ძალოსნობა. ძალოსნობა. 17-წლამდელთა ბათუმური რეპეტიცია ევროპის ჩემპიონატამდე

წლეულს 6-13 აპრილს ძალოსანთა ევროპის ჩემპიონატს ბათუმი უმასპინძლებს, რომელიც სასპორტო ქალაქად დასახელდა.

საგულისხმოა, რომ ამ შეჯიბრებაზე ათლეტებს ტოკიოს 2020 წლის ოლიმპიური თამაშებისთვის სალიცენზიო ქულებიც დაერიცხებათ, ამიტომ ჩვენს ზღვისპირეთში კონტინენტის უძლიერესი სპორტსმენები მოიყრიან თავს.

აჭარის ავტონომიური რესპუბლიკის მესვეურები საქართველოს ძალოსნობის ფედერაციასთან ერთად მონდომებით ემზადებიან ამ მნიშვნელოვანი ასპარეზობისთვის, რომელიც ბათუმის სპორტის სასახლეში ჩატარდება. მოსათელ დარბაზში კი რეპეტიცია გაიარეს 17-წლამდელმა ათლეტებმა - ამ ასაკში საქართველოს ჩემპიონატი (მთავარი მსაჯი ზურაბ ანთაური) გაიმართა. აჭარის ავტონომიური რესპუბლიკის მთავრობის თავმჯდომარე თორნიკე რიჟვაძე და განათლების, კულტურისა და სპორტის მინისტრი ინგა შამილიშვილი შეჯიბრების მონაწილეებს მიესალმნენ და წარმატება უსურვეს, თან ბათუმში საწვრთნელ შეკრებაზე მყოფ საქართველოს ნაკრების წევრებსაც შეხვდნენ.

-17-წლამდელთა ჩემპიონატში მედლებისთვის 14 რაიონის 120-მდე წარმომადგენელი იბრძოდა, - გვითხრა ჭაბუკთა საქართველოს ნაკრების მთავარმა მწვრთნელმა ზურაბ ანთაურმა. - მსგავს პაექრობაში პირველად მოსინჯეს ძალები დედოფლისწყაროელმა და ჩხოროწყუელმა ბიჭებმა, ხოლო გოგონებში ზუგდიდელმა ნათია გადელიამ და ხონელმა მარიამ მურღვლიანმა თავი რეკორდებით გამოიჩინეს. გადელიამ 15 და 17-წლამდელთა 8-8 რეკორდი გააუმჯობესა, თანაც ორჭიდის ჯამში საუკეთესო მაჩვენებელს 17 კილოგრამით გადააჭარბა. 12 წლის მურღვლიანმა 15 და 17-წლამდელთა 7-7 რეკორდი დაამყარა, ორჭიდის ჯამში კი სარეკორდო ზღვარს მანაც 17 კილოგრამით გადაამეტა.

ბიჭების 67 კილოში 15-წლამდელთა შორის ქუთაისელმა თორნიკე ლომთაძემ საქართველოს 5 რეკორდი დამყარდა: მან 93 კილოგრამი აიტაცა და 118 კილოგრამი აკრა, ორჭიდში კი 211 კილოს მოუყარა თავი. ამ ასაკშივე გურამ ვეკუამ (81 კგ) 6 რეკორდი მიითვალა, ორჭიდში წინა მაჩვენებელს 21 კილოგრამით გადაამეტა.

ბათუმში შესანიშნავად იასპარეზა 81 კილოში ზუგდიდელმა მანუჩარ გოგოხიამ - ვერცხლის მედალოსან ლუკა ოჩიგავას 40 კილოთი აჯობა. მანუჩარი მედლებს 17-წლამდელთა მსოფლიოს ჩემპიონატშიც მოიპოვებდა, მაგრამ ამერიკის საელჩომ შეუშალა ხელი - ქვეყანაში შესასვლელი ვიზა არ მისცა. არადა, კარგ ფორმაში იყო და მხარს აუბამდა თანაგუნდელებს - გურამ გიორგელიძესა და ლაშა თაქთაქიშვილს, რომლებმაც ჯამში 5 ვერცხლი მოინაგრეს. გიორბელიძეს მუხლის ტრავმა აწუხებდა, თორემ უკეთესი შედეგიც ექნებოდა. არადა, ევროპის ორი რეკორდი დაამყარა ატაცსა (120 კგ) და ორჭიდში (270 კგ). საქართველოს ჩემპიონატში კი უკონკურენციოდ გავიდა პირველ ადგილზე.

