ცუდი 'ლეიკერსი', უიმედო 'გოლდენ სტეიტი' [ანალიზი]

გავიდა ერთი კვირა NBA-ის 2018-19 წლების სეზონის დაწყებიდან. ეს იყო მოვლენებით დატვირთული პერიოდი.

ბევრი მატჩის ბედი ბოლო წამებზე გადაწყდა, სუპერვარსკვლავები შესანიშნავ მატჩებს ატარებდნენ... პარალელურად, ცჰიცაგოტრიბუნე-ის მიმომხილველებმა ეროვნული საკალათბურთო ასოციაციის პირველი კვირის შედეგები შეაჯამეს და გარკვეული დასკვნები გამოიტანეს.

ლეიკერსი - არაფერი განსაკუთრებული

სამი მატჩის განმავლობაში, "ლეიკერსს" არ უჩვენებია რაღაც განსაკუთრებული თამაში. ისინი ცდილობენ გადაურბინონ მეტოქეს, მოიგონ ბრძოლა ფარქვეშ, მაგრამ აქედან ჯერ არაფერი გამოდის. გარდა ამისა, "ლეიკერსში" შეიკრიბა გუნდი, რომელიც გადავსებულია პერიმეტრიდან მეტად არასტაბილური მსროლელებით.

პირველ სამ მატჩში "ლეიკერსმა" სამქულიანების 31.8 პროცენტი (29/91) ჩააგდო. ორი სასტარტო მატჩის შემდეგ, ეს მაჩვენებელი კიდევ უფრო კატასტროფული იყო - 15/62 (24.2%). შედეგად, კალიფორნიულ კლუბს აქვს ბალანსი - 0 მოგება და 3 წაგება და თან, უახლოესი მატჩები ბრენდონ ინგრემისა და რაჟონ რონდოს გარეშე უნდა ჩაატაროს.

კარგი შედეგები თავისთავად არ მოვა, გუნდმა უნდა გააუმჯობესოს თამაში სეზონის მსვლელობისას. ბევრი ახალი მოთამაშე, ჯერჯერობით, დამთრგუნველ შთაბეჭდილებას ტოვებს. მაგრამ, მეორე მხრივ, ჩემპიონატის სტარტმა გამოაჩინა სუსტი მხარეები, რაზეც მუშაობაა საჭირო.

გოლდენ სტეიტი ვერ ისვრის

სამი მატჩის განმავლობაში, სტივენ კარის სამქულიანების ასეთი სიზუსტე აქვს - 16/34. საკმაოდ კარგი მაჩვენებელია. მაგრამ იგივეს ვერ ვიტყვით "გოლდენ სტეიტის" სხვა მოთამაშეებზე, რომლებმაც 40-დან მხოლოდ 8 (!) სამქულიანი ჩააგდეს.

ბუნებრივია, დიდი გამარჯვებების შემდეგ, რეგრესი ხშირად ხდება ხოლმე. კლეი ტომპსონმა 18-დან მხოლოდ 2 შორეული ტყორცნა მოათავსა კალათში, კევინ დურანტმა - 10-დან 1. ორივე მოთამაშემ სასწრაფოდ უნდა მოუმატოს ამ მაჩვენებლებს.

"უორიორზის" დანარჩენი მოთამაშეები ვერ იქნებიან სანდოები თავიანთი შორეული ტყორცნების შესრულებისას. დრეიმონდ გრინი, იონას ჟერებკო, ქუინ კუკი, ანდრე იგუოდალა, ალფონსო მაკინი - არცერთი არ წარმოადგენს სტაბილურ საფრთხეს სამქულიანების სროლისას.

რა თქმა უნდა, ჯერ ადრეა "გოლდენ სტეიტის" გამო შეშფოთება - ერთი წაგება არაფერს ნიშნავს. ამ გუნდში კვლავაც მოედანზე ოთხი ვარსკვლავი გადის (ამას ემატება დემარკუს კაზინსი, რომელიც აღდგენით პროცედურებს გადის აქილევსის მყესის ტრავმის შემდეგ). მაგრამ, გასულ სეზონში, "უორიორზი" კინაღამ დაისაჯა იმის გამო, რომ კარის, ტომპსონისა და დურანტის გარდა, პერიმეტრიდან შემტევი არ ჰყავდა. წელსაც, სიტუაცია დიდად არ იცვლება. ჯერჯერობით, "გოლდენ სტეიტი" თავისი თამაშით იმედს ვერ იძლევა.

