[ჩოგბურთი] ავსტრალიის ღია დაიწყო...

ჯოკოვიჩმა ცოტა იწვალა

მსოფლიოს მეორე ჩოგანს ნოვაკ ჯოკოვიჩს ავსტრალიის ღიას პირველ წრეში სერიოზული ტესტის გავლა მოუწია - ტურნირის მოქმედმა ჩემპიონმა ერთი სეტი დათმო გერმანელი იან-ლენარდ შტრუფის წინააღმდეგ, მაგრამ მოახერხა ოთხ სეტში მოგება - 7:6(5), 6:2, 2:6, 6:1.

სერბი ჩოგბურთელი 2020 წელს დაუმარცხებელია - ეს იყო მისთვის ზედიზედ მეშვიდე მოგება. გარდა ამისა, ჯოკოვიჩი გახდა ისტორიაში მეექვსე ჩოგბურთელი, რომელმაც კარიერაში მე-900 მატჩი მოიგო. ამ პრესტიჟულ კლუბში შედიან: გილერმო ვილასი, რაფაელ ნადალი, ივან ლენდლი, როჯერ ფედერერი და ჯიმი კონორსი.

შტრუფთან შეხვედრა ორი საათი და 16 წუთი გაგრძელდა და გამოჩნდა, რომ ნოვაკი არ არის ოპტიმალურ ფორმაში. სერბმა ოთხჯერ დათმო საკუთარი მოწოდება, აქედან სამჯერ - მესამე სეტში. თავად ჯოკოვიჩმა 11 ბრეიკ-პოინტიდან შვიდი გამოიყენა.

n n n

ავსტრალიის ღიას ერთ-ერთმა ფავორიტმა სტეფანოს ციციპასმა დამაჯერებლად გაიარა პირველი წრის ბარიერი. წლის შემაჯამებელი ტურნირის ტრიუმფატორმა საათსა და 43 წუთში გაანადგურა იტალიელი სტეფანო კარუზო - 6:0, 6:2, 6:3.

მსოფლიოს მეექვსე ჩოგანმა ბრწყინვალე თამაში აჩვენა საკუთარ გეიმებში - პირველ მოწოდებაზე სულ რაღაც სამი ქულა დათმო და მეტოქე ერთხელაც არ მიუშვა ბრეიკ-პოინტამდე. კარუზოს კი არ მისდიოდა თამაში თავის გეიმებში - პირველი მოწოდებით ქულების 56 პროცენტი მოიგო, მეორეთი - 32 პროცენტი. ციციპასი 13 ბრეიკ-პოინტამდე მივიდა და შვიდი ბრეიკი შეასრულა.

მეორე წრეში ბერძენის მეტოქე იქნება გამოცდილი გერმანელი ფილიპ კოლშრაიბერი.

n n n

დამაჯერებელი სტარტი აიღო ავსტრალიის ღია პირველობაზე შვეიცარიელმა როჯერ ფედერერმა. ტურნირის ექვსგზის ჩემპიონმა სულ რაღაც საათი და 25 წუთი მოანდომა ამერიკელი სტივ ჯონსონის დამარცხებას - 6:3, 6:2, 6:2.

შვეიცარიელმა თითქმის უნაკლოდ ითამაშა თავის მოწოდებაზე - 10 ეისი ჩააწოდა, პირველ მოწოდებაზე შვიდი ქულა წააგო, მეორეზე - მხოლოდ სამი, აგრეთვე, ამერიკელს ერთადერთი ბრეიკ-პოინტის შანსი მისცა, რომელიც ჯონსონმა ვერ გამოიყენა. თავად ფედერერმა რვა ბრეიკ-პოინტი გამოიმუშავა და ხუთჯერ მოიგო მეტოქის გეიმი.

როჯერმა კარიერაში 21-ედ აიღო სტარტი ავსტრალიის ღიაზე და 21-ედ მოიგო პირველი წრის მატჩი.

კოკომ ისევ მოიგო

კოკო გაუფიქალებს შორის პირველი სათამაშო დღის ყველაზე გამორჩეულ მატჩში ამერიკელები - 39 წლის ვინუს უილიამსი და 15 წლის კოკო გაუფი ხვდებოდნენ ერთმანეთს. ამ ჩოგბურთელთა მატჩი შარშან, უიმბლდონის პირველ წრეშიც შედგა. მაშინ გაუფს დებიუტი ჰქონდა „დიდი სლემის“ ტურნირებზე და შეძლო მსოფლიოს ყოფილი პირველი ნომრის დამარცხება. ახლა, ისტორია განმეორდა - გაუფმა ავსტრალიის ღიაზე დებიუტი ისევ ვინუსზე გამარჯვებით აღნიშნა - 7:6(5), 6:3.

