ჩოგბურთი. სოფიო შაფათავას წლის პირველი ტიტული

ანტალიაში ჩოგბურთელ ქალთა საერთაშორისო ტურნირში (საპრიზო ფონდი 15 000 დოლარი) ეკატერინე გორგოძე და სოფიო შაფათავა წინა კვირას ჩაებნენ. ისინი, შესაბამისად, პირველ და მეორე ნომრებად იყვნენ განთესილი.

წყვილებში შესანიშნავად ითამაშა შაფათავამ, რომელმაც უკრაინელ ანასტასია ვასილიევასთან ერთად მთავარი პრიზი მოიგო. ქართულ-უკრაინული დუეტი ტურნირზე რეიტინგფავორიტი იყო, ამიტომ პაექრობებში ძალები მეოთხედფინალიდან მოსინჯა:

პირველ შეხვედრაში რუმინელები - ანდრეა ამალია როშკა და ქანა გავრილა დაამარცხა - 6:0, 4:6, 10:7. წინა დღეების უამინდობის გამო შაფათავა გუშინ სამჯერ გავიდა კორტებზე - ორჯერ წყვილებსა და ერთხელ ერთეულებში.

წყვილებში სოფიომ და ანასტასიამ ნახევარფინალში ალიონა ფომინასა (რუსეთი) და სელენ თაქუნიაქის (თურქეთი) ტანდემს 52 წუთში 6:3, 6:1 სძლიეს. გადამწყვეტ პაექრობაში მესამე ნომრად განთესილ იპეკ ოზისა (თურქეთი) და ქსენია პალკინას (ყირგიზეთი) დაუპირისპირდნენ.

ამ ტანდემმა მეოთხედფინალში გზიდან ეკატერინე გორგოძე და აზრა დენიზ ქომლეკი (თურქეთი) ჩამოიშორა - 6:4, 4:6, 10:5. მთავარი პრიზისთვის ბრძოლამ საათსა და 20 წუთს გასტანა.

რეიტინგფავორიტებმა პირველი ხელი 5:7 დათმეს, მაგრამ მეორე მშრალი ანგარიშით მოიგეს - 6:0, ტაიბრეიკში შაფათავამ და ვასილიევამ 13:11 გაიმარჯვეს და პირველი ადგილიც დაიკავეს.

ჩვენებურმა ამ შეხვედრაში მეწყვილესთან ერთად მხოლოდ ერთი ეისი მიითვალა და 7-დან 4 ბრეიკპოინტი გამოიყენა (მეტოქემ, შესაბამისად, ორი და 2-დან 2).

ერთეულებში ორივე ქართველმა ნახევარფინალს უწია. გორგოძემ ზედიზედ სამ მეტოქეს აჯობა - ქანა გავრილას (რუმინეთი, 4:6, 7:6, 7:6), ანა უკოლოვასა (რუსეთი, 6:0, 6:1) და ტაისია მორდერგერს (გერმანია, 3:6, 6:1, 6:4).

გუშინდელი ნახევარფინალური ორთაბრძოლა ანდრეა ამალია როშკასთან (რუმინეთი) 2 საათსა და 24 წუთს გაგრძელდა. იმის მიუხედავად, რომ კარპატელმა 28-დან მხოლოდ 6 ბრეიკპოინტი გამოიყენა (გორგოძემ - 8-დან ხუთი), შეხვედრა მაინც მოიგო - 6:3, 1:6, 6:3 და ფინალში გავიდა.

შაფათავამ სტარტზე ნავენა შოკოვიჩი (სერბეთი) დაჯაბნა - 6:0, 6:0, მერე მის გზას გაუყენა რუსი ევგენია ბურდინა (6:3, 7:6) და გერმანელი ლიზა მატვიენკო (7:6, 6:3).

გუშინ კი, მესამედ რომ გავიდა კორტზე, მირიამ კოლოძიეიოვასთან (ჩეხეთი) პირველი სეტი 3:6 დათმო, მეორეს 1:4-ს რომ აგებდა, ტრავმის გამო შეჯიბრების გაგრძელება ვეღარ შეძლო.

გორგოძე და შაფათავა ისევ ანტალიაში რჩებიან და ამ კვირას ახალ 15 000-იან საერთაშორისო ტურნირში ითამაშებენ. თურქეთის ამ საკურორტო ქალაქში ამჯერად ქართული დესანტის რაოდენობა საგრძნობლად გაიზარდა - ვაჟთა 15 000-იანი ტურნირის საკვალიფიკაციო ეტაპში ოთხი ჩვენებური ჩაება.

პირველ წრეში გიორგი ცივაძემ დანიელ სპოსიბო (რუსეთი) დაამარცხა - 6:1, 6:1, ხოლო ვაჟა შუბლაძემ ნიკიტა ვალენცევი (რუსეთი) გაისტუმრა მაყურებლებში - 6:3, 6:2.

გუშინ დღის მეორე ნახევარში ცივაძე იუნეს ელ აინაუის (მაროკო), შუბლაძე კი პატრიკ რიკლის (ჩეხეთი) უნდა შეხვედროდა, მაგრამ წვიმის გამო პაექრობები დღეისთვის გადაიდო.

ჩვენებურები თუ მეტოქეებს ძლევენ, ძირითად ბადეში გასასვლელად მესამე წრეში ერთმანეთთან გაარკვევენ ურთიერთობას. დღესვე ითამაშებენ კვალიფიკაციას ლექსო სვანიძე და ვადიმ ალექსეენკო (უკრაინა), ხოლო სანდრო სვანიძემ გუშინ მანუელ გუინარდთან (საფრანგეთი) წააგო - 0:6, 0:6.

ყოველდღიური სპორტული გაზეთი "ლელო"
1063
მკითხველის კომენტარები / 0 /
მსგავსი ამბები
რუბრიკის სხვა სიახლეები
;