივიდუალური ტიტულებიც მოიპოვეს. ტურნირის საუკეთესო მეკარის ჯილდოთი თბილისელთა ორივე მეკარე დაჯილდოვდა, რაც უპრეცედენტო ფაქტია. პრიზები მიიღეს ასევე გიორგი ბაშარულმა და ირაკლი ერიაშვილმა. ტურნირის საუკეთესო ნახევარმცველი კი ანდრია ბართიშვილი გახდა.

ზურაბ ელიავას გუნდი ვილნიუსში შემდეგი შემადგენლობით იმყოფებოდა: ირაკლი ერიაშვილი, გიორგი ბაშარული, თორნიკე შუბითიძე, საბა ხარებაშვილი, ლუკა ციკოლია, გიორგი ლომიძე, ნიკა შათირიშვილი, ნიკა ადუაშვილი, ანდრია ბართიშვილი, კობა კაკაშვილი, ნიკა ბენდელიანი, შოთიკო დიაკონიძე, გიორგი ჯანელიძე და ცოტნე ხარებავა.

1107
მკითხველის კომენტარები / 0 /
მსგავსი ამბები
რუბრიკის სხვა სიახლეები
;