[ჩოგბურთი] ნადალი უშანსოდ იყო

ლონდონში წლის შემაჯამებელ ტურნირზე A ჯგუფში პირველი ტურის მეორე მატჩი გაიმართა. მსოფლიოს პირველი ჩოგანი რაფაელ ნადალი გერმანელ ალექსანდრ ზვერევს ხვდებოდა, რომელიც ტურნირის მოქმედი ჩემპიონია.

ამ შეხვედრაში ბრძოლა არ შედგა და ზვერევმა საათსა და 25 წუთში ორ სეტში მოიგო 6:4, 6:2. გერმანელმა ძალიან დამაჯერებლად ითამაშა საკუთარ მოწოდებაზე და ლეგენდარულ ესპანელს ერთი ბრეიკ-პოინტიც არ მისცა, თავად კი ოთხიდან სამი ბრეიკ-პოინტი გამოიყენა.

ეს იყო ამ ჩოგბურთელთა მეექვსე დაპირისპირება პროფესიულ ტურში და ზვერევმა პირველად მოუგო ნადალს.

შეგახსენებთ, რომ ამ ჯგუფის პირველ მატჩში სტეფანოს ციციპასმა ორ სეტში  7:6, 6:4 მოუგო რუს დანიილ მედვედევს.

n  n  n

გუშინ, წლის შემაჯამებელ ტურნირზე მეორე ტური დაიწყო. B ჯგუფში ამ ტურის პირველ მატჩში შვეიცარიელი როჯერ ფედერერი და იტალიელი მატეო ბერეტინი შეხვდნენ ერთმანეთს, რომლებმაც პირველ ტურში, შესაბამისად, ავსტრიელ დომინიკ ტიმთან და სერბ ნოვაკ ჯოკოვიჩთან წააგეს.

ჩოგბურთელებმა ორი განსხვავებული სეტი ჩაატარეს. პირველში თანაბარი ბრძოლა იყო - ერთადერთი ბრეიკ-პოინტი ფედერერს ჰქონდა მე-11 გეიმში, მაგრამ ბერეტინიმ საფრთხე მოიგერია. თუმცა, იტალიელმა ტაი-ბრეიკზე დიდი წინააღმდეგობა ვერ გაუწია ლეგენდარულ მეტოქეს და მხოლოდ ორი ქულა აიღო მე-13 გეიმში.

მეორე სეტში ფედერერმა პირველივე გეიმში შეასრულა ბრეიკი. ბერეტინის უკუბრეიკის შესრულება მერვე გეიმში შეეძლო, როცა სამი ბრეიკ-პოინტი გამოიმუშავა, მაგრამ როჯერმა თავი კარგად დაიცვა, რის შემდეგაც, მეცხრე გეიმში აღებული ბრეიკით დაასრულა მატჩი - 7:6(2), 6:3.

325
მკითხველის კომენტარები / 0 /
მსგავსი ამბები
რუბრიკის სხვა სიახლეები
;