ძალოსნობა. ძალოსნების ნაკრები მსოფლიოს ჩემპიონატზე გაემგზავრა. რას უნდა ველოდეთ?

თურქმენეთის დედაქალაქ აშხაბადში 1 ნოემბერს აიღო სტარტი და 10 ნოემბერს დამთავრდება ძალოსანთა მსოფლიოს ჩემპიონატი, რომელშიც 88 ქვეყნის 604 წარმომადგენელი იბრძოლებს მედლებისთვის.

ათლეტთა შუააზიური ფორუმით სპორტის ამ სახეობაში ახალი ერა დაიწყო, რადგან წლეულს ზაფხულს ტაშკენტში ძალოსნობის საერთაშორისო ფედერაციის (IWF) კონგრესმა ახალი წონითი კატეგორიები დაამტკიცა, რომლებიც სწორედ 1-ლი ნოემბრიდან შევიდა ძალაში.

როგორც ვაჟები, ისე ქალები მსოფლიოს და ევროპის ჩემპიონატებსა თუ პირველობებზე, ასევე, საერთაშორისო ტურნირებში 10-10 წონით კატეგორიაში მოსინჯავენ ძალებს, ხოლო ოლიმპიურ თამაშებზე ორივე სქესისთვის მედლების კომპლექტი 7-7 წონაში გათამაშდება.

ახალი წონებია:
ვაჟებისთვის: საერთაშორისოზე - 55, 61, 67, 73, 81, 89, 96, 102, 109 და +109 კილოგრამი; ოლიმპიურ თამაშებში - 61, 67, 73, 81, 96, 109, +109 კგ;
ქალებისთვის: საერთაშორისოზე - 45, 49, 55, 59, 64, 71, 76, 81, 87, +87 კგ; ოლიმპიურ თამაშებში - 49, 55, 59, 64, 76, 87, +87 კგ;
ახალგაზრდები: ვაჟებისთვის - 49, 55, 61, 67, 73, 81, 89, 96, 102, +102; გოგონებისთვის - 40, 45, 49, 55, 59, 64, 71, 76, 81, +81 კგ.

კონგრესზე მიღებული დადგენილებით, ოლიმპიურ თამაშებზე ერთ წონით კატეგორიაში ორი სპორტსმენის გამოყვანა აიკრძალა. თანაც როგორც ქალთა, ისე ვაჟთა თითოეულ წონაში 14-14 სპორტსმენი იასპარეზებს.

შეიცვალა ოლიმპიადის საგზურების მოპოვების წესიც: უწინ მსოფლიოს ჩემპიონატებზე ნაკრები აგროვებდა სალიცენზიო ქულებს და ამის მიხედვით განისაზღვრებოდა, ქვეყანა რამდენი სპორტსმენით წარდგებოდა ოლიმპიადაზე. ამიერიდან ყველა წონაში სპორტსმენი თავად იბრძოლებს ინდივიდუალური ლიცენზიის მოსაპოვებლად რეიტინგის მიხედვით, როგორც ეს სპორტის ზოგიერთ სახეობაშია.

ლაშა ტალახაძე ევროპის სამგზის ჩემპიონია!!! [VIDEO]

აშხაბადის მსოფლიოს ჩემპიონატში საქართველოდან შვიდი ძალოსანი იასპარეზებს. ჩვენებურთაგან 3 ნოემბერს გავა თურქმენულ ფიცარნაგზე 67 კილოგრამ წონით კატეგორიაში გოგა ჩხეიძე, რომელმაც ამას წინათ პოლონეთში 23-წლამდელთა ევროპის ჩემპიონატზე ორი ოქროს და ერთი ვერცხლის (ატაცში) მედალი დაიმსახურა.

იგი B ჯგუფში (დანარჩენები A ჯგუფში არიან) დილით მოსინჯავს ძალებს. ამავე წონის A-ჯგუფელები მედლებისთვის 4 ნოემბერს იბრძოლებენ. 3 ნოემბერს საღამოს მეტოქეებს ევროპის წლევანდელი ჩემპიონი შოთა მიშველიძე დაუპირისპირდება.

6 ნოემბერს 89 კილოში კონკურენტებთან გაარკვევს ურთიერთობას რევაზ დავითაძე, რომელმაც წლეულს შედეგებით ყოველგვარ მოლოდინს გადააჭარბა: ჯერ უფროსებში გახდა ევროპის ჩემპიონი (ორჭიდსა და ატაცში - ოქრო, აკვრაში - ვერცხლი), მერე 20-წლამდელთა მსოფლიოს და ევროპის ჩემპიონატები მოიგო. სულ კი 6 ოქროს და 3 ვერცხლის მედალი დაიმსახურა.

წარმოშობით უკრაინელმა ათლეტმა ანტონ პლესნოიმ 2017 წელს მიიღო საქართველოს მოქალაქეობა და შარშანვე 94 კილოში ჩვენი ქვეყნის ჩემპიონი გახდა. 22 წლის სპორტსმენმა წლეულს ტიტული შეინარჩუნა. საქართველოს სახელით საერთაშორისო სარბიელზე პირველად ამას წინათ პოლონეთში 23-წლამდელთა ევროპაზე გამოვიდა და დებიუტი ოქრო (ატაცი)-ვერცხლით (ორჭიდი) აღნიშნა. აშხაბადში იგი 96 კილოში იასპარეზებს.

8 ნოემბერს 102 კილოგრამ წონით კატეგორიაში გოგა ჩხეიძის ძმა - ირაკლი ჩხეიძე მოსინჯავს ძალებს. საგულისხმოა, რომ ზუგდიდელი ათლეტი წლეულს 20-წლამდელთა მსოფლიოს და ევროპის ჩემპიონატებში კვარცხლბეკის უმაღლეს საფეხურზე სამ-სამჯერ ავიდა. უფროსებთან გამკლავებას როგორ შეძლებს, ამას თურქმენული ფიცარნაგი გვიჩვენებს.

ასპარეზობის ბოლო დღეს - 10 ნოემბერს მძიმე წონაში (+109) მედლებისთვის ორი ქართველი გოლიათი იბრძოლებს - რიოს ოლიმპიური თამაშების გამარჯვებული, მსოფლიოს ორგზის და ევროპის სამგზის ჩემპიონი, პლანეტის უძლიერესი ათლეტი ლაშა ტალახაძე და რიოს თამაშების ბრინჯაოს პრიზიორი, ევროპის ჩემპიონი ირაკლი თურმანიძე.

იმის მიუხედავად, რომ საქართველოს ძალოსანთა ნაკრები (მთავარი მწვრთნელი ოლიმპიური ჩემპიონი გიორგი ასანიძე) მსოფლიოს ჩემპიონატზე უმთავრესად ახალგაზრდული შემადგენლობით გაემგზავრა, აშხაბადიდან მაინც უხვ ნადავლს ველით!

2052
მკითხველის კომენტარები / 2 /
არნო
0
რას უნდა ველოდოთ? უნდა ველოდოთ გამარჯვებებს; მათშორის ლაშას ოქროებს, რეკორდებს და გვარამიას გულის წასვლას
არნო
0
მიდი ლაშა, ოქროს მედლებითა და რეკორდებით იმ ღორის ტილს /რ-2-ის დირექტორი/ ინფაქტი აჰკიდე
მსგავსი ამბები
რუბრიკის სხვა სიახლეები
;