[ჩოგბურთი] ავსტრალიიდან რუსები დაიფრინეს

ავსტრალიის ღიას მამაკაცთა ტურნირის რიგით მეხუთე მეოთხედფინალისტი გახდა ავსტრიელი დომინიკ ტიმი. მსოფლიოს მეხუთე ჩოგანს განსაკუთრებული პრობლემები არ შექმნია ფრანგი გაელ მონფილსის წინააღმდეგ და სამ სეტში გაიმარჯვა - 6:2, 6:4, 6:4. შეხვედრა საათი და 52 წუთი გრძელდებოდა.

ტიმი სრულ უპირატესობას ფლობდა - მეტოქეს არც ერთი ბრეიკ-პოინტი არ მისცა, თავად კი 14 ბრეიკ-პოინტი მიიღო და ოთხი გამოიყენა. ავსტრიელმა პირველ მოწოდებაზე მხოლოდ შვიდი ქულა დათმო და მეორეზე - ექვსი. ჯამში 31 „“ვინერსი“ დააგროვა და სულ რაღაც 19 უნებლიე შეცდომა დაუშვა.

n n n

მამაკაცთა ტურნირს გამოეთიშა მსოფლიოს მეოთხე ჩოგანი, რუსი დანიილ მედვედევი. ხუთსეტიან ბრძოლაში მისი დამარცხება შეძლო შვეიცარიელმა სტენ ვავრინკამ - 6:2, 2:6, 4:6, 7:6(2), 6:2. თამაში სამსაათნახევარი გაგრძელდა.

ვავრინკამ პირველ სეტში დიდ უპირატესობას მიაღწია და შანსი არ მისცა მეტოქეს, მაგრამ მეორე სეტიდან მოყოლებული, მედვედევმა დიდი უპირატესობა მოიპოვა. მეორე და მესამე პარტიებში შვეიცარიელს არც ერთი ბრეიკ-პოინტი არ მოუპოვებია, მედვედევმა კი სამი ბრეიკი შეასრულა და სეტებში დაწინაურდა.

მეოთხე სეტი თანაბარი გამოვიდა - ერთადერთი ბრეიკ-პოინტი ვავრინკას ჰქონდა, რომელიც ვერ გამოიყენა და საქმე ტაი-ბრეიკამდე მივიდა, სადაც შვეიცარიელი დიდ უპირატესობას ფლობდა.

ასევე ჰქონდა ინიციატივა ვავრინკას მეხუთე სეტში, სადაც პირველივე გეიმში ბრეიკი შეასრულა. შვეიცარიელს ერთადერთი კრიტიკული მომენტი მეოთხე გეიმში დაუდგა, როცა სამი ბრეიკ-პოინტის მოგერიებამ მოუწია. შემდეგ კიდევ ერთი ბრეიკი აიღო და მალე მატჩზეც ჩააწოდა.

n n n

დანიილ მედვედევის შემდეგ, მამაკაცთა ტურნირს კიდევ ერთი რუსი ჩოგბურთელი ანდრეი რუბლიოვი გამოეთიშა. რუსების ბოლო წარმომადგენელი გერმანელმა ალექსანდრ ზვერევმა ძალიან იოლად დაამარცხა - 6:4, 6:4, 6:4. თამაშის ხანგრძლივობა იყო საათი და 39 წუთი.

გერმანელმა თითო სეტში თითო ბრეიკის შესრულება შეძლო. რუბლიოვს უკუბრეიკის არანაირი შანსი არ ჰქონია - ზვერევმა საკუთარ გეიმებში ჯამში 12 ქულა წააგო და მეტოქე ერთ ბრეიკ-პოინტამდეც კი არ მიუშვა.

ზვერევისთვის ეს არის პირველი მეოთხედფინალი ავსტრალიაში. სხვათა შორის, მან შეწყვიტა რუბლიოვის 15-მატჩიანი მოგებათა სერია, რომელიც შარშანდელი ნოემბრიდან იღებდა სათავეს.

n n n

მსოფლიოს პირველი ჩოგანი რაფაელ ნადალი ავსტრალიის ღია პირველობის ბოლო მეოთხედფინალისტი გახდა. ესპანელმა სამი საათი და 42 წუთი ბრძოლის შემდეგ, ოთხ სეტში დაამარცხა ავსტრალიელი ნიკ კირგიოსი - 6:3, 3:6, 7:6(6), 7:6(4).

მიუხედავად ასეთი დაძაბული თამაშისა, ნადალს არ ჰქონია ცუდი სტატისტიკა. პირველ მოწოდებაზე ქულების 85 პროცენტი მოიგო, მეორეთი - 64. ცხრა ბრეიკ-პოინტი მიიღო, მაგრამ მხოლოდ ორი გამოიყენა. 64 „ვინერსი“ ჰქონდა და არც ისე ბევრი უნებლიე შეცდომა (29) დაუშვა. კირგიოსმა მატჩი 25 ეისით დაასრულა და სამიდან ორი ბრეიკ-პოინტი გამოიყენა.

რაც შეეხება თამაშის მსვლელობას, ნადალმა პირველი სეტი ერთადერთი ბრეიკით მოიგო, მეორე სეტის პირველივე გეიმში სამი ბრეიკ-პოინტი ვერ გამოიყენა, რის შემდეგაც კირგიოსმა მატჩში პირველი ბრეიკ-პოინტით მეტოქის გეიმი აიღო და ეს საკმარისი აღმოჩნდა სეტის მოსაგებად. ეს იყო ამ ტურნირზე ნადალის პირველი წაგებული პარტია.

მესამე სეტში ბრეიკი არ ყოფილა და ტაი-ბრეიკზე ოდნავ უკეთ ნადალი გამოიყურებოდა. მეოთხე სეტში რაფაელმა მესამე გეიმში ბრეიკი შეასრულა და მშვიდად მიჰყავდა მატჩი მოგებამდე, მაგრამ მეათე გეიმში, როცა მატჩზე აწვდიდა, მოულოდნელად უკუბრეიკის საშუალება მისცა ავსტრალიელს და ისევ გახდა საჭირო ტაი-ბრეიკის თამაში, რომელიც ესპანელმა ძალიან დამაჯერებლად წარმართა და მეოთხედფინალში დომინიკ ტიმზე გავიდა.

n n n

ავსტრალიის ღიაზე ქალთა ტურნირში ბევრი მოულოდნელობა ხდებოდა, რის შედეგად, მერვე სათამაშო დღის შემდეგ, მეოთხედფინალში მოხვდა ერთი განუთესავი ჩოგბურთელი, აგრეთვე, 28-ე და 30-ე ნომრებად განთესილი მოთამაშეები.

თუმცა, განუთესავი ჩოგბურთელი ესპანელი გარბინე მუგურუსა გახლავთ, რომელსაც „დიდი სლემის“ ორი ტიტული აქვს მოგებული, შარშან ჩავარდნა ჰქონდა და ახლა იბრუნებს პოზიციებს.

406
მკითხველის კომენტარები / 0 /
მსგავსი ამბები
რუბრიკის სხვა სიახლეები
;