'ჩვენი პლუსი სტაბილურობა, ხედვა და წესიერებაა' - ტარიელ ხეჩიკაშვილი 'საბურთალოს' წარმატებაზე

ისტორიაში პირველად, "საბურთალო" საქართველოს ჩემპიონი გახდა. 1999 წლიდან ამ საფეხბურთო კლუბს ბევრი მიღწევა ჰქონდა შიდა ასპარეზზე და რეალურად, ორიოდე კლუბთან ერთად ის იშვიათი გამონაკლისია, რომელიც საქართველოს ნაკრებს ფეხბურთელებს უზრდის.

"საბურთალო" რამდენჯერმე აღიარეს საუკეთესო საფეხბურთო სკოლად, მისი ასაკობრივი გუნდები არაერთხელ გახდნენ საქართველოს ელიტლიგის გამარჯვებულები, მაგრამ პროფესიული კლუბი მხოლოდ 2013 წელს დააფუძნეს, ხოლო 2015 წელს უმაღლეს ლიგაში პირველად იასპარეზეს...

"საბურთალოს" პრეზიდენტი ტარიელ ხეჩიკაშვილი ჩემპიონობაზე, განვლილ გზასა და სამომავლო საქმეებზე გველაპარაკა...

ეძღვნება ქართლოს ჭუმბურიძისა და დავით პეტრიაშვილის ხსოვნას

- ათგუნდიან ჩემპიონატში შემთხვევით ჩემპიონი ვერავინ გახდება. ეს ურთულესი მარათონია, სადაც ოქროს მედლები უშუალო კონკურენტთან გამარჯვებით მოვიპოვეთ. ეს იყო ლოგიკური შედეგი იმ თანამიმდევრული პოლიტიკისა, რომელიც დამფუძნებლებმა, მწვრთნელთა შტაბმა, ფეხბურთელებმა, სპონსორებმა და გულშემატკივრებმა გასწიეს. მადლობა მედიას, რომლის თანადგომასაც მუდამ ვგრძნობდით და გვეხმარებოდა, რომ დროული და სწორი დასკვნები გამოგვეტანა.

"საბურთალო" იმისთვის ჩამოყალიბდა, ქართული ფეხბურთის ღირსება დაეცვა და ჩვენი მხრივ შეგვეწყო ხელი საქართველოში საკლუბო და სანაკრებო ფეხბურთის განვითარებისთვის. უნდა დაგვემტკიცებინა, რომ პრობლემა არა ნიჭიერებებაში, არამედ - მენეჯმენტში იყო.

ჩვენი უმთავრესი ფასეულობებია პროფესიონალიზმი და "ფეარ პლეის" წესების დაცვა, მისია კი - ნიჭიერი ფეხბურთელების გაზრდა, წარმოჩენა და მათი ევროპულ ასპარეზზე გაყვანა, რათა მერე საქართველოს ნაკრებს ღირსეული ცვლა გავუზარდოთ. ახლა ჩვენი მისია ევროპულ საკლუბო ტურნირებზე საქართველოს ღირსეული წარმოჩენაცაა.

წარმატების გასაღები არის სტაბილურობაში, ხედვებში, სწორ მენეჯმენტსა და წესიერებაში. საერთოდ, "საბურთალოს" მთავარი ფასეულობა ადამიანია - ამან ყველაზე დიდი როლი ითამაშა ჩვენს წინსვლაში. ეს კი გუნდის დამფუძნებლების, ქართლოს ჭუმბურიძისა და დავით პეტრიაშვილის დამსახურებაა - ამ გამარჯვებას მათ ხსოვნას ვუძღვნით.

წარმატებული პროექტები

- სამწუხაროდ, სამხრეთელებს გრძელვადიანი პროექტების განხორციელებისთვის მოთმინება და ენერგია არ გვყოფნის და საქართველოშიც ასეთი სტერეოტიპი დაკვიდრდა - ჩვენ შევეცადეთ, ეს სტერეოტიპი დაგვენგრია.