ბათუმურმა ბატალიებმა კიდევ ერთხელ დაგვარწმუნა, რომ ქართულ ძალოსნობას შესანიშნავი თაობა ეზრდება. ახლა ახალგაზრდული და ჭაბუკთა ნაკრები გუნდების წევრები აჭარის დედაქალაქში უფროსებთან ერთად გაივლიან საწვრთნელ შეკრებას და მომავალი შეჯიბრებებისთვის მოემზადებიან - წინ მნიშვნელოვანი ტურნირები გველის: 1-9 ივნისს ფიჯი 20-წლამდელთა მსოფლიოს ჩემპიონატს უმასპინძლებს, 7-14 ივლისს კიშინიოვში 20 და 23-წლამდელთა ევროპის ჩემპიონატია დანიშნული, ხოლო 4-15 სექტემბერს 15 და 17-წლამდელები რუმინულ ფიცარნაგზე კონტინენტის პირველობაში მოსინჯავენ ძალებს. ვეცდებით, შარშანდელი მონაგარი ვამრავლოთ.

კვარცხლბეკი
49 კგ. 1. ზურაბ მსხალაძე (აჭარა) - 144 (66+78), 2. არჩილ ოქროპირიძე (თბილისი) - 134 (58+76), 3. გოგა ჯაჯვანი (ზუგდიდი, ოლიმპიური მზადების ცენტრი) - 127 (57+70).

55 კგ. 1. იმედა შავაძე (აჭარა) - 163 (73+90), 2. საბა აბაშიძე (აჭარა ო.მ.ც.) - 162 (72+90), 3. გოგიტა შარაშიძე (აჭარა) - 150 (70+80).
61 კგ. 1. გიორგი ხარაზიშვილი (ხაშური, ო.მ.ც.) - 200 (93+107), 2. გიორგი ახალაძე (ქუთაისი) - 187 (87+100), 3. ზურა შამილიშილი (აჭარა) - 177 (81+96).
67 კგ. 1. გურამ გიორბელიძე (ქუთაისი) - 240 (110+130), 2. სანდრო ღარიბაშვილი (დუშეთი) - 226 (103+123), 3. მალხაზ გორგოშაძე (აჭარა) - 212 (90+122).
73 კგ. 1. საბა ასანიძე (თბილისი) - 249 (104+145), 2. ნიკა ჭიჭინაძე (ზუგდიდი -აფხაზეთი) - 240 (105+135), 3. ბონდო კილაძე (ხაშური, ო.მ.ც.) - 239 (107+132).

81 კგ. 1. მანუჩარ გოგოხია (ზუგდიდი ო.მ.ც.) - 285 (130+155), 2. ლუკა ოჩიგავა (თბილისი) - 245 (110+135), 3. გურამ ვეკუა (ზუგდუდი ო.მ.ც.) - 235 (106+129).

89კგ. 1. ლუკა ქაშიბაძე (წყალტუბო ო.მ.ც.) - 259 (113+146), 2. იკა ჭიჭინაძე (ზუგდიდი-აფხაზეთი) - 255 (112+143), 3. დავით ბერიშვილი (საჩხერე) - 254 (114+140).

96კგ. 1. გიორგი კირვალიძე (საჩხერე) - 234 (107+127), 2. გიორგი ბიბილაშვილი (თბილისი, ო.მ.ც.) - 197 (90+107), 3. ნიკოლოზ სამყურაშვილი (საჩხერე) - 196 (91+105).

102 კგ. 1. ვანო ქაზუმაშვილი (დუშეთი) - 255 (110+145), 2. დავით მაქაძე (საჩხერე) - 170 (75+95), 3. გიორგი ბერაძე (ხონი) - 155 (70+85).
+102 კგ. 1. მიხეილ ადამია (თბილისი-აფხაზეთი) - 260 (120+140), 2. ჯემალ ქემერტელიძე (საჩხერე) - 205 (95+110), 3. ზურაბ დეკანოიძე (საჩხერე) - 167 (72+95).

გუნდური: 1.თბილისი (233), 2. ზუგდიდი (213), 3. ქუთაისი (212 ქულა).

ყოველდღიური სპორტული გაზეთი "ლელო"
654
მკითხველის კომენტარები / 0 /
მსგავსი ამბები
რუბრიკის სხვა სიახლეები
;