ჩვენ და კვიპროსელები - ერთი, ერთი და სამი

ფოტოზე: 2008 წლის 11 ოქტომბერი. საქართველო-კვიპროსი 1:1

დღეს, გორში, საქართველოს ეროვნული ნაკრები ამხანაგურ მატჩში უმასპინძლებს კვიპროსის ნაკრებს და ეს იქნება მეოთხე შემთხვევა, როცა ჩვენი უპირველესი გუნდი თბილისის გარეთ ჩაატარებს საშინაო შეხვედრას.

იმედი დავიტოვოთ, რომ 17-წლიანი პაუზის მერე რეგიონში გამართული მატჩი ისეთივე წარმატებული იქნება, როგორიც წინა სამი შემთხვევა იყო. მით უფრო, რომ ჩვენი დღევანდელი მეტოქე ნამდვილად არ განეკუთვნება გრანდების რიცხვს: საქართველოს ნაკრების მსგავსად, კვიპროსის ნაკრებსაც არასდროს უასპარეზია ევროპისა თუ მსოფლიოს ჩემპიონატების ფინალურ ეტაპებზე. მაგრამ, ისიც უნდა ვაღიაროთ, რომ საკლუბო დონეზე ჩვენზე ბევრად წინ არიან და ამის მიზეზი, რა თქმა უნდა, ჩინებული ინფრასტრუქტურა და იქაურ კლუბებში არცთუ ურიგო ლეგიონერების სიმრავლეა...

თუმცა, ისევ სანაკრებო დონეს დავუბრუნდეთ და ვთქვათ, რომ დღესდღეობით კვიპროსის ნაკრები ფიფას რეიტიგში 86-ე ადგილზეა და 21 საფეხურით გვისწრებს. ახლახან დასრულებულ შესარჩევ ციკლში, ებრაელი მწვრთნელის, რან ბენ შიმონის ხელმძღვანელობით მოასპარეზე კვიპროსის ნაკრებმა, საქართველოს მსგავსად, ექვსგუნდიან ჯგუფში V ადგილი დაიკავა.

თუმცა, ისიც უნდა აღვნიშნოთ, რომ ჩვენგან განსხვავებით, 2018 წლის მსოფლიოს ჩემპიონატის შესარჩევი ციკლი კვიპროსის ნაკრებმა 3 გამარჯვებით დაასრულა. ამ სამიდან, 2 მოგება, რა თქმა უნდა, "დაგეგმილი" იყო: ევროპულ საფეხბურთო ოჯახში ახალმიღებულ გიბრალტარის ნაკრებს ხომ ყველა უგებს. აი, მესამე გამარჯვება კი, მართლაც შთამბეჭდავი იყო - უაღრესად დრამატულ მატჩში, როცა პირველი ტაიმის შემდეგ 0:2-ს აგებდა, კვიპროსის ნაკრებმა შეძლო და თამაში შეუტრიალა ბოსნიის ვარსკვლავურ ნაკრებს (ედინ ჯეკოს, მირალემ პიანიჩს, ვედად იბიშევიჩს, ასმირ ბეგოვიჩსა და სეად კოლოშინაცს ბევრი მწვრთნელი ინატრებდა თავის გუნდში) და ჯგუფში მეორე ადგილზე გასვლის შანსი მოუსპო.

რაც შეეხება საქართველოსა და კვიპროსის ნაკრებთა ურთიერთდაპირისპირების ისტორიას, სამწუხაროდ, ამ შემთხვევაშიც საამაყო არაფერი გვაქვს: ოფიციალურ თუ ამხანაგურ მატჩებში მხოლოდ ერთხელ მოვიგეთ, ერთხელ ფრედ ვითამაშეთ და სამჯერ დავმარცხდით...

