ძალოსნობა. ინტერივუ ზურაბ ანთაურთან: არადა, გუნდური პირველობაც შეიძლებოდა

მილანში 15 და 17-წლამდელ ძალოსანთა ევროპის ჩემპიონატზე ქართველმა სპორტსმენებმა 1 ოქროს (არჩილ მალაყმაძე), 6 ვერცხლის (არჩილ მალაყმაძე - 2, ლომია თებიძე - 3, ზაზა ლომთაძე - 1), 8 ბრინჯაოს (საბა ასანიძე - 2, ედუარდ კაკაბაძე - 2, ზაზა ლომთაძე - 2, თორნიკე ტაბატაძე - 2) მედალი მოიპოვეს და საერთო გუნდურ ჩათვლაში 534 ქულით მეორე ადგილი დაიკავეს. ჩვენს ძალოსნებს მხოლოდ თურქებმა (558 ქულა) გაუსწრეს, 511 ქულით მესამე ადგილზე მასპინძლები გავიდნენ.

- მსოფლიოს პირველობისთვის დიდხანს და ნაყოფიერად ვემზადებოდით, - გვითხრა ჭაბუკ ძალოსანთა საქართველოს ნაკრების მთავარმა მწვრთნელმა ზურაბ ანთაურმა.

ხუთი საწვრთნელი შეკრება გავიარეთ, ყოველგვარი ხელშეწყობა გვქონდა და შედეგმაც არ დააყოვნა - ქართული ძალოსნობის ისტორიაში ჭაბუკებმა პირველად დაიკავეს გუნდური მეორე ადგილი და მსოფლიოს ახალგაზრდობის მესამე ოლიმპიური თამაშების საგზურიც მოვიპოვეთ.

მილანში ოთხი ადგილი თამაშდებოდა არალიცენზირებულ ქვეყნებს შორის. კონკურენცია დიდი იყო, მაგრამ ჩვენმა ბიჭებმა ყველაფერი გააკეთეს მიზნის მისაღწევად - 159 ქულა მოაგროვეს და პირველი ადგილი დაიკავეს.

ეს წარმატება სპორტსმენებთან ერთად მათთან მომუშავე მწვრთნელების დამსახურება და ფედერაციის სწორად მუშაობის შედეგიცაა. აღსანიშნავია ის დამატებითი მუხტიც, რომ ათლეტებს ფიცარნაგზე გასვლის წინ ამხნევებდნენ სამგზის ოლიმპიური ჩემპიონი, ჩვენი ფედერაციის პრეზიდენტი კახი კახიაშვილი და ოლიმპიური ჩემპიონი, ეროვნული ნაკრების მწვრთნელი გიორგი ასანიძე.

ყოველივეს მიუხედავად, ერთგვარი უკმაყოფილების გრძნობა მაინც დამრჩა. მართალია, თითქმის ყველამ გააკეთა ის, რასაც ველოდით, მაგრამ იმ ორ წონაშიც რომ სასურველი შედეგისთვის მიგვეღწია, გუნდურ პირველ ადგილს დავიკავებდით.

- რომელ წონებს გულისხმობთ?

- უფრო მეტს ველოდი 62 კილოგრამ წონით კატეგორიაში გურამ გიორბელიძისგან. მან თვე-ნახევრის წინ ვარჯიშებზე 146 კილო აკრა.

მერე საქართველოს პირველობაზე ტრავმა მიიღო და რამდენიმე დღე კი გაუცდა, რამაც, ცხადია, ხელი შეუშალა, მაგრამ პერსპექტიულ ძალოსანს, რომელიც შარშან 15-წლამდელებში ევროპის ჩემპიონი გახდა, მაინც მეტი შეეძლო:

შეჯიბრებაზე გამგზავრების წინ საკონტროლო შემოწმებისას 143 კილო ისე თავისუფლად ასწია, ვფიქრობდი, რომ მილანში 145-146 კილოს აუცილებლად დაძლევდა. მან კი მხოლოდ ერთი ცდა გამოიყენა და 136 კილოს დასჯერდა. ვფიქრობ, ფსიქოლოგიურ წნეხს ვერ გაუძლო, თორემ ფიზიკურად მზად იყო მედლისთვის. საბოლოოდ მე-6 ადგილზე გავიდა და გუნდს 20 ქულა შესძინა.

77 კილოში აშკარად დაგვჩაგრეს: სომეხ კარენ მარგარიანს აკვრაში ორი წონა - 165 და 168 კილო უმართებულოდ ჩაუთვალეს, რადგან ამ სიმძიმეების აწევისას ხელი ბოლომდე ვერ გამართა, რაც შეცდომად ითვლება.

