ცვლილება გარდაუვალია. მაურიციო სარის რომა ელოდება

"რომამ" სერია A-ს მორიგ ტურში შინ 1:4 წააგო "ნაპოლისთან". ისედაც ცნობილი იყო, რომ კლაუდიო რანიერი, რომელმაც ერთი თვის წინ ჩაიბარა გუნდი, "ჯალოროსიში" სეზონის ბოლომდე იმუშავებდა. რა თქმა უნდა, იყო იმის ალბათობაც, რომ წარმატების შემთხვევაში, 67 წლის სპეციალისტს სრულფასოვან კონტრაქტს გაუფორმებდნენ, მაგრამ საკვირაო მარცხმა ყველაფერს ნათელი მოჰფინა - მომავალ სეზონში "რომას" ახალი მწვრთნელი ეყოლება.

პარალელურად, კარგად ვერ მისდის საქმეები მაურიციო სარის, რომელმაც "ნაპოლიში" მუშაობით გაითქვა სახელი და ამიტომაც მიიღო "ჩელსის" ვიზა, თუმცა ამ გუნდში მას არაფერი გამოსდის. რეალურია, რომ "არისტოკრატები" სეზონის ბოლოს ჩემპიონთა ლიგის საგზურის გარეშე დარჩნენ. აქედანვე ჩანს, რომ სარის გუნდს ძალიან გაუჭირდება "მანჩესტერ იუნაიტედთან", "არსენალსა" და "ტოტენჰემთან" ჭიდაობა უპრესტიჟულეს ევროტურნირში მოსახვედრად.

შესაბამისად, დიდია იმის ალბათობაც, რომ სეზონის დასრულებისთანავე, სარი დატოვებს "ჩელსის" მთავარი მწვრთნელის პოსტს და დაბრუნდება იტალიაში, სადაც მას "რომა" ელოდება. ამ თემაზე სულ უფრო ხშირად წერს აპენინური მედია. მიუხედავად იმისა, რომ "ჩელსისთან" სარის კიდევ 2-წლიანი კონტრაქტი აკავშირებს, რომან აბრამოვიჩი არ იქნება ცვლილებების წინააღმდეგი. იტალიელი სპეციალისტის ავტორიტეტს სერიოზულად დაარტყა მეკარე კეპა არისაბალაგასთან დაკავშირებულმა ინციდენტმაც, როცა მწვრთნელმა ვერ შეძლო ესპანელი კიპერის მოედნიდან გაყვანა და გაბრაზებულმა... თავად დატოვა ტექნიკური ზონა.

ყოველდღიური სპორტული გაზეთი "ლელო"
708
მკითხველის კომენტარები / 0 /
მსგავსი ამბები
რუბრიკის სხვა სიახლეები
;