ცხოვრებაძემ ლიგას გემო გაუსინჯა... პირველი გოლიც გაიტანა 

საქართველოს ხელბურთელ ვაჟთა ნაკრების წევრი გიორგი ცხოვრებაძე ახალ სეზონში საფრანგეთის „მონპელიეს“ ძირითად შემადგენლობაში გადაიყვანეს. რამდენიმე დღის წინ 18 წლის ხელბურთელმა საფრანგეთის „ლიდლ სტარლიგაში“ ითამაშა და პირველი გოლიც გაიტანა.

კლუბი სტუმრად „სენ-რაფაელს“ დაუზავდა - 29:29, ჩვენებურის 2 დარტყმიდან 1 შედეგიანი აღმოჩნდა. „მონპელიეს“ 6 მატჩიდან 4 მოგება, თითო ფრე და წაგება აქვს, 9 ქულით მეოთხე ადგილზეა. 

ამ მატჩის შემდეგ გიორგიმ ჩემპიონთა ლიგაშიც მოსინჯა ძალები პოლონეთის „კელცესთან“ სტუმრად შეხვედრისას. მოედანზე იგი 24-ე წუთზე შევიდა და პირველი ტაიმის ბოლომდე ითამაშა. ქართველმა და ჟულიენ ბოსმა ვალონტან პორტი და იანის ლენი შეცვალეს.

ისინი ერთმანეთს მარჯვენა შუამარბისა და გარემარბის პოზიციებზე ენაცვლებოდნენ. ცხოვრებაძემ მოედანზე შესვლისთანავე დაარტყა კარისკენ 9 მეტრიდან, თუმცა ააცილა. ფრანგები პირველი ტაიმის ბოლოს ორბურთიანი სხვაობით (14:12) დაწინაურდნენ და ეს სხვაობა საფინალო სასტვენამდე შეინარჩუნეს,

საბოლოოდ 29:27 გაიმარჯვეს. „მონპელიე“, რომელმაც ჩემპიონთა ლიგაში ზედიზედ მესამე მატჩი მოიგო და მეორე ადგილზეა, ეროვნულ ჩემპიონატში დღეს, 16 ოქტომბერს, „ისტრს“ შეხვდება, ხოლო 19 ოქტომბერს ჩემპიონთა ლიგის B ჯგუფის ლიდერ „კილს“ (გერმანია) უმასპინძლებს. 

ყოველდღიური სპორტული გაზეთი "ლელო"
222
მკითხველის კომენტარები / 0 /
მსგავსი ამბები
რუბრიკის სხვა სიახლეები
;