ჩისკო: ბათუმში სამ  ქულას ვგეგმავთ

თბილისის “დინამოს” საწვრთნელ ბაზას ესპანეთის სამეფოს ელჩი თურქეთსა და საქართველოში - ხუან გონსალეს-ბარბა და ესპანეთის სამეფოს დროებითი რწმუნებული ჩვენს ქვეყანაში - ფრანსისკო კაპოტე სტუმრობდნენ.

დიპლომატებმა თანამემამულეები - ფელის ვისენტე, ჩისკო მუნიოსი და ფეხბურთელები მოინახულეს. ჩისკომ ხუან გონსალეს-ბარბას სამახსოვროდ მისთვის სპეციალურად დამზადებული თბილისის “დინამოს” ფორმა უსახსოვრა...

პარალელურად, საქართველოს ყველაზე ტიტულოვანი კლუბი ეროვნული ლიგის მორიგი ტურის ცენტრალური მატჩისთვის ემზადება. თბილისის “დინამო” ბათუმში იქაურ “დინამოს” დაუპირისპირდება. თამაშის წინ “ლელომ” კომენტარი სთხოვა ჩისკო მუნიოსს, ვინც მთავარი მწვრთნელის ასისტენტია:

“ვემზადებით მოახლოებული მატჩისთვის. მეტოქე კარგი გუნდია კარგი მწვრთნელით. ცალკე აღნიშვნის ღირსია თავად ბათუმის სტადიონი, სადაც ყოველთვის ბოლომდე ივსება ტრიბუნები. ეს განსაკუთრებულ მოტივაციას ჰმატებს მასპინძელ გუნდს, მაგრამ აქვე ვიტყვი, რომ ეს განსაკუთრებული მოტივაცია იქნება ჩვენთვისაც...

სატურნირო და ფსიქოლოგიური თვალსაზრისით, თბილისის “დინამოსთვის” მეტად მნიშვნელოვანი თამაშია. რა თქმა უნდა, ვგეგმავთ 3 ქულას. აქვე იმასაც ვაცნობიერებთ, რომ ეს ძალიან რთული იქნება.

თუმცა მნიშვნელოვანი თამაში და ამ შეხვედრაში მოპოვებული ქულებიც უაღრესად მნიშვნელოვანია,
დარწმუნებით შემიძლია ვთქვა, რომ თამაში სანახაობრივად კარგი გამოვა და ჩაივლის საფეხბურთო ატმოსფეროში. დანარჩენს კი შეხვედრის დასრულების შემდეგ ვნახავთ”, - გვითხრა ჩისკომ.

ყოველდღიური სპორტული გაზეთი "ლელო"
1593
მკითხველის კომენტარები / 0 /
მსგავსი ამბები
რუბრიკის სხვა სიახლეები
;