ჟიურიმ განიხილა ეს შედეგები. ხუთიდან სამი არბიტრი მომხრე იყო, მარგარიანს ეს წონები გაუქმებოდა, მაგრამ ჟიურის თავმჯდომარე ფაშიკ ალავერდიანის სიტყვამ გადაწონა. სომეხი ათლეტისთვის მარტო 165 კილო რომ ჩაეთვალათ, თებიძეს საქართველოს პირველობაზე 174 კილო დაძლეული ჰქონდა და მილანშიც შეეძლო ამ მოძრაობაში ოქრო აეღო.

იძულებული ვიყავით, 178 კილო შეგვეკვეთა. ლომიამ მკერდამდე აიღო შტანგა, მაგრამ შემდეგ გაითიშა და ფიცარნაგზე დაეცა. საბედნიეროდ, ყველაფერი კარგად დასრულდა. ამ მოძრაობაში ოქრო გქონდა დაგეგმილი, რადგან თებიძე აკვრაში ძლიერია. რომ არა ზემოთ აღნიშნული ეს ორი ფაქტი, გუნდურში აუცილებლად პირველ ადგილზე გავიდოდით.

- ამჯერად ერთ ოქროს დავჯერდით.

- არჩილ მალაყმაძე ძლიერია ატაცში და მან თავისი შანსი გამოიყენა - 136 კილოგრამით ოქროს მედალი დაიმსახურა, აჯობა თურქ ფურკან ოზბეკს, რომელიც ევროპის შარშანდელი ჩემპიონია. ამას წინათ ტაშკენტში ახალგაზრდების მსოფლიოს ჩემპიონატზე, სადაც ირაკლი ჩხეიძე პირველი იყო, ოზბეკი 20-წლამდელებში გამოდიოდა და მესამე ადგილი დაიკავა.

- ტაბატაძეზე მინდა გკითხოთ...

- ევროპის პირველობისთვის მზადებისას თორნიკეს, რომელიც მძიმე წონაში ასპარეზობდა, ტრავმამ შეუშალა ხელი, თანაც მას სუნთქვის პრობლემა აქვს, რამაც მილანშიც იჩინა თავი - 177 კილოგრამის აწევისას გაითიშა და ფიცარნაგს თუ დაუბრუნდებოდა, არ მეგონა. შარშან კოსოვოშიც მოუვიდა ასეთი რამ ევროპის პირველობაზე და მაშინ ასპარეზობა ვეღარ განაგრძო, ამჯერად კი საკუთარ თავს სძლია.

ჩვენმა სამედიცინო პერსონალმა და მწვრთნელებმაც ყველაფერი გავაკეთეთ მის გასამხნევებლად. ტაბატაძემაც მესამე ცდაზე 177-კილოიანი შტანგა დაიმორჩილა. ორჭიდში თურქ კებრაილ აქარის აჯობა და ჩემპიონატი ორი ბრინჯაოთი დაასრულა.

15-წლამდელთა პირველობაზე 5 დებიუტანტი გვყავდა. მათგან - გიორგი ასანიძის ვაჟმა - საბა ასანიძემ იყოჩაღა: 77 კილოში მან 139 კილოგრამი აკრა, ორჭიდში 242 კილოს მოუყარა თავი და ორი ბრინჯაოს მედალი დაიმსახურა. ასე რომ, მილანიდან 15 მედლით დავბრუნდით, რაც არაჩვეულებრივი შედეგია.

ევროპირველობისთვის მზადების პერიოდში რომ არა ბატონი კახი კახიაშვილის, ოლიმპიური მზადების ცენტრის უფროს ბორის ფირცხელიანის, სამინისტროს და ეროვნული ოლიმპიური კომიტეტის თანადგომა, მსგავსი წარმატების მიღწევა შეუძლებელი იქნებოდა.

- შემოდგომით ახალგაზრდების ევროპის ჩემპიონატში ქართველ 17-წლამდელთაგან ვინმეს თუ ვიხილათ?

- შესაძლოა, ლომია თებიძემ ან არჩილ მალაყმაძემ მიიღოს მონაწილეობა. ამ ორი სპორტსმენიდან ერთ-ერთი არგენტინაში წავა ოლიმპიადაზე, მეორე კი, დიდი ალბათობით, ახალგაზრდების ევროპის პირველობაზე მოსინჯავს ძალებს პოლონეთში. ბუენოს აირესის თამაშებზე თუ ვინ დაიცავს საქართველოს სპორტის ღირსებას, ათიოდე დღეში გაირკვევა - 13 აგვისტოს კანდიდატურას დავასახელებთ.

ყოველდღიური სპორტული გაზეთი "ლელო"
1175
მკითხველის კომენტარები / 0 /
მსგავსი ამბები
რუბრიკის სხვა სიახლეები
;