ცნობილი საფეხბურთო აგენტი ხვიჩა კვარაცხელიას ფასს ასახელებს!.. ახლა რუბინის დირექტორს ეს თანხა რომ შევთავაზოთ, შორს გაგვაგზავნის...  

ცნობილმა საფეხბურთო აგენტმა თემურ ღურწკაიამ გამოცემა "ბიზნეს ონლაინთან" ინტერვიუში ხვიჩა კვარაცხელიას მინიმალური სატრანსფერო თანხა დაასახელა. მისი თქმით, საქართველოს ნაკრებისა და ყაზანის "რუბინის" თავდამსხმელი 15 მილიონ ევროზე მეტი ღირს.

"კიკნაძემ ("ლოკომოტივის" გენერალური დირექტორი - რედ) ხვიჩა კვარაცხელია დაკარგა. მას ერთი ნაკლი აქვს, მეტს არც ჩამოთვლი - გულშემატკივრებისთვის ყალბია, სიომინი დაითხოვა. მან დაკარგა მოთამაშე, რომელიც მისი გუნდის სასტარტო შემადგენლობაში იყო, რომელიც მთავარი გასაყიდი ფასეულობა იყო. მან ვერ შეძლო მირანჩუკის გაყიდვა ერთი წლის განმავლობაში და გუნდში მოიყვანა მურილო და ჟოაო მარიო. ის ბოლომდე დამარცხდა", - ამბობს ღურწკაია.

შემდეგ ის კვარაცხელიას წასვლის მიზეზზე ლაპარაკობს: "მან ექვსი თვის განმავლობაში ითამაშა "ლოკომოტივში" და შედარებით დაბალი რანგის გუნდში წავიდა. ის "ლოკომოტივში" კაშკაშებდა, მისი ნიჭი აშკარად ჩანდა, კლუბში ხვიჩას ყველა ძალიან თბილად ექცეოდა. ის მირანჩუკებმაც კი მიიღეს... რატომ გაუშვა კიკნაძე? მათ არ იციან, როგორ მოილაპარაკონ".

ლაპარაკი იყო იმაზე, თითქოს კვარაცხელიას ტრანსფერი 3 მილიონი ევრო ღირდა და კიკნაძემ მის აგენტს ამ თანხის გადახადაზე უარი უთხრა. ღურწკაია ამ სიტუაციასაც განმარტავს:

"დიახ, ასეა. მაგრამ ახლა რომ დავურეკოთ რუსტემ საიმანოვს ("რუბინის" დირექტორი - რედ) და მას კვარაცხელიაში 10 მილიონი ევრო შევთავაზებთ, ის შორს გაგვაგზავნის. ის ამ თანხაზე არც კი ილაპარაკებს. რა თქმა უნდა, ხვიჩა 10 მილიონ ევროზე ძვირი ღირს. ვფიქრობ, ის დღეს უკვე 15 მილიონზე მეტად ფასობს და თუ "რუბინი" მოულოდნელად ევროთასებზე გავა, მისი ფასი კიდევ უფრო გაიზრდება. კვარაცხელია 19 წლისაა! ის ყველაფერს აკეთებს მოედანზე და როგორ შეიძლება ასეთი მოთამაშე გაუშვა?!", - დასძენს ღურწკაია.

კვარაცხელიასა და "რუბინს" შორის ხელშეკრულება ძალაში 2024 წლამდეა. ნახევარმცველმა კლუბში ეროვნულ ჩემპიონატში 27 მატჩი ჩაატარა, გაიტანა 3 გოლი და გააკეთა 4 პასი.

18780
მკითხველის კომენტარები / 0 /
მსგავსი ამბები
რუბრიკის სხვა სიახლეები
;