პირველივე მარცხი

საქართველოსა და კვიპროსის ნაკრებების პირველ მატჩში ჩვენი გუნდი ძირითადად საქართველოს ჩემპიონატში მოასპარეზე ფეხბურთელებით იყო დაკომპლექტებული. ყველაზე მეტი, 5 წარმომადგენელი კი თბილისის "შევარდენი 1906-ს" ჰყავდა: აკაკი დევაძე, გია ჯიშკარიანი, კახა გოგიჩაიშვილი, გიორგი ნემსაძე, დავით ყიზილაშვილი.

რაც შეეხება ლეგიონერებს, კახა ცხადაძე მოსკოვის "დინამოდან" ჯერ არ იყო გადასული გერმანულ "აინტრახტში", ხოლო სამი ფეხბურთელი სწორედ კვიპროსის ჩემპიონატში ასპარეზობდა; კახა კაჭარავა და სოსო ჭედია იქაური "ოლიმპიაკოსის" ღირსებას იცავდნენ, თემურ ქეცბაია კი უკვე "ანორთოსისის" და, საერთოდ, კვიპროსის საკლუბო ფეხბურთის უპირველეს ვარსკვლავად მიიჩნეოდა!

სამწუხაროდ, ის მატჩი საქართველოს ნაკრებმა მინიმალური სხვაობით წააგო და როგორც მერე გაირკვა, ეს მარცხი აღმოჩნდა ჩვენი ნაკრების მთავარი მწვრთნელის, გიგა ნორაკიძის გადადგომის ერთ-ერთი მთავარი მიზეზიც...

ამხანაგური მატჩი
22.12.1992. ლიმასოლი. ცირიო. 2 500 მაყურებელი
კვიპროსი-საქართველო 1:0
გოლი: 1:0 იოანუ (43)
საქართველო: დევაძე - ჭედია, ცხადაძე (46. კაბისაშვილი), შელია, გ. ჯიშკარიანი - გოგიჩაიშვილი, ცომაია, გ. დარასელია (66. ნემსაძე), ქეცბაია - ყიზილაშვილი (72. მ. ჯიშკარიანი), კ. კაჭარავა
კაპიტანი: გია ჯიშკარიანი
მწვრთნელი: გიგა ნორაკიძე
არბიტრი: ა. ონისიფოროუ (კვიპროსი)

რევანში და კალაძის დებიუტი

კვიპროსელებს მეორედაც სტუმრად ვეთამაშეთ, ოღონდ, ამჯერად წარმატებულად: ალექსანდრე ჩივაძის ხელმძღვანელობით მოასპარეზე საქართველოს ნაკრებმა ჩინებულ სტილში ჩაატარა ის მატჩი და მეტოქეს ორი უპასუხო გოლი გაუტანა.

აღსანიშნავია, რომ პირველი გოლი თემურ ქეცბაიამ გაიტანა, რომელიც იმ დროისათვის უკვე საბერძნეთის ჩემპიონატში ბრწყინავდა, მეორე გოლი კი, საქართველოს ნაკრების ისტორიაში კიდევ ერთმა გამორჩეულმა ფეხბურთელმა გოჩა ჯამარაულმა გაიტანა.

საქართველოს ნაკრები კვიპროსს, იმ დროისათვის, ფაქტობრივად, ოპტიმალური შემადგენლობით ესტუმრა (მხოლოდ გიორგი ქინქლაძე და გიორგი ჩიხრაძე გვაკლდა) და სწორედ 1996 წლის 27 მარტს ჩაატარა კახა კალაძემ თავის სადებიუტო მატჩი საქართველოს ნაკრებში - დამოუკიდებელი ქართული ფეხბურთის ყველაზე ტიტულოვანი ფეხბურთელი იმ დროისათვის 18 წლის გახლდათ...

