ცხოვრებაძის პირველი ჯილდო და კბილაშვილის საუკეთესო მოთამაშედ აღიარება მაკედონიაში

საქართველოს ხელბურთელ ვაჟთა ნაკრების რამდენიმე წევრი უცხოურ კლუბებში თამაშობს.

ერთ-ერთი მათგანი გახლავთ 18 წლის ტალანტი გიორგი ცხოვრებაძე, რომელმაც საფრანგეთის „მონპელიესთან“ კონტრაქტს ჯერ კიდევ 2017 წლის შემოდგომაზე 16 წლისამ მოაწერა ხელი და ორი სეზონი სარეზერვო გუნდთან ერთად საფრანგეთის ნაციონალლიგაში გაატარა.

ახალი სეზონის მოსამზადებელი პერიოდი ქართველმა ხელბურთელმა ძირითად გუნდთან ერთად ივარჯიშა და ქვეყნის ჩეპიონატის დაწყების წინ „მონპელიეს“ 16-კაციან შემადგენლობაში რეგულარულად ხვდება.

გასულ უქმეებზე სტრასბურში ხელბურთელთა საკლუბო გუნდების საერთაშორისო ტურნირი გაიმათა. ნახევარფინალში „მონპელიემ“ ლისაბონის „ბენფიკას“ მოუგო - 32:25. ერთი ბურთი ცხოვრებაძემ შეაგდო.

ჩემპიონთა ლიგის 2018 წლის გამარჯვებულმა ფრანგებმა ფინალში 27:25 დაამარცხეს ლიგის მუდმივი ბინადარი უნგრეთის „სეგედი“, რითაც სეზონისწინა პირველი ჯილდო მოიგეს. ამ წარმატებაში მოკრძალებული წვლილი ცხოვრებაძესაც მიუძღვის. 

„მონპელიე“ საფრანგეთის შარშანდელ ჩემპიონატში მხოლოდ „პარი სენ-ჟერმენს“ ჩამორჩა, თუმცა ლიგის საგზური კვლავ მოიპოვა. ახალი სეზონის გათამაშებას კლუბი 14 სექტემბერს მოქმედ ჩემპიონ სკოპიეს „ვარდართან“ საშინაო მატჩით დაიწყებს. 10 დღით ადრე კი საფრანგეთის ჩემპიონატის უმაღლესი დივიზიონის პაექრობები აიღებს სტარტს. გიორგი და მისი თანაგუნდელები პირველ ტურში „კრეტეის“ უმასპინძლებენ.


           ახალი საკლუბო სეზონისთვის ემზადება ქართველი ხელბურთელების - ირაკლი კბილაშვილისა და რეზო ჭანტურიას მაკედონიური სკოპიეს „მეტალურგი“, რომელმაც ამას წინათ სერბეთის ქალაქ კანიჟაში ხელბურთელ ვაჟთა საერთაშორისო ტურნირში მესამე ადგილი დაიკავა. პ

ირველობას ერთმანეთს ეცილებოდნენ სერბეთის „პარტიზანი“, ხორვატიის „ნექსე“, ისრაელის „რამათ ჰაშრონი“ და მაკედონიის „მეტალურგი“. სკოპიელები „ნექსესა (27:29) და „რამათ ჰაშრონთან“ (30:32) ორ-ორი ბურთის სხვაობით დამარცხდნენ, ბოლო დღეს კი „პარტიზანი“ 28:23 დაჯაბნეს და მესამე ადგილი დაიკავეს. ორი მარცხის მიუხედავად, ტურნირის საუკეთესო მოთამაშედ (MVP) კბილაშვილი დასახელდა. მეტალურგის ოფიციალური ვებგვერდი წერს:

„ქართველმა“ გამთამაშებელმა მოედანზე ყველაზე მეტი დრო გაატარა და გულიანი, დამაჯერებელი გამოსვლით „მეტალურგის“ თამაშის ხარისხი გამოაკეთა. 21 წლის კბილაშვილი ჯერჯერობით სრულად ამართლებს იმედს, რომელსაც მასზე კლუბი ამყარებს“. 

ირაკლი ჯერ „ქუთაისისა“ და „ქარიშხალას“ ღირსებას იცავდა, მერე ერთი სეზონი საბერძნეთში გაატარა, წინა სეზონი უკრაინის სუპერლიგის კლუბ „ოდესაში“ დაასრულა, წლეულს ზაფხულს კი მაკედონიის ერთ-ერთ ტიტულოვან გუნდს შეუერთდა.

საერთაშორისო ტურნირის შემდეგ „მეტალურგმა“ ერთი ამხანაგური მატჩიც გამართა სერბეთში და ქალაქ დუბოჩიცას გუნდი 34:25 დაამარცხა. კბილაშვილმა 2 ბურთი შეაგდო, რეზო ჭანტურიას კი, რომელიც სეზონის წინ დაუბრუნდა ძველ კლუბს და ტრავმას იშუშებს, ამხანაგურ პაექრობებში მონაწილეობა არ მიუღია. 

მაკედონიის ჩემპიონატი 7 სექტემბერს დაიწყება. ნოემბრიდან კი „მეტალურგი“ რანგით მეორე ევროტურნირში - EHF-ის თასის გათამაშებაში ჩაებმება, სადაც ჯგუფურ რაუნდში მოსახვედრად ერთი ეტაპის გავლა დასჭირდება.

ყოველდღიური სპორტული გაზეთი "ლელო"
511
მკითხველის კომენტარები / 0 /
მსგავსი ამბები
რუბრიკის სხვა სიახლეები
;