ძალოსნობა. ჩხეიძის ხუთიანები ხვალ ტალახაძისა და თურმანიძის ჯერია

აშხაბადში ძალოსანთა მსოფლიოს ჩემპიონატში გუშინ 102 კილოგრამი წონითი კატეგორიის ვაჟებმა იასპარეზეს.

მედლების მაძიებელთა შორის იყო 20-წლამდელებში წლევანდელი მსოფლიოს და ევროპის ჩემპიონატების სამ-სამი ოქროს მედლის მფლობელი ირაკლი ჩხეიძე. ქართველმა ძალოსანმა საკუთარი შესაძლებლობები ბოლომდე ვერ გამოავლინა - ექვსიდან სამი ცდა გაუცუდდა.

ატაცში მან მესამე მისვლისას 168-კილოგრამიანი შტანგა დაიმორჩილა და მე-5 ადგილზე გავიდა. არადა, ტაშკენტში 20-წლამდელთა მსოფლიოზე მისი საუკეთესო შედეგი იყო 171 კილო.

მაშინ უზბეკ აკბარ ჟურაევს ამ მოძრაობაში 4 კილოთი, ორჭიდში კი 13 კილოთი აჯობა. ამჯერად ჟურაევი ატაცში შეუდარებელი გახლდათ - 180 კილოგრამით ოქროს მედალი დაისაკუთრა და იუნიორებშიც მსოფლიოს რეკორდი დაამყარა (მას ეკუთვნის ამ ასაკში მსოფლიოს რეკორდი ორჭიდშიც - 392 კგ). მეორე-მესამე ადგილები ირანელმა ალი ჰაშემიმ (179 კგ) და უკრაინელმა დმიტრო ჩუმაკმა (176 კგ) გაინაწილეს.

აკვრაში ჩხეიძის მხოლოდ მეორე ცდა გამოდგა შედეგიანი - 205 კილოგრამით (213 კგ ვერ მოერია) იგი აქაც მეხუთე იყო. პირველ-მესამე ადგილები რეზა ბეირალვანდმა (ირანი, 218), ჩუმაკმა (217) და ჰაშემიმ (217) დაიკავეს.

102 კგ.
1. ალი ჰაშემი (ირანი) 396 (179+217)
2. დმიტრო ჩუმაკი (უკრაინა) 393 (176+217)
3. რეზა ბეირალვანდი (ირანი) 393 (175+218)
5. ირაკლი ჩხეიძე (საქართველო) 376 (168+208)

ხვალ მსოფლიოს ჩემპიონატზე ქართველთაგან მძიმე წონაში (+109) რიოს ოლიმპიური თამაშების გამარჯვებული, ორგზის მსოფლიოს და სამგზის ევროპის ჩემპიონი ლაშა ტალახაძე და რიოს ოლიმპიადის მესამე პრიზიორი, ევროპის ჩემპიონი ირაკლი თურმანიძე იასპარეზებენ.

ყოველდღიური სპორტული გაზეთი "ლელო"
931
მკითხველის კომენტარები / 0 /
მსგავსი ამბები
რუბრიკის სხვა სიახლეები
;