კონკრეტული სამოქმედო გეგმა გვქონდა და რამდენიმე პროექტი განვახორციელეთ. ექსპერიმენტული პროექტი 1993 წელს დაბადებულთა გუნდში დავიწყეთ, რომელსაც გიორგი დევდარიანი წვრთნიდა. ამ გუნდიდან საქართველოს ნაკრებს გავუზარდეთ ჭანტურია, ყაზაიშვილი, ხოჭოლავა, პარუნაშვილი... ყველა იმ მწვრთნელის მადლიერები ვართ, რომლებსაც ჩვენს აკადემიაში ფეხბურთელები გაუზრდიათ და "საბურთალოს" სახელი შეუქმნეს. ჩვენთან ფეხბურთელებთან ერთად, ბევრი მწვრთნელიც გამოჩნდა.

წარმატებულმა პროექტმა გვაჩვენა, რომ სწორი გზა ავირჩიეთ და შემდეგ მეორე პროექტი მთელს აკადემიაში განვახორციელეთ. ჩამოვიყვანეთ ესპანელი სპეციალისტი და ნიჭიერი ბავშვების ახალი თაობა გავზარდეთ.

მესამე პროექტი - რეგიონში წარმატებული აკადემიის სახელი უნდა მოგვეპოვებინა. საამისოდ, "ფოლკსვაგენის" და "სალერის" თასებს ვუმასპინძლეთ და სამგზის გამარჯვებულები გავხდით - ფინალებში კი დავამარცხეთ "ვიტესი", "მალაგა" და მადრიდის "ატლეტიკო". დღეს ევროპაში იციან, რომ საქართველოში არის "საბურთალო", სადაც ნიჭიერი მოთამაშეები იზრდება.

ჩვენი 19-წლამდელთა გუნდი პირველი ქართული გუნდია, რომელმაც უეფას ახალგაზრდულ ლიგაზე იასპარეზა, თანაც, ორჯერ. 2017 წელს გათამაშებიდან "ბურსა" გამოვაგდეთ - ეს იუნიორთა ლიგაზე ქართული გუნდის პირველი გამარჯვება იყო.

მეოთხე პროექტი პროფესიული საფეხბურთო კლუბის ჩამოყალიბება იყო, რომელიც ეროვნულ ლიგაში სტაბილურად წარმატებით ითამაშებდა და საკუთარი გაზრდილებით მოვამარაგებდით და ყოველ წელს უკეთეს შედეგს დააფიქსირებდა. ეს მრავალწლიანი პროექტი იყო და უმაღლეს ლიგაში 17 წლის ბიჭებით გადავედით, სადაც ზედიზედ სამი წელია წარმატებით ვთამაშობთ. ჩვენი განვლილი გზა სამაგალითოა, რადგან პირველი კლუბი ვართ, რომელიც საკუთარი გაზრდილებით უმაღლეს ლიგაში გადავიდა და ჩემპიონი გახდა.

ახლა მეხუთე პროექტის დრო დადგა - ამ მოდელმა ქართულ საფეხბურთო სივრცეში უპრეცედენტო წარმატება განაპირობა - უმაღლესი ლიგიდან ევროთასებზე გავედით. ეს "საბურთალოს" განვითარებისთვის ახალი ბიძგია.

გუნდის გაძლიერებაზე

- "საბურთალოს" ერთ-ერთი პლუსი სწორი სატრანსფერო პოლიტიკაა და მჯერა, ახალი სეზონისთვის მოთამაშეებს ისევე შეარჩევს ჩვენი მწვრთნელი გიორგი ჭიაბრიშვილი, როგორც ეს წელს მოახერხა. ეს მისი კომპეტენციაა და მასში ვერ ჩავერევი. გიორგის ვენდობით, მას დიდი წვლილი მიუძღვის ამ წარმატებაში, ის საქართველოს ერთ-ერთი გამორჩეული სპეციალისტია და ამ ნდობას იმსახურებს.

ჩვენ კი ძირითადი ბირთვის შენარჩუნება და კონკურენციის გაზრდაც გვსურს. ბუნებრივია, ლეგიონერებით გაძლიერებაც გვსურს, რაც კონკურენციას კიდევ უფრო გაზრდის. უკვე ვმუშაობთ სხვადასხვა მიმართულებით - ევროპაშიც, სამხრეთ ამერიკაშიც და აფრიკაშიც.

ახალი ინფრასტრუქტურა

- ამ წლების განმავლობაში, კლუბის განვითარებისთვის, რამდენიმე- მილიონიანი ინვესტიცია განხორციელდა - უპირველესად, სათამაშო მოედნების ასაშენებლად და ინფრასტრუქტურის შესაქმნელად.

დაგეგმილია ახალი სასტუმროს მოწყობა, სადაც "საბურთალოში" რეგიონებიდან ჩამოსული ნიჭიერი ბავშვები იცხოვრებენ და ექნებათ კვების ბლოკი, ფიტნეს-დარბაზი და რეაბილიტაციის ცენტრი.

ახლა მოთხოვნაა ინფრასტრუქტურის გაუმჯობესებასა და ახალ სტადიონზე - ვეძებთ ტერიტორიას, სადაც საკუთარ არენას ავაშენებთ.

ხარაიშვილზე

- ჩვენმა მოთამაშეებმა სტაჟირება გაიარეს "რეალში", "ბარსელონაში", "მანჩესტერ სიტიში", "ლივერპულში", "ვიტესში"... "საბურთალო" გახდა "ფანჯარა" ევროპაში და ახლა იქ ბევრი ჩვენგანი თამაშობს.

ბოლო მაგალითი ხარაიშვილია. მას უცხოეთში წასვლის შანსი რომ მიეცა, გავუშვით და მიგვაჩნია, რომ ამით საქართველოს ნაკრების დონის მოთამაშის ჩამოსაყალიბებლად მნიშვნელოვანი ნაბიჯი გადავდგით, გიორგი კი სხვებით ჩავანაცვლეთ.

"გიოტებორგში" ხარაიშვილმა იმდენად გამოიჩინა თავი, მის მიმართ ახლა დიდი მოთხოვნაა და დარწმუნებული ვარ, ისეთ ძლიერ ევროპულ კლუბში მოხვდება, რომელიც მას განვითარებასა და კიდევ უფრო ძლიერ კლუბში გადასვლაში შეუწყობს ხელს.
რაც შეეხება იმას, დარჩება თუ არა "გიოტებორგში", ეს უახლოეს პერიოდში გაირკვევა.

რეფორმები

- ფეხბურთის ფედერაციის რეფორმებმა და ერთა თასზე ეროვნული ნაკრების წარმატებულმა გამოსვლამ ხალხს ფეხბურთისადმი ინტერესი გაუღვიძა და იმედი დაუბრუნა. ცალსახაა, რომ ეროვნული ლიგის ახალმა ფორმატმა გაამართლა.

ჩვენ ვართ იმ რეფორმების მომსწრე, რომელიც შედეგს აუცილებლად გამოიღებს. ამის ინიციატორი კი ფეხბურთის ფედერაციის ახალი გუნდია. იქ წესიერი ხალხია, რომელსაც ხელისუფლებამ დაუჭირა მხარი - მსგავსი მხარდაჭერა ფეხბურთს არასოდეს ჰქონია და ეს იყო რეფორმების წინაირობა. გავა 10 წელი, ამ რეფორმების შედეგს ყველა კარგად დაინახავს და ქართველ გულშემატკივარს იმ დიდ სიხარულს მივანიჭებთ, რაც მას ასე მოენატრა.

ყოველდღიური სპორტული გაზეთი "ლელო"
1568
მკითხველის კომენტარები / 0 /
მსგავსი ამბები
რუბრიკის სხვა სიახლეები
;