ძალოსნობა. მსოფლიოს ჩემპიონატი: ბრინჯაო არ ჩანდა მიუწვდომელი

ამერიკულ ანაჰაიმში გრძელდება ძალოსანთა მსოფლიოს 2017 წლის ჩემპიონატი. ოკეანის გაღმა საქართველოს ნაკრები (მთავარი მწვრთნელი ოლიმპიური ჩემპიონი გიორგი ასანიძე) ოთხი სპორტსმენით გაემგზავრა. ორმა მათგანმა უკვე მოსინჯა ძალები: შოთა მიშველიძემ 62 კილოგრამ წონით კატეგორიაში მესამე ადგილი დაიკავა.

ბრინჯაო მიუწვდომელი არც 85 კილოში ჩანდა, სადაც 20-წლამდელებში ევროპის წლევანდელი ჩემპიონი რევაზ დავითაძე გამოდიოდა. განსაკუთრებით - ატაცში. 19 წლის ქართველმა ძალოსანმა ალბანურ დურესში ახალგაზრდების ევროპაზე 165 კილო აიტაცა, ამიტომაც ბუნებრივი იყო ამ დისციპლინაში შეჯიბრების 160 კილოთი დაწყება.

სამწუხაროდ, ჩვენებურს პირველი ორი ცდა გაუცუდდა, ეს წონა მესამე მისვლისას დაძლია, რაც ამ ჩემპიონატზე მეხუთე შედეგი იყო, არადა, იტალიელმა ანტონიო პიცოლატომ ბრინჯაოს მედალი 162 კილოგრამით დაიმსახურა. პირველ-მეორე ადგილებზე სოლიდური შედეგებით ჩილელი ერლი პერეს მენდესი (175) და ირანელი კიანოუშ როსტამი (174) გავიდნენ. საგულისხმოა ერთი ფაქტიც, ატაცში 11 სპორტსმენის 33-დან მხოლოდ 17 ცდა გამოდგა შედეგიანი. აკვრაში მხოლოდ - 12.

დავითაძემ პირველ ჯერზე 182 კილო აკრა, მერე 190 კილოს ვერ მოერია, ბოლო ცდაზე 191-კილოიანი შტანგა დაიმორჩილა, მაგრამ კვარცხლბეკს მიღმა რომ აღმოჩნდებოდა, იმთავითვე იყო ცნობილი, რადგან ძალიან ბევრ მონაწილეს საწყის წონად 200 და მეტი კილო ჰქონდა შეკვეთილი, მათ შორის ატაცში ვერცხლის პრიზიორ როსტამს, მაგრამ 212 კილო აზიელ სპორტსმენს არ დაემორჩილა და საბოლოოდ ორჭიდში შეუფასებელი დარჩა.

აქ ოქროს მედალი ერთადერთი შედეგიანი ცდით (103 კგ) ჩილელ მენდესს ხვდა. მეორე-მესამე ადგილებზე პოლონელი მაცეია კშიშტოფ ზვარიჩი (197) და სებასტიან იმადოუსენი (საფრანგეთი, 196) გავიდნენ. მართალია, იტალიელმა პიცოლატომაც 196 კილო დაძლია, მაგრამ აპენინელი პირადი წონით ფრანგზე მძიმე არმოჩნდა.

85 კგ
1. ერლი პერეს მენდესი (ჩილე)- 378 (175+203)
2. მაცეია კშიშტოფ ზვარიჩი (პოლონეთი)- 359 (162+197)
3. ანტონიო პიცოლატო (იტალია)- 358 (162+196)

* * *
დღეს თბილისის დროით 8 საათზე ანაჰაიმის ფიცარნაგზე მეტოქეებს ანასტასია გოტფრიდი (90 კგ) დაუპირისპირდება.

ყოველდღიური სპორტული გაზეთი "ლელო"
1076
მკითხველის კომენტარები / 0 /
მსგავსი ამბები
რუბრიკის სხვა სიახლეები
;