ჩოგბურთელ ქალ-ვაჟთა ნაკრები, თებერვალში, ფედერაციისა და დევისის თასების გათამაშებაში ჩაებმებიან

თებერვლის პირველ დეკადაში ჩოგბურთელ ქალ-ვაჟთა ნაკრები გუნდებისთვის ფედერაციისა და დევისის თასების 2018 წლის გათამაშების პირველი ორთაბრძოლები გაიმართება. შეჯიბრებაში ჩვენებიც ჩაებმებიან.

საქართველოს ვაჟთა ნაკრები (ნიკოლოზ ბასილაშვილი, გიორგი ცივაძე, სანდრო მეტრეველი, კაპიტანი დავით კვერნაძე) ევროაფრიკული მეორე ზონის პირველი რაუნდის მატჩს 3-4 თებერვალს მარაკეშში გამართავს მაროკოსთან.

მასპინძლები დევისის თასზე 1961 წლიდან მონაწილეობენ. 2001, 2002 და 2004 წლებში მსოფლიოს ჯგუფშიც მოსინჯეს ძალები, მაგრამ სტარტზევე დამარცხდნენ.

შარშან ჯგუფში დასარჩენ პაექრობაში ლატვიას სძლიეს - 3:2, ჩვენებმა ფინეთს 3:2 მოუგეს, ლიტვასთან კი 2:3 დამარცხდნენ. მაროკოელებს ქართველებთან დასაპირისპირებელი შემადგენლობა ჯერ არ გამოუცხადებიათ.

დევისის თასის გათამაშების ევროაფრიკულ მე-2 ზონაში 16 გუნდი იბრძოლებს ზედა ეშელონში დასაწინაურებლად. პირველ რაუნდში მაროკო-საქართველოს და რუმინეთ-ლუქსემბურგის წყვილებს შორის გამარჯვებულები მეორე წრეში 7-8 აპრილს შეხვდებიან ერთმანეთს, ხოლო დამარცხებულები ზონაში დასარჩენად იბრძოლებენ.

მეორე ზონაში 3-4 თებერვალს პირველ რაუნდში, ასევე, დაუპირისპირდებიან ერთმანეთს: სლოვენია-პოლონეთი, თურქეთი-ზიმბაბვე, ეგვიპტე-ნორვეგია, ისლანდია-დანია, ტუნისი-ფინეთი, ესტონეთი-ლიტვა.

* * *

საქართველოს ჩოგბურთელ ქალთა ნაკრები (ეკატერინე გორგოძე (რეიტინგით ერთეულებში 330-ე, წყვილებში - 365-ე), სოფიო შაფათავა (358-ე, 239-ე), მარიამ ბოლქვაძე (559-ე, 631-ე), ოქსანა კალაშნიკოვა (0, 72-ე), კაპიტანი მარგალიტა ჩახნაშვილი-რანცინგერი) რამდენიმე წელიწადია, ფედერაციის თასის გათამაშების პირველი ევროაფრიკული ზონის ბინადარია.

ამჟამად აქ 14 ქვეყნის წარმომადგენლები არიან, რომლებიც 7-10 თებერვალს ესტონეთის დედაქალაქ ტალინში მეორე მსოფლიო ჯგუფის პლეი ოფის (2018 წლის აპრილი) 2 საგზურისთვის გაარკვევენ ერთმანეთთან ურთიერთობას. წილისყრით ისინი ოთხ ჯგუფში გადანაწილდნენ:

A ჯგუფი: საქართველო, სერბეთი, ბულგარეთი
B ჯგუფი: ესტონეთი, დიდი ბრიტანეთი, პორტუგალია
C ჯგუფი: ხორვატია, უნგრეთი, სლოვენია, შვედეთი
D ჯგუფი: პოლონეთი, თურქეთი, ავსტრია, ლატვია

7-9 თებერვალს ჯგუფური პაექრობები გაიმართება, 10-ში კი ზედა ეშელონში დასაწინაურებელ პლეი ოფში ითამაშებენ: A1-D1, B1-ჩ1, ხოლო ჯგუფში დასარჩენად იბრძოლებენ A3-D4, B3-ჩ4.

ჩვენს ჯგუფში კარგი შემადგენლობა ჰყავს ბულგარეთს (ვიქტორია ტომოვა (138-ე, 0), იზაველა შინიკოვა (384-ე, 380-ე), იულია ტერზისკა (595-ე, 396-ე), გერგანა ტოპალოვა (891-ე, 1039-ე), კაპიტანი დორა რანგელოვა), მაგრამ წინა წლებში ქართველ ჩოგბურთელებს მეტოქე არაერთხელ დაუმარცხებიათ.

სერბეთის წინასწარ განაცხადში არ არიან ალექსანდრა კრუნიჩი (46-ე) და ელენა იანკოვიჩი (158-ე). გუნდი ტალინში ასეთი შემადგენლობით აპირებს ჩასვლას: დეიან რადანოვიჩი (263-ე, 946-ე), ივანა ჯოროვიჩი (279-ე, 592-ე), ოლგა დანილოვიჩი (329-ე, მე-600), ბოიანა მარინკოვიჩი (563-ე, 527-ე), კაპიტანი ტატიანა ჟესმინიცა.

- დღევანდელი რეალობიდან გამომდინარე, ჩვენი მიზანია, ჯგუფებში ადგილები შევინარჩუნოთ, - გვითხრა საქართველოს ჩოგბურთის ფედერაციის ვიცე პრეზიდენტმა ალექსანდრე მეტრეველმა. - შესაძლოა, მეტის ამბიციებიც გვქონდეს, მაგრამ ამ ეტაპზე ჩვენს შესაძლებლობებს ობიექტურად უნდა შევხედოთ.

მსოფლიოს კლასიფიკაციას თვალს თუ გადავავლებთ, ვნახავთ, რომ ზოგიერთებს ქართველებზე უკეთესი სარეიტინგო მაჩვენებლები აქვთ. ყოველივეს მიუხედავად, ჩვენი გოგონებისა და ვაჟების შემართებისა და თავდადებისა მჯერა - ისინი არც ამჯერად გაგვაწბილებენ. სასიამოვნოა, რომ ნიკოლოზ ბასილაშვილი და ოქსანა კალაშნიკოვა ავსტრალიის ღია პირველობაზე წარმატებით ასპარეზობენ.

ყოველდღიური სპორტული გაზეთი "ლელო"
1192
მკითხველის კომენტარები / 0 /
მსგავსი ამბები
რუბრიკის სხვა სიახლეები
;