ტორონტო რეალური საფრთხეა

პირველ ოთხ მატჩში "ტორონტო" ნამდვილ პრეტენდენტად მოჩანდა, რომელიც მზად არის დიადი სეზონი ჩაატაროს.

პირველ კვირას, კანადური კლუბის ბალანსია - 4 მოგება და 0 წაგება. თან "რეპტორზმა" დაამარცხა აღმოსავლეთ კონფერენციის ფინალში სავარაუდო მოწინააღმდეგე - "ბოსტონ სელტიქსი". "ტორონტომ" თავის თავს იმის უფლებაც მისცა, რომ კავაი ლენარდი დაასვენა, მაგრამ მაინც მოუგო სტუმრად "ვაშინგტონს".

კავაი ლენარდი საკმაოდ ჯანმრთელად გამოიყურება. შესანიშნავია კაილ ლაური. გუნდის ახალი მთავარი მწვრთნელი ნიქს ნერსი ფართო როტაციას იყენებს და ამასთან, იდეალურ შედეგს აღწევს. ეს იმის მტკიცებულებაა, რომ ნებისმიერ პოზიციაზე "ტორონტოს" სიღრმე და უნივერსალურობა საშუალებას აძლევს ნერსს უმტკივნეულოდ დაასვენოს წამყვანი მოთამაშეები ნებისმიერ დღეს ნებისმიერი მეტოქის წინააღმდეგ.

დიახ, ჯერჯერობით ადრეა გლობალური დასკვნების გაკეთება. მაგრამ, ყოველ შემთხვევაში, ზაფხულის რისკიანი გარიგება - ლენარდის შეძენა, როგორც ჩანს, აშკარად ამართლებს.

ჩრდილოვანი ფავორიტები

"დენვერმა", "ნიუ ორლეანმა" და "მილუოკიმ" სეზონი თავიანთ კონფერენციებში "ჩრდილოვანი" პრეტენდენტების სტატუსით დაიწყეს.
ელოდებიან, რომ "დენვერი", ბოლოს და ბოლოს, გავა დასავლეთის პლეი ოფში, რასთანაც ძალიან ახლოს იყო ბოლო ორ წელიწადში. "ნაგეტსის" ახალგაზრდა ბირთვი მუდმივად პროგრესირებს.

"პელიკანსს" შეუძლია დაიტრაბახოს MVP-ის პოტენციური კანდიდატით ენტონი დევისით, აგრეთვე, მისი რამდენიმე დამაინტრიგებელი დამხმარეთი, რომელთა შორის გამოირჩევიან ბიგმენები - ნიკოლა მიროტიჩი და ჯულიუს რენდლი.

"ბაქსს" ასევე ჰყავს საკუთარი პოტენციური MVP - იანის ანტენტოკუნმპო, აგრეთვე, კრის მიდლტონი, ახალი ნიჭიერი მწვრთნელი მაიკ ბუდენჰოლცერი და კარგი მსროლელები.

ამ გუნდებმა სეზონის სტარტზე 9 მატჩი მოიგეს და არცერთი არ წაუგიათ.

ამასთან, კითხვები რჩება სამივე გუნდთან მიმართებაში. დაცვის ერთი კარგი კვირა "დენვერისგან" არ ნიშნავს, რომ ასევე იქნება გრძელ დისტანციაზე.

"ნიუ ორლეანს" სჭირდება ძლიერი მოთამაშეები პერიმეტრზე, რათა ჯრიუ ჰოლიდეიმ ამოისუნთქოს და მთელი სეზონის განმავლობაში შეესაბამებოდეს მაღალ სტანდარტებს. "მილუოკიმ" უნდა გააგრძელოს იმის დამტკიცება, რომ მაიკ ბუდენჰოლცერის მიმართ გაცემული მაღალი ავანსები - რეალურობას წარმოადგენს. მაგრამ სამივე ეს კლუბი პოტენციურად სახიფათოა ამ სეზონში. ჯერჯერობით, ისინი სრულად ამართლებენ ამგვარ დახასიათებას.

1257
მკითხველის კომენტარები / 0 /
მსგავსი ამბები
რუბრიკის სხვა სიახლეები
;