ამხანაგური მატჩი
27.03.1996. ლიმასოლი. ცირიო. 2 000 მაყურებელი
კვიპროსი-საქართველო 0:2
გოლები: 0:1 ქეცბაია (53), 0:2 ჯამარაული (65)
საქართველო: ზოიძე - ღუდუშაური (84. მაჭავარიანი), ცხადაძე, შელია, კუდინოვი - გოგიჩაიშვილი, ნემსაძე, ჯამარაული, ქეცბაია - ყაველაშვილი (72. კალაძე), შ. არველაძე
კაპიტანი: კახა ცხადაძე
მწვრთნელი: ალექსანდრე ჩივაძე
არბიტრი: ა. გეორგიუ (კვიპროსი)

ექსპერიმენტული შემადგენლობით...

საქართველოსა და კვიპროსის ნაკრებებს შორის ჩატარებულ მესამე მატჩს კი, ცოტა არ იყოს, ძნელად უნდა დავარქვათ სანაკრებო დონეზე დაპირისპირება. საქმე ის არის, რომ 2003 წლის ნოემბრიდან, 2004 წლის გაზაფხულამდე (ანუ, ვიდრე ჩვენს ნაკრებს ფრანგი სპეციალისტი ალენ ჟირესი ჩაიბარებდა), საქართველოს ნაკრებს მთავარი მწვრთნელი არ ჰყავდა...

არადა, წინდაწინვე იყო დაგეგმილი, რომ საქართველოს ნაკრებს 2004 წლის თებერვალში კვიპროსზე სამი ამხანაგური მატჩი უნდა ჩაეტარებინა მასპინძლებთან, რუმინელებთან და სომხებთან. საბოლოოდ ისე მოხდა, რომ ჩვენი ნაკრების გაძღოლა გოჩა ტყებუჩავას მიანდვეს (ვინც, მერე საქართველოს ახალგაზრდული ნაკრები ჩაიბარა), ხოლო "ნაკრებს" კი... თბილისის "დინამო" წარმოადგენდა, რომელიც იმ დროისთვის სწორედ კვიპროსზე გადიოდა მოსამზადებელ შეკრებას.

დინამოელთა გარდა, ნაკრებში სამი ლეგიონერი იყო: ვიტალი დარასელია ("ალანია", რუსეთი), დავით სირაძე ("უნიონი", გერმანია) და ლევან კორღალიძე ("სკონტო", ლატვია), პლუს, კვიპროსის ჩემპიონატში მოასპარეზე კიდევ ორი ჩვენებური - გიორგი გაბიდაური და ლევან მაღრაძე.

აი, რაც შეეხება გიორგი ქინქლაძეს, დამოუკიდებელი ქართული ფეხბურთის ყველაზე ნიჭიერი მოთამაშე იმ დროისათვის უგუნდოდ იყო...

ამხანაგური მატჩი
19.02.2004. ნიქოზია. მაკარეირო.1 500 მაყურებელი
კვიპროსი-საქართველო 3:1
1:0 ხარალამბიდისი (44), 2:0 ხარალამბიდისი (55), 2:1 გაბიდაური (56), 3:1 ელია (73)
საქართველო: გვარამაძე - შაშიაშვილი, ქემოკლიძე, წერეთელი (80. მაღრაძე), დ. კვირკველია - გაბიდაური, ნემსაძე (80. ლ. კორღალიძე), გოგობერიშვილი (71. მელქაძე), ვ. დარასელია - ქინქლაძე - ს. იაშვილი
კაპიტანი: გიორგი ნემსაძე
მწვრთნელი: გოჩა ტყებუჩავა
არბიტრი: ს. კაპანინი (ყაზახეთი)

უიღბლობის პერიოდი...

კვიპროსის ნაკრებთან ოფიციალურმა მატჩებმა მაინცდამაინც ექტორ კუპერის, ანუ, საქართველოს ნაკრებისათვის ყველაზე წარუმატებელ პერიოდში მოგვიწია! შეგახსენებთ, რომ ახლახან დასრულებულ ციკლამდე მხოლოდ და მხოლოდ ერთხელ იყო, როცა საქართველოს ნაკრებმა შესარჩევი ციკლი გამარჯვების გარეშე დაასრულა.

2010 წლის მსოფლიოს ჩემპიონატის შესარჩევი ციკლი საქართველოს ნაკრებმა ორი მარცხით (ირლანდიასა და იტალიასთან) დაიწყო. აი, მომდევნო მატჩი კი კვიპროსთან გველოდა, სადაც ნაკრების კაპიტანი კახა კალაძე ვერ გვეხმარებოდა, ისევე, როგორც მალხაზ ასათიანი, 2000-იანი წლების ქართული ფეხბურთის ერთ-ერთ ყველაზე ნიჭიერ წარმომადგენელს ჩვენი ნაკრების არგენტინელი მწვრთნელის უაზრო ხუშტურების გამო, ის შესარჩევი ციკლი, ფაქტობრივად, მთლიანად გაუცდა.

კვიპროსთან თბილისური მატჩი ძალიან დაძაბული გამოდგა, სადაც მთავარი მოვლენები შესვენების შემდეგ განვითარდა. ჯერ იყო და, ნაკრებში წლინახევრიანი პაუზის მერე დაბრუნებულმა გიორგი ლომაიამ იყოჩაღა და სტუმართა ყველაზე ცნობად ფეხბურთელს, მიხალის კონსტანტინუს პენალტი აუღო.

თუმცა, ბერძნული გრანდის, "ოლიმპიაკოსის" ფორვარდმა კონსტანტინუმ მერე მაინც შეძლო გოლის გატანა, მაგრამ იმ მატჩში საქართველოს ნაკრების კაპიტანმა ლევან კობიაშვილმა წაგებისაგან გვიხსნა. ლევან კობიაშვილმა კვიპროსზე გამართულ მატჩშიც გამოიჩინა თავი, როცა, ტრადიციულად, უშეცდომოდ შეასრულა 11-მეტრიანი დარტყმა.

მაგრამ, სამწუხაროდ, ეს მხოლოდ პრესტიჟის გოლს უფრო ჰგავდა: კვიპროსელებს მანამდე ხომ 2 გოლი ჰქონდათ გატანილი საქართველოს ნაკრების კარში...

მუნდიალი 2010
11.10.2008. თბილისი. ბორის პაიჭაძე. 40 000 მაყურებელი
საქართველო-კვიპროსი 1:1
გოლები: 0:1 კონსტანტინუ (67), 1:1 კობიაშვილი (73)
საქართველო: ლომაია - უ. ლობჟანიძე, სალუქვაძე, ხიზანიშვილი, შაშიაშვილი - რაზმაძე, მენთეშაშვილი, კობიაშვილი - ა. იაშვილი, ყენია (65. ბ. გოცირიძე) - მჭედლიძე (76. ალექსიძე)
კაპიტანი: ლევან კობიაშვილი
მწვრთნელი: ექტორ კუპერი
არბიტრი: ა. მატეიჟეკი (ჩეხეთი)

მუნდიალი 2010
28.03.2009. ლარნაკა. ანტონის პაპადოპულოსი. 1 500 მაყურებელი
კვიპროსი-საქართველო 2:1
გოლები: 1:0 კონსტანტინუ (33), 2:0 ხრისტოფი (55), 2:1 კობიაშვილი (71-პენ)
საქართველო: ლომაია - უ. ლობჟანიძე, კვახაძე, ხიზანიშვილი, შაშიაშვილი - ოდიკაძე, რაზმაძე, კობიაშვილი - ა. იაშვილი, ბ. გოცირიძე - მჭედლიძე (28. სირაძე)
კაპიტანი: ლევან კობიაშვილი
მწვრთნელი: ექტორ კუპერი
არბიტრი: ფ. ფოტრელი (საფრანგეთი)

ყოველდღიური სპორტული გაზეთი "ლელო"
1645
მკითხველის კომენტარები / 0 /
მსგავსი ამბები
რუბრიკის სხვა სიახლეები
;