[ძალოსნობა. საქართველოს ჩემპიონატი] პირველი დღე სამი რეკორდით

დიღომში ოლიმპიური ჩემპიონ ვაჟა კაჭარავას სახელობის ფრენბურთის სასახლეში დაიწყო ძალოსანთა საქართველოს ჩემპიონატი, რომელიც სამ დღეს გასტანს. პირველობაში ქვეყნის 12 რაიონის 100-მდე ათლეტი მოსინჯავს ძალეს. გუშინ ფიცარნაგზე სამი წონითი კატეგორიის სპორტსმენები ეცილებოდნენ ერთმანეთს საპრიზო ადგილებს.

განსაკუთრებით საინტერესო და დაძაბული გამოდგა პაექრობები 61 კილოში. ქუთაისელმა შოთა მიშველიძემ, რომელმაც წლეულს ბათუმში ევროპის ჩემპიონატზე 156 კილოგრამი აკრა და ამ მოძრაობაში ოქროს მედალი დაიმსახურა, გუშინ ქვეყნის ჩემპიონატზე სამი კოლოგრამით მძიმე შტანგა დაიმორჩილა და საქართველოს რეკორდი კილოგრამით გააუმჯობესა. მანამდე 136 კილო აიტაცა და აქაც უწინდელ მიღწევას კილოგრამით გადაამეტა, ორჭიდის ჯამში 295 კილოგრამიც საქართველოს რეკორდია. სამივე წინა მიღწევაც მიშველიძეს ეკუთვნოდა. 

67 კილოგრამ წონით კატეგორიაში შეუდარებელი იყო ზუგდიდელი გოგა ჩხეიძე, რომელსაც წლევანდელ ევროპაზე აკვრაში 169 კილოთი ვერცხლი, ორჭიდში კი 308 კილოთი ბრინჯაო ერგო. ამჯერად იგი, მართალია, ნაკლებ წონებს დასჯერდა, მაგრამ ორჭიდში მეორეადგილოსან გურამ გიორბელიძეს 38 კილოგრამით აჯობა.

დღეს ასპარეზობა კიდევ სამ წონით კატეგორიაში გაიმართება. ქვეყნის ჩემპიონის ტიტულისთვის 73, 81, 89 კილოგრამი წონითი კატეგორიის ათლეტები დაუპირისპირდებიან ერთმანეთს. ასპარეზობა 11.30 საათზე დაიწყება.

55 კგ

  1. გიორგი დოკვაძე (საჩხერე) - 232 (105+127)
  2. ბაჩუკი შამილიშვილი (აჭარა) - 186 (81+105)
  3. ზაზა ფუკარაძე (აჭარა) - 185 (87+98)

61 კგ

  1. შოთა მიშველიძე (ქუთაისი) - 295 (136+159)
  2. გოდერძი ბერდელიძე (საჩხერე) - 279 (131+148)
  3. რამინ შამილიშვილი (აჭარა) - 267 (120+147)

67 კგ

  1. გოგა ჩხეიძე (ზუგდიდი) - 300 (137+163)
  2. გურამ გიორბელიძე (ქუთაისი) - 262 (119+143)
  3. ჯემალ შავაძე (აჭარა) - 210 (94+116)
407
მკითხველის კომენტარები / 0 /
მსგავსი ამბები
რუბრიკის სხვა სიახლეები
;