ქალთა ძირითადი ბადის ყველაზე ახალგაზრდა მოთამაშე თითქმის მთელი მატჩი ფლობდა უპირატესობას. პირველ სეტში კარგა ხანი იგებდა ბრეიკით, მაგრამ გადამწყვეტ მომენტში სამი სეტბოლი ვერ გამოიყენა და ტაი-ბრეიკის თამაში დასჭირდა, სადაც ასევე მისცა მეტოქეს დაწევის საშუალება, თუმცა, ბოლოს მაინც დაასრულა მე-13 გეიმი თავის სასარგებლოდ.

მეორე სეტში გაუფმა თავის მოწოდებაზე ძალიან დამაჯერებლად ითამაშა და ერთი ბრეიკ-პოინტის შანსიც არ მისცა ვინუსს, თავად კი ერთი ბრეიკი შეასრულა და ეს საკმარისი აღმოჩნდა მოსაგებად.

მეორე წრეში თინეიჯერი ამერიკელის მეტოქე რუმინელი სორანა კირსტეა იქნება.

n n n

წარმატებით დაიწყო ავსტრალიის ღია პირველობაზე ტიტულის დაცვა იაპონელმა ნაომი ოსაკამ. მან პირველ წრეში ორ სეტში დაამარცხა მსოფლიოს 59-ე ნომერი, ჩეხი მარი ბუზკოვა - 6:2, 6:4. შეხვედრა 80 წუთი გრძელდებოდა.

პირველი სეტის იოლად მოგების შემდეგ, მეორე პარტიაში ფავორიტს გაუჭირდა. ბუზკოვა ბრეიკით 4:2 დაწინაურდა, მაგრამ იაპონელმა ზედიზედ ოთხი გეიმისა და შესაბამისად, მატჩის მოგება შეძლო. ოსაკამ ცხრიდან ოთხი ბრეიკ-პიონტი გამოიყენა, ბუზკოვამ - ექვსიდან ერთი.

ბუზკოვა იმით არის ცნობილი, რომ თავის დროზე იუნიორებს შორის აშშ-ის ღია პირველობა მოიგო, შარშან კი ტორონტოს ტურნირის ნახევარფინალში კი სერენა უილიამსი დაამარცხა სამ სეტში.

მეორე წრეში ოსაკა ჩინელ სასაი ჟენგს შეხვდება.

n n n

ამერიკელმა ჩოგბურთელმა სერენა უილიამსმა წარმატებით დაიწყო „დიდი სლემის“ 24-ე ტიტულისთვის ბრძოლა. პირველ წრეში ლეგენდამ გაანადგურა 18 წლის რუსი თინეიჯერი, მსოფლიოს 90-ე ნომერი ანასტასია პოტაპოვა - 6:0, 6:3.

პირველ სეტში ბრძოლა საერთოდ არ ყოფილა - სერენამ 19 წუთში გაანადგურა მეტოქე. აღსანიშნავია, რომ ამერიკელმა მხოლოდ სამი ქულა დათმო საკუთარ გეიმებში.

მეორე სეტში რუსმა ჩოგბურთელმა გაიბრძოლა და ბრეიკით დაწიანურებაც კი შეძლო, მაგრამ უილიამსმა იქვე შეასრულა უკუბრეიკი, შემდეგ კიდევ ერთხელ აიღო მეტოქის მოწოდება და მეორე წრეში თამაშის უფლება მოიპოვა. აქ მისი მეტოქე სლოვენიელი ტამარა ზიდანსეკი იქნება.

n n n

ავსტრალიის ღია პირველობის წლევანდელ გათამაშებაში დიდი ყურადღება არის მიპყრობილი დანიელი კაროლინ ვოზნიაცკის მიმართ. ტურნირის ყოფილი ჩემპიონი კარიერაში ბოლო ტურნირს ატარებს - ავსტრალიის შემდეგ, სკანდინავიელი ასრულებს ჩოგბურთის თამაშს.

პირველ წრეში ვოზნიაცკი ეთამაშებოდა ამერიკელ კრისტი ანს და საათსა და 26 წუთში დაამარცხა - 6:1, 6:3.

პირველ სეტში დანიელმა 25 წუთში მოამთავრა საქმე ორი ბრეიკის წყალობით. მეორე სეტი საათზე მეტხანს გაგრძელდა, ამერიკელმა რამდენიმე გეიმში დიდი წინააღმდეგობა გაუწია მსოფლიოს ყოფილ პირველ ჩოგანს, მაგალითად, პირველი გეიმი 20 წუთი გრძელდებოდა. თუმცა, საბოლოოდ, ანმა მეტოქის სამ ბრეიკს მხოლოდ ერთით უპასუხა.

ვოზნიაცკის მეტოქე მეორე წრეში სლოვენიელ კაია იუვანსა და უკრაინელ დიანა იასტრემსკას შორის მოგებული იქნება.

164
მკითხველის კომენტარები / 0 /
მსგავსი ამბები
რუბრიკის სხვა სიახლეები
;