ჩიხურა-სამტრედია 1:2 - უფრო გაბედულად და სწრაფად... [VIDEO]

XXIX ტური დედაქალაქში ჩატარებული იმერული დერბით დაიწყო - ფეხბურთის ფედერაციამ "ჩიხურას" ივანწმინდის მოედანი სათამაშოდ უვარგისად მიიჩნია და იქ თამაშის ნება არ დართო.


ამ შეხვედრას სხვა გადასახედიდან შევხედოთ. თვალში საცემია, რომ გუნდები ერთმანეთს იმდენ სივრცეს უტოვებენ, რის უფლებასაც ევროპაში არავის მისცემენ. ამის შედეგი იყო, მაგალითად, თორნიკე გორგიაშვილის გოლი, რომელმაც შორიდან ისე გაიტანა, ხელი არავინ შეუშალა. საჯარიმოდან 7-8 მეტრში იყო, მაგრამ მისგან ყველაზე ახლოს მყოფ შემტევ ნახევარმცველ ინტერს გიისთან 3-4 მეტრი აშორებდა...


"სამტრედიამაც" ასე გაიტანა გამარჯვების გოლი. სტუმრებმა ბოლო წუთებზე ტემპს მოუმატეს, მეტოქის დაცვაში თავისუფალი ზონა მოძებნეს და გიორგი მჭედლიშვილს დარტყმაში ხელი არავინ შეუშალა - საჯარიმოსთან ბურთი რომ მიიღო, მცველი მისგან 10 მეტრში იდგა, დარტყმისას კი 4 მეტრამდე თუ მიუახლოვდა და, ცხადია, ხელის შეშლა ვეღარ მოახერხა. ასე ვინ დაგარტყმევინებს ევროპაში?! 

საერთოდ, უცნაურია ქართული ფეხბურთი - ყველა "ბარსელონა"-"რეალზე" ან გერმანია-ესპანეთზე გიჟდება, მაგრამ აქ ყველაფერი მათი ფილოსოფიის საწინააღმდეგოდ კეთდება. მოთამაშეების უმრავლესობა საჯარიმოში თუ მის მისადგომებთან ერთი შეხებით თამაშს და სწრაფად დარტყმას ბურთის უაზრო თრევას ამჯობინებს და ამით შანსს ხელიდან უშვებს, დროს ტყუილად კარგავს... 

საერთოდაც, გაუგებარია, რას ემსახურება ეს ბურთის უაზრო თრევა, თუ მეტოქის კარამდე დროულად არ მიხვალ და დარტყმას ვერ გაბედავ? 

ჩიხურა
1
სამტრედია
2

გოლები: 1:0 გორგიაშვილი (54), 1:1 ოლაიტანი (61. გიის პასით), 1:2 მჭედლიშვილი (89) 
 
ჩიხურა (4-2-3-1): ჰამზიჩი - თორ. გრიგალაშვილი, კაშია, მირცხულავა, კორიფაძე - დობროვოლსკი (75. განუგრავა), გორგიაშვილი - ივანიშვილი (75. დეკანოიძე), სარდალიშვილი (63. ფონიავა), გაბედავა - ტატანაშვილი.
სათადარიგოები: მწყერაშვილი, კაკუბავა, ჩიკვაიძე, ცხადაძე
მწვრთნელი: სოსო ფრუიძე
სამტრედია (4-2-3-1): მიგინეიშვილი - მთივლიშვილი, კასრაძე, სანდოხაძე, ახალაძე (80. მჭედლიშვილი) - გ. მანჯგალაძე, დათუნაიშვილი - მარკოზაშვილი (54. ბალდე), რაჟამაშვილი, გიი - ოლაიტანი (90+2. სამუშია).
სათადარიგოები: ო. სტურუა, ნდონგი, გოგიაშვილი, გიორბელიძე
მწვრთნელი: უჩა სოსიაშვილი 
გაფრთხილება: თორ. გრიგალაშვილი (26), დათუნაიშვილი (41), კორიფაძე (44), გ. მანჯგალაძე (64) 
არბიტრი: გ. ყრუაშვილი


ცეცხლი, ენერგია, თამაშის სიხარული და ნამდვილი სპორტული ჟინი ნაკლებად იგრძნობა, თითქოს, ფეხბურთელები მოედანზე მძიმე სამუშაოს შემდეგ გადიან. ფაქტია, ჩვენს ჩემპიონატს ამიტომაც არ წყალობს მაყურებელი - მოქმედი ჩემპიონისა და ვიცე-ჩემპიონის მატჩს 200 კაცამდე თუ დაესწრო...


ბოლოს თამაში ისევ სამტრედიელებმა გამოაცოცხლეს და იმის ხარჯზე მოიგეს, რაც ფეხბურთში მთავარია - გაბედული და შედარებით სწრაფი თამაშით. უჩა სოსიაშვილმა "სამტრედიას" მწვრთნელის პოსტზე პირველი გამარჯვება იზეიმა. მოქმედმა ჩემპიონმა კი 55 ქულა დააგროვა და საპრიზო ადგილებისთვის ბრძოლას აგრძელებს.

რაც შეეხებათ საჩხერელებს, მათ ამის შანსი, ფაქტობრივად, დაკარგეს - 40 ქულით მე-6 ადგილზე არიან და სოსო ფრუიძის გუნდს მთელი ძალების მობილიზება ახლა საქართველოს თასზე მოუწევს.

მატჩის სტენოგრამა
8" - ოლაიტანისგან მიღებულ ბურთს მარკოზაშვილი მკერდით გიის აწვდის, მაგრამ ეს უკანასკნელი ახლო მანძილიდან კარს აცილებს.
13" - სარდალიშვილი საჯარიმოსკენ დაიძრა, სამ მცველს შორის ძვრება, მაგრამ კარის წინ ვითარებას მცველი ანეიტრალებს.
17" - ივანიშვილი საჯარიმოში აწვდის სარდალიშვილს, რომელიც ერთი შეხებით ვერ ურტყამს, მეორე ცდაზე კი კარს აცილებს.
43" - რაჟამაშვილის თავური პასი ოლაიტანს, რომელმაც ერთი შეხებით ურტყამს, მაგრამ ჰამზიჩი საიმედოა.
49" - გაბედავას დარტყმას მცველი ეღობება, მოგერიებულ ბურთს კი კორიფაძე მოულოდნელად კარში გზავნის, მეკარე მიგინეიშვილი ბურთს იგერიებს, დამატებისას ტატანაშვილს მცველი უშლის ხელს.
52" - მარკოზაშვილი მეკარესთან პირისპირ ტოვებს მანჯგალაძეს, მაგრამ ჰამზიჩი ყოჩაღად ირჯება.
54" - გოლი! გორგიაშვილი კარიდან ოდნავ გამოსულ მეკარეს ულამაზესი დარტყმით თავზე უგდებს ბურთს - 1:0.
61" - გოლი! გიი მეკარესთან პირისპირ ტოვებს ოლაიტანს, რომელიც ჰამზიჩს ასწრებს და ბურთს ერთი შეხებით გზავნის კარში - 1:1.
72" - მანჯგალაძის მიერ დარტყმულ ბურთს ჰამზიჩი ეფექტურ ნახტომში ამიწებს.
85" - რაჟამაშვილის ფლანგური რეიდი. ჰამზიჩი დროულად გამოდის კარიდან და სიტუაციას ანეიტრალებს.
89" - გოლი! მჭედლიშვილის უძლიერესი შორეული დარტყმა პირდაპირ "ცხრიანში" ხვდება - 1:2.

ყოველდღიური სპორტული გაზეთი "ლელო"

1206
მკითხველის კომენტარები / 0 /
მსგავსი ამბები
რუბრიკის სხვა